ரணில்- சஜித் இணைவு விரைவில் சாத்தியம்!
ஐக்கிய தேசியக் கட்சி மற்றும் ஐக்கிய மக்கள் சக்தி இணைவு தொடர்பான பேச்சுவார்த்தைகளுக்கு இணக்கம் காணப்பட்டாலும் ஐக்கிய மக்கள் சக்தி என்ற பெயரையும் தொலைபேசி சின்னத்தையும் எச்சந்தர்ப்பத்திலும் விட்டுக் கொடுக்காமல் இருப்பதற்கு தீர்மானிக்கப்பட்டுள்ளது.
கட்சியாக முன்னேற வேண்டுமானால் ஏனைய கட்சிகளையும் குழுக்களையும் இணைத்துக்கொள்வதில் எந்த பிரச்சினையும் இல்லையென்றாலும் கட்சியின் பெயரையும் சின்னத்தையும் எந்த சந்தர்ப்பத்திலும் விட்டுக்கொடுப்பதற்கு தயாரில்லையென ஐக்கிய மக்கள் சக்தி உறுப்பினர்களால் கடுமையான ஆலோசனை கட்சித் தலைமைக்கு வழங்கப்பட்டுள்ளது.
மேலும் வங்கிக் கொள்ளையர்கள், கார் திருடர்கள் மற்றும் கோடிக்கணக்கில் வரி செலுத்தாத திருடர்கள் மீண்டும் இந்தக் கட்சிக்குள் கொண்டுவரப்பட்டால், அது கட்சிக்கு பெரும் பேரழிவாக இருக்குமெனவும் சுட்டிக்காட்டப்பட்டுள்ளதுடன், ஹரின், மனுச அல்லது ராஜித போன்றவர்களை இணைத்துக் கொள்வதற்கு எவ்வித எதிர்ப்பும் வெளியிடப்படவில்லை.
இந்தக் கட்சியில் யாருக்கும் இதுபோன்ற குற்றச்சாட்டுகள் இல்லையென்பதால், யாராவது இந்தக் கட்சியை வேறு இடங்களுக்கு இழுக்க முயற்சித்தால், கட்சியின் பார்வையில் இருந்து யோசித்து முடிவெடுக்க பயப்படக்கூடாது என கட்சியின் தலைமைக்கு அறிவுறுத்தப்பட்டுள்ளது.
இதனால் எந்த சூழ்நிலையிலும் கட்சியின் பெயரையோ அல்லது தொலைபேசி சின்னத்தையோ மாற்றாமல் இணைந்து செயற்பட விரும்புபவர்களை மாத்திரம் கட்சியில் இணைத்துக் கொள்வதற்கு சஜித் பிரேமதாச உறுதிமொழி வழங்கியுள்ளதாகவும் தெரிவிக்கப்பட்டுள்ளது.
இந்தப் பின்னணியில்தான் கடந்த வாரம் கூடிய ஐக்கிய மக்கள் சக்தியின் செயற்குழு, உள்ளாட்சித் தேர்தலுக்கு முன்பு இரு கட்சிகளுக்கும் இடையே சில உடன்பாடுகள் எட்டப்பட வேண்டும் எனவும் ஐக்கிய தேசியக் கட்சியுடன் மட்டுமல்லாமல், அனைத்து எதிர்க்கட்சிகளுடனும் கலந்துரையாடி, ஒருவித உடன்பாட்டை எட்டுவதற்கு ஐக்கிய மக்கள் சக்தி பாடுபட வேண்டும் என்றும் கருத்து வெளியிடப்பட்டுள்ளது.
மேலும் ஐக்கிய தேசியக் கட்சி மாத்திரமல்லாது, அனைத்து எதிர்க்கட்சிகளுடனும் கலந்துரையாடி அனைத்து கட்சிகளிடையேயும் ஒருவித உடன்பாட்டை எட்டுவதே சஜித் பிரேமதாசவின் நோக்கமாகுமெனவும் சுட்டிக்காட்டப்பட்டுள்ளது.
