அமெரிக்க ஜனாதிபதித் தேர்தலில் டிரம்பின் வெற்றி குறித்து சீனா கவலைப்படுகிறதா?

நவம்பர் 505ஆம் திகதி நடக்கவிருக்கும் அமெரிக்க ஜனாதிபதித் தேர்தலைப் பற்றி சீனா பதற்றமடையச் செய்வது எது? முன்னாள் அமெரிக்க ஜனாதிபதியும் குடியரசுக் கட்சியின் வேட்பாளருமான டொனால்ட் டிரம்ப் எதிர்வரும் தேர்தலில் வெற்றி பெறக்கூடிய சாத்தியம் குறித்து பீஜிங் பெரிதும் கவலையடைந்துள்ளது. ஒஹியோவைச் சேர்ந்த 39 வயதான செனட்டரான ஜே டி வான்ஸை தனது உப ஜனாதிபதி வேட்பாளராக டொனால்ட் டிரம்ப்பால் தேர்ந்தெடுத்திருப்பது சீனாவின் கவலையை இரட்டிப்பாக்கியுள்ளது.

தி ஜப்பான் டைம்ஸின் கருத்துப்படி, டிரம்பின் “அமெரிக்கா முதல்” என்ற நிலைப்பாட்டைக் கடினப்படுத்துவதை இவர் பிரதிநிதித்துவப்படுத்துகிறார், மேலும் இவர் உறுதியான சீனா மற்றும் ஜனநாயக தாய்வானுக்கான ஆதரவை இன்னும் கடுமையாக்க உதவுவார். ஓஹியோவில் உள்ள மிடில்டவுனைச் சேர்ந்த வான்ஸ், அமெரிக்க நிதிச் சந்தைகளுக்கு சீன அணுகலைக் கட்டுப்படுத்தவும், சீனச் செல்வாக்கிலிருந்து அமெரிக்க உயர்கல்வியைப் பாதுகாக்கவும் சட்டத்தை அறிமுகப்படுத்தினார்.

பாக்ஸ் நியூஸுக்கு அளித்த பேட்டியில், செனட்டர் வான்ஸ், சீனா அமெரிக்காவிற்கு “மிகப்பெரிய அச்சுறுத்தல்” என்று கூறினார். டிரம்ப் தேர்ந்தெடுக்கப்பட்டால், ரஷ்யா மற்றும் உக்ரைனுடன் பேச்சுவார்த்தை நடத்தி, “இந்த விடயத்தை விரைவாக முடிவுக்குக் கொண்டுவருவோம்.இதன் மூலம் சீனாவின் உண்மையான பிரச்சினையில் அமெரிக்கா கவனம் செலுத்த முடியும்” என்றும் அவர் கூறினார். இதுவே பீஜிங்கை அமைதியற்றதாக உணர வைக்கிறது. இதே வேளை “அமெரிக்க தேர்தல்களில் சீனாவை ஒரு பிரச்சினையாக்குவதை நாங்கள் எப்போதும் எதிர்க்கிறோம்” என்று சீனாவின் வெளியுறவு அமைச்சின் செய்தித் தொடர்பாளர் லின் ஜியான் செய்தியாளர் சந்திப்பின் போது கூறினார்.

பீஜிங்-வாஷிங்டன் உறவுகளில் செனட்டர் வான்ஸின் சீன-விரோத நிலைப்பாடுகளின் தாக்கம் குறித்து தனது அச்சத்தை குளோபல் டைம்ஸ் வெளிப்படுத்தியுள்ளது. “வெளியுறவுக் கொள்கையின் அடிப்படையில், தேசிய நலன்களுக்கு முன்னுரிமை அளிப்பதன் மூலம் கடுமையான நிலைப்பாட்டை எடுக்கலாம். வான்ஸிக் கருத்துக்கள் எதிர்கால கொள்கை விவாதங்கள் மற்றும் உருவாக்கம் ஆகியவற்றில் குறிப்பிடத்தக்க தாக்கத்தை ஏற்படுத்தும் என்று அதில் சுட்டிக்காட்டப்பட்டுள்ளது.

டொனால்ட் டிரம்ப் தனது முதல் ஜனாதிபதி பதவிக்காலத்தில் பீஜிங்கிற்கு எதிராக வர்த்தகப் போரைத் தொடங்கிய பின்னர், சீனாவின் பொருளாதாரத்தில் தாக்கம் ஏற்பட்டது. ஜூலை 2018 மற்றும் ஆகஸ்ட் 2019 க்கு இடையில், சீன தயாரிப்புகள் மீது அமெரிக்கா 250 பில்லியன் டொலர் வரிகளை விதித்தது. செப்டம்பர் 2019 இல், ஜனாதிபதி டிரம்ப் அமெரிக்க நிறுவனங்களை சீனாவிலிருந்து உற்பத்தியை வெளியேற்றவும், அமெரிக்காவில் அதிக தயாரிப்புகளை உருவாக்கவும் அழைப்பு விடுத்தார்.

2017 முதல் 2021 வரையிலான தனது ஜனாதிபதி பதவிக் காலத்தில், வர்த்தகம், தொழில்நுட்பம் முதல் தாய்வான் மற்றும் தென் சீனக் கடல் வரையிலான அனைத்துப் பிரச்சினைகளிலும் டிரம்ப் சீனாவிற்கு தாக்கம் ஏற்படுத்தும் வகையில் செயற்பட்டார். இந்த ஆண்டின் தொடக்கத்தில், அமெரிக்க நலன்களைப் பாதுகாக்க சீனா மீதான தனது கடுமையான நிலைப்பாட்டை மீண்டும் தொடங்குவதாக அவர் சபதம் செய்துள்ளார். முன்னாள் அமெரிக்க ஜனாதிபதி டிரம்ப் பத்திரிகைப் பேட்டியொன்றில் “தான் மீண்டும் தேர்ந்தெடுக்கப்பட்டால், தனது இரண்டாவது பதவிக்காலத்தில் சீனப் பொருட்களுக்கு 60% அல்லது அதற்கும் அதிகமான வரிகளை விதிக்கப் போவதாகக் கூறினார்.

டிரம்ப் பீஜிங்கிற்கு எதிராக இந்தோ-பசிபிக் பிராந்தியத்தில் அதன் விரிவாக்கவாத உரிமைகோரல்களில் ஒரு கடினமான நிலைப்பாட்டை சமமாகப் பேணுவார் என எதிர்பார்க்கப்படுகிறது. தென் சீனக் கடல் தொடர்பான பிரச்சினையில் சீனாவின் எந்தவொரு இராணுவத் தாக்குதலில் இருந்தும் பிலிப்பைன்ஸைப் பாதுகாப்பதாகவும் அவர் உறுதியளித்திருந்தார்.

உண்மையில், 1951 இல் அமெரிக்கா மற்றும் பிலிப்பைன்ஸால் கையெழுத்திடப்பட்ட பரஸ்பர பாதுகாப்பு ஒப்பந்தத்தின் கீழ், வெளி ஆக்கிரமிப்பாளரின் தாக்குதலின் போது இரு நாடுகளும் ஒருவருக்கொருவர் உதவிக்கு வர உறுதிபூண்டுள்ளன. ஜோபைடன் நிர்வாகம் பிலிப்பைன்ஸுடனான அமெரிக்காவின் கூட்டாண்மைக்கு மேலும் பலத்தை அளித்தது. தென்கிழக்கு ஆசிய நாட்டில் தற்போதுள்ள 5 இராணுவ தளங்களைத் தவிர நான்கு புதிய இராணுவ தளங்களை அமெரிக்காவிற்கு மணிலா வழங்கியது. இரு நாடுகளின் ஆயுதப் படைகளும் பசிபிக் பிராந்தியத்தில் தொடர்ந்து கூட்டுப் பயிற்சிகளை மேற்கொண்டு வருகின்றன.

இந்த ஆண்டு ஏப்ரல்-மே மாதங்களில், 16,000க்கும் மேற்பட்ட அமெரிக்க மற்றும் பிலிப்பைன்ஸ் ராணுவ வீரர்கள், தாய்வானின் தெற்கு முனையில் இருந்து 156 கிமீ தொலைவில் அமைந்துள்ள பிலிப்பைன்ஸின் வடக்குப் பகுதியில் உள்ள இட்பயாத் தீவில் பாலிகாத்தான் வருடாந்த இராணுவப் பயிற்சியில் பங்கேற்றனர்.

அமெரிக்க பாதுகாப்புத் துறையின் கூற்றுப்படி, இரு நாடுகளும் தற்போது இராணுவத் தகவல் தொடர்பான பொதுப் பாதுகாப்பு ஒப்பந்தத்தின் முடிவைப் பற்றி ஆராய்ந்து வருகின்றன.இது இரு நாடுகளின் இராணுவத்தினரிடையே தகவல் பகிர்வை வலுப்படுத்த வழிவகுக்கும். தவிர, பிலிப்பைன்ஸ் படைகளின் நவீனமயமாக்கலில் வாஷிங்டன் மற்றும் மணிலா இணைந்து செயல்படுவதாக அமெரிக்க பாதுகாப்புத் துறை தெரிவித்துள்ளது.

தேர்தலுக்குப் பிறகு , இந்தோ-பசிபிக் பிராந்தியம் மற்றும் சீனா மீது தங்கள் கவனம் இருக்கும் என்று ட்ரம்ப் மற்றும் அவரது உப ஜனாதிபதி ஜே டி வான்ஸ் ஆகியோர் ஏற்கனவே சுட்டிக்காட்டியுள்ளனர். இந்தோ-பசிபிக் நோக்கிய ஜோ பைடன் தலைமையிலான நிர்வாகத்தின் அணுகுமுறையை அவர்கள் தொடருவார்கள் என்பதே இதன் அர்த்தமாகும்.