ட்ரூஸ் இன மக்களை காக்கும் போர்வையில் சிரியாவை தாக்கும் இஸ்ரேலிய அடாவடி!… ஐங்கரன் விக்கினேஸ்வரா

சிரியாவின் தெற்கு மாகாணமான சுவைடாவில் உள்ள ட்ரூஸ் (Druze) மற்றும் பெடோயினுக்கு இடையே கடுமையான ஆயுத மோதல்கள் வெடித்துள்ளன. தொடர்ந்து மோதல்கள் அதிகரித்து வருவதுடன், மதப் பதட்டங்களின் அழுத்தத்தின் கீழ் டமாஸ்கஸ் அரசாங்கம் மீண்டும் ஸ்திரத்தன்மைக்காக போராடி வருகிறது.

டமாஸ்கஸில் உள்ள மத்திய அரசாங்கத்திடமிருந்து தீர்க்கமான அமைதி தலையீட்டை ட்ரூஸ் இன மக்கள் கோரியுள்ளனர்.

புதிய அரசு அழுத்தத்தில் !

ஆறு மாதங்களுக்கு முன்பு பஷார் அல்-அசாத் அரசு வீழ்ந்ததிலிருந்து, ஜனாதிபதி அகமது அல்-ஷாராவின் புதிய அரசாங்கம் போரினால் பாதிக்கப்பட்ட சிரியாவில் ஸ்திரத்தன்மையை மீட்டெடுக்க முயற்சித்து வருகிறது. இருப்பினும், வன்முறை வெடிப்புகள், பெரும்பாலும் மத ரீதியாக, தொடர்ந்து நிகழ்ந்து வருகின்றன.

சுவைதாவில் தற்போதைய மோதல் ஒரு இளம் ட்ரூஸ் மனிதனின் கொள்ளையால் தூண்டப்பட்டதாகக் கூறப்படுகிறது. அந்த இளைஞன் பெடோயின் பழங்குடியினரால் கொடூரமாகத் தாக்கப்பட்டான். அதன் பிறகு பழிவாங்கும் விதமாக மோதல்கள் தொடர்கின்றன.

நிலைமையைக் கட்டுப்படுத்த சிரிய பாதுகாப்பு அமைச்சகம் துருப்புக்களை அனுப்பியது. இருப்பினும், கண்காணிப்பகத்தின் கூற்றுப்படி, இராணுவத்தின் ஒரு பகுதி பெடூயின்களின் பக்கம் சண்டையிட்டதாகக் கூறப்படுகிறது. இது ட்ரூஸ் மக்களின் அவநம்பிக்கையை மேலும் வலுப்படுத்தியது. அதன் பங்கிற்கு, பொதுமக்களைப் பாதுகாப்பதே இதன் நோக்கம் என்று அமைச்சகம் வலியுறுத்தியது. பாதுகாப்பை மீட்டெடுப்பது அரசுக்கும் அதன் குடிமக்களுக்கும் இடையிலான பகிரப்பட்ட பொறுப்பாகும்.

சிறுபான்மையினரின் பாதுகாப்பில் தொடர்ந்து அக்கறை என்றும்,

அனைவருக்கும் சிரியாவை உருவாக்க அரசாங்கம் உறுதியளித்துள்ளது. ஆனால் மத ரீதியாக தூண்டப்பட்ட வன்முறை வெடிப்புகள் நாட்டை தொடர்ந்து உலுக்கிக் கொண்டிருக்கின்றன.

ட்ரூஸ், அலெவிட் மற்றும் கிறிஸ்தவர்கள் தங்கள் பாதுகாப்பு குறித்து அஞ்சுகிறார்கள். சர்வதேச பார்வையாளர்கள் உள்நாட்டிலும் சர்வதேச அளவிலும் நிலைமையை கவலையுடன் கண்காணித்து வருகின்றனர்.

2011 போருக்கு முன்பு, சுமார் 700.000 ட்ரூஸ் மக்கள் சிரியாவில் வசித்து வந்தனர், அவர்களில் பெரும்பாலோர் சுவைதாவில் வசித்து வந்தனர். 11 ஆம் நூற்றாண்டில் இஸ்லாத்திலிருந்து தோன்றிய இந்த மத சிறுபான்மையினர், மக்கள் தொகையில் சுமார் 3 சதவீதத்தை பிரதிநிதித்துவப் படுத்துகின்றனர். லெபனான், இஸ்ரேல் மற்றும் கோலான் மலை ஆகிய இடங்களிலும் ட்ரூஸ் சமூகங்கள் உள்ளன.  இதே வேளை தெற்கு சிரியாவில் அரசாங்கப் படைகளுக்கும் ட்ரூஸ் போராளிகளுக்கும் இடையிலான வன்முறையில் பலர் கணக்கானோர் கொல்லப்பட்டனர் என்றும் தகவல்கள் தெரிவிக்கின்றன.

சிரிய இராணுவம் ஆரம்பத்தில் பெடோயின் மற்றும் ட்ரூஸ் பழங்குடியினருக்கு இடையிலான மோதல்களைத் தடுக்க தவறியது. இதுவே இஸ்ரேலின் வான்வழித் தாக்குதல்களுக்கு வழிவகுத்தது. இது ட்ரூஸ் சமூகத்தைப் பாதுகாப்பதாக இஸ்ரேல் கூறுகிறது.

இதன் விளைவாகவே டமாஸ்கஸில் உள்ள ஜனாதிபதி மாளிகை மற்றும் பாதுகாப்பு அமைச்சக அலுவலகங்களையும் இஸ்ரேல் கடுமையாக தாக்கியதாகக் கூறப்படுகிறது.

இஸ்ரேலிய அரசுக்கு நான்கு திசைகளில் இருந்தும் கண்டனங்கள் எழுந்துள்ளன. சர்வதேச எதிர்வினையாக இந்த நிலைமையை “பாரிய தொந்தரவு” என்று கூறிய அமெரிக்கா, தாக்குதல்களை நிறுத்துமாறு இஸ்ரேலிடம் கேட்டுக் கொண்டதாக கூறப்படுகிறது.

இருப்பினும், சிரிய இராணுவம் சுவைதா நகரத்திலிருந்து வெளியேறாவிட்டால் தாக்குதல்களை தீவிரப்படுத்துவோம் என்று இஸ்ரேல் இராணுவம் எச்சரித்துள்ளது.

யார் இந்த ட்ரூஸ் இன மக்கள் :

ட்ரூஸ் இன மக்கள் சிரியா, லெபனான் மற்றும் இஸ்ரேலில் சுமார் 1 மில்லியன் பின்தொடர்பவர்களைக் கொண்ட ஒரு அரபுப் பிரிவாகும். அவர்கள் மதமாற்றங்களையோ அல்லது கலப்புத் திருமணங்களையோ அனுமதிக்காத ஒரு தனித்துவமான இஸ்லாம் வடிவத்தைப் பின்பற்றுகிறார்கள். சிரியாவில், அவர்களில் பெரும்பாலோர் சுவைதா மற்றும் அருகிலுள்ள கோலன் மலைகளில் வசிக்கின்றனர். இது 1981 இல் இஸ்ரேலால் இணைக்கப்பட்ட ஒரு பகுதியாகும்.

20,000 க்கும் மேற்பட்ட ட்ரூஸ் இன மக்கள் கோலானில் வசிப்பதாக அறியப்படுகிறது, அவர்களில் பெரும்பாலோர் சிரிய அடையாளத்தைச் சேர்ந்தவர்கள் ஆவார்கள்.

சிரிய இராணுவத்துடன் மோதல் ஏன் ?

டிசம்பர் 2024 இல் சிரியாவில் பஷார் அல்-அசாத் பதவி கவிழ்க்கப்பட்ட பிறகு, புதிய ஜனாதிபதி அகமது அல்-ஷாரா சிறுபான்மையினரை உள்ளடக்குவதற்கும் பாதுகாப்பதற்கும் உறுதியளித்தார். ஆனால் அரசாங்கத்தை ஆதரிக்கும் இஸ்லாமிய சக்திகள் அலவைட்டுகள் மற்றும் ட்ரூஸ் உள்ளிட்ட சிறுபான்மை சமூகங்களை குறிவைத்துள்ளன.

மேலும் ட்ரூஸ் மக்களை நிராயுதபாணியாக்கி புதிய இராணுவத்தில் ஒருங்கிணைக்க மறுத்து, அரசாங்கத்தில் தங்கள் பிரதிநிதித்துவத்தில் அதிருப்தி அடைந்துள்ளனர்.

இஸ்ரேலில் வசிப்பதுடன் இராணுவத்தில் பணியாற்றும் சுமார் 130,000 ட்ரூஸ் மக்களுடனான வரலாற்று மற்றும் குடும்ப உறவுகள் காரணமாக, சிரியாவில் ட்ரூஸைப் பாதுகாப்பதற்கான சண்டையில் தலையிடுவதாக இஸ்ரேல் தற்போது கூறுகிறது.

அத்துடன் ட்ரூஸ் மக்கள் அதிகமாக வசிக்கும் சிரியாவின் கோலான் மலைப் பகுதியை இராணுவமயமாக்கப்பட்ட பிரதேசம் என்று இஸ்ரேலிய இராணுவம் அறிவித்துள்ளது. ஆனால் சிரிய அரசாங்கம் அதை அதன் இறையாண்மையை மீறுவதாகக் கூறி நிராகரித்துள்ளது.

கடந்த ஆண்டு இறுதியில் இஸ்ரேலுக்கும் புதிய சிரிய அரசாங்கத்திற்கும் இடையே ஒரு அமைதி ஒப்பந்தம் ஏற்படும் என எதிர்பார்க்கப்பட்டது.

அசாத் பதவி கவிழ்க்கப்பட்டதிலிருந்து, சிரியாவை சமாதான ஒப்பந்தங்களுக்கு நெருக்கமாகக் கொண்டு வருவதற்கான அமெரிக்க முயற்சிகள் இருந்த போதிலும், இஸ்ரேல் சிரியாவில் தனது தாக்குதல்களைத் தொடர்ந்தது. மேலும் பல பிரதேசங்களைக் கைப்பற்றியது.

இந்த ஆண்டு மே மாதம், ஜனாதிபதி டிரம்ப் ரியாத்தில் சிரியாவின் புதிய ஜனாதிபதி அல்-ஷாராவைச் சந்தித்து, சிரியா மீதான அமெரிக்கத் தடைகளை நீக்குவதாக அறிவித்தார். இது சர்வதேச உறவுகளை இயல்பாக்குவதற்கான ஒரு படியாகும் என அமெரிக்க அதிபர் டிரம்ப் தெரிவித்தார்.

மேலும் அசாத் ஆட்சியின் வீழ்ச்சிக்குப் பின்னர், இஸ்ரேல் புதிய சிரிய அரசாங்கத்துடன் நேரடி மற்றும் மறைமுக பேச்சுவார்த்தைகளை நடத்தியதாகவும் அறியப்படுகிறது. ஆனால் சிரிய பிரதேசத்தின் மீது இஸ்ரேலின் தொடர்ச்சியான தாக்குதல்கள் மற்றும் நாட்டில் இராணுவ பிரசன்னம் விரிவடைவது இந்த விடயங்களை சிக்கலாக்கும் அபாயத்தை ஏற்படுத்தியுள்ளது.

மே மாதத்தில், தாக்குதல்களை முடிவுக்குக் கொண்டுவர இஸ்ரேலுடனான மறைமுகப் பேச்சுவார்த்தைகள் நோக்கம் கொண்டதாக அல்-ஷாரா அரசு கூறினாலும் அது சாத்தியப்படவில்லை.

டமாஸ்கஸில் உள்ள புதிய அரசாங்கத்தை “தீவிரவாத இஸ்லாமிய ஆட்சி” என்றும் இஸ்ரேல் அரசுக்கு அச்சுறுத்தல் என்றும் நெதன்யாகு முன்னர் கூறியிருந்தார். சிரியா மீதான இஸ்ரேலிய தாக்குதல்கள், நாட்டில் அதிகாரத்தை பலப்படுத்துவதற்கான அல்-ஷராவின் முயற்சியை மேலும் சிக்கலாக்குகின்றன.

மேலும் சிரியாவின் இறையாண்மைக்கும் அதன் மக்களுக்கும் ஒரு ஆக்கிரமிப்பை இஸ்ரேல் தொடர்ந்து செய்துவருகிறது எனவும் குற்றச்சாட்டு எழுந்துள்ளது.