கண்ணாடி கூந்தல்: பளபளப்பாக மின்னுகிறது
‘கிளாஸ் ஸ்கின்’ (Glass Skin) பற்றிப் பலரும் பேசி வரும் நிலையில், அடுத்ததாக ‘கிளாஸ் ஹேர்’ (Glass Hair) என்ற புதிய டிரெண்ட் பிரபலமாகி வருகிறது. டிக்டாக் (TikTok) மற்றும் இன்ஸ்டாகிராமில் (Instagram) நீண்ட, கண்ணாடியைப் போல மின்னும் கூந்தலுடன் கூடிய வீடியோக்கள் வைரலாகி வருகின்றன. இது சாதாரணமான பளபளப்பான கூந்தல் மட்டுமல்ல; கண்ணாடியைப் போன்ற மிகச்சரியான பிரதிபலிப்பைக் கொண்ட ஒரு தோற்றமாகும்.
தென் கொரியாவின் மிகப்பெரிய அழகுசாதன விற்பனையாளரான ‘சிஜே ஆலிவ் யங்’ (CJ Olive Young)-இன் உலகளாவிய தொடர்பு அதிகாரி ரீனா கிம் (Rena Kim) கூறுகையில், “கொரிய அழகு முறையிலிருந்து வந்த ‘கிளாஸ் ஸ்கின்’ டிரெண்டின் ஒரு நீட்சியே இது. ஆரோக்கியமான கூந்தலுக்குத் தேவையான பிரகாசத்தையும், ஒளிவீசும் தன்மையையும் இது குறிக்கிறது” என்று குறிப்பிடுகிறார்.
மேலும் அவர் கூறுகையில், “கொரிய கூந்தல் பராமரிப்பு சந்தையானது, நீண்ட காலமாகவே முறையான கூந்தல் சுத்தம் மற்றும் மென்மையான, பளபளப்பான, நன்கு பராமரிக்கப்பட்ட கூந்தலுக்கே முன்னுரிமை அளித்து வருகிறது. கிளாஸ் ஹேர் என்பது அந்தப் பராமரிப்பு முறையின் ஒரு விரிவாக்கம். அதிகப்படியான வெப்பத்தைப் பயன்படுத்தி கூந்தலை நேராக்குவதையோ அல்லது அதிக தயாரிப்புகளைப் போட்டு கூந்தலை அழுக்குப்படுத்துவதையோ விட, கண்டிஷனிங் செய்தல், வலுப்படுத்துதல் மற்றும் பாதுகாத்தல் போன்ற முறைகள் மூலமே கூந்தலை மென்மையாக வைத்திருக்க முடியும்” என்கிறார்.
தலைமுடி மற்றும் உச்சந்தலை பராமரிப்பு நிறுவனமான ‘பிலிப் கிங்ஸ்லி’ (Philip Kingsley)-இன் ஆலோசகர் அனபெல் கிங்ஸ்லி (Anabel Kingsley) கூறுகையில், “கூந்தலின் கியூட்டிக்கிள் (Cuticle) எனப்படும் புறணி அடுக்கு சீராக அமைந்தால் மட்டுமே ‘கிளாஸ் ஹேர்’ தோற்றத்தைப் பெற முடியும்” என்கிறார்.
கூந்தலின் ஒவ்வொரு இழையிலும் உள்ள பாதுகாப்பு அடுக்கே இந்த கியூட்டிக்கிள் ஆகும். இது வீட்டின் கூரை ஓடுகள் போல ஒன்றுடன் ஒன்று இணைந்து அமைந்திருக்கும். “இதுதான் உங்கள் கூந்தலின் உட்பகுதியைச் சேதத்திலிருந்து பாதுகாக்கிறது. ஆரோக்கியமான, தட்டையான மற்றும் மூடிய கியூட்டிக்கிள்கள் ஒளியை நன்கு பிரதிபலிக்கும், அதனால் கூந்தல் கண்ணாடி போல மின்னுகிறது. எனவே, இதைப் பராமரிப்பது மிகவும் முக்கியம்” என்று அவர் விளக்குகிறார்.
