அமெரிக்க-இஸ்ரேல் ஒத்துழைப்புடன் கிழக்கில் பாரிய ‘விண்வெளித் தளம்’

இலங்கையின் கிழக்குக் கரையில் ‘விண்வெளித் தளம் ‘ (Spaceport) ஒன்றை அமைப்பதற்கு இஸ்ரேலும் ஏனைய வெளிநாட்டு சக்திகளும் திட்டமிட்டு வருவதாகவும், அமெரிக்காவின் விண்வெளித் துறை சார்ந்த நடவடிக்கைகளில் தற்போதைய தேசிய மக்கள் சக்தி அரசாங்கம் ஈடுபட்டு வருவதாகவும் இலங்கை கம்யூனிஸ்ட் கட்சி எச்சரித்துள்ளது.

இது தொடர்பாக இலங்கை கம்யூனிஸ்ட் கட்சியின் பொதுச்செயலாளர் டொக்டர் ஜி. வீரசிங்க வெளியிட்ட அறிக்கையில்:

அமெரிக்கா மற்றும் அதன் தோழமை நாடுகளுடனான இலங்கையின் இராணுவக் கூட்டுறவு மேலும் விரிவடைவதையும, குறிப்பாக அமெரிக்காவின் “விண்வெளித் துறை” நடவடிக்கைகளில் இலங்கை ஆயுதப்படைகள் ஈடுபட்டு வருவதையும் கண்டு இலங்கை கம்யூனிஸ்ட் கட்சி தனது ஆழ்ந்த கவலையையும் அதிர்ச்சியையும் தெரிவித்துக் கொள்கிறது.

இலங்கையின் ஆயுதப்படைகள் அமெரிக்கா மற்றும் அதன் தோழமை நாடுகளின் ஆயுதப்படைகளுடன் படிப்படியாக ஒருங்கிணைக்கப்பட்டு வருகின்றன என்று கம்யூனிஸ்ட் கட்சி பொதுமக்களுக்கு தொடர்ந்து எச்சரித்து வருகிறது. இந்தச் செயற்பாடானது 2017 ஆம் ஆண்டின் கொள்முதல் மற்றும் குறுக்குச் சேவை ஒப்பந்தத்தை (ACSA) அடிப்படையாகக் கொண்டு கட்டியெழுப்பப்பட்டுள்ளது. இதில் மொன்டானா தேசிய காவல்படையுடனான (Montana National Guard) மாநில பங்காண்மைத் திட்ட புரிந்துணர்வு ஒப்பந்தம், மத்திய கிழக்கில் அமெரிக்கா தலைமையிலான நடவடிக்கைகளில் இலங்கை கடற்படை பங்கேற்பது மற்றும் அமெரிக்காவின் ஒருதலைப்பட்சமான கடல்சார் தடைகளுக்கு இணங்குவது ஆகியவை அடங்கும்.

இந்த நிலைமை தற்போது மேலும் தீவிரமான ஒரு கட்டத்தை எட்டியுள்ளது. இந்த மாத தொடக்கத்தில், லெப்டினன்ட் கேணல் ஷும்பே புஜிமுரா தலைமையிலான அமெரிக்க விண்வெளிப் படைகள்-பசிபிக் (USSPACEFOR-PAC) பிரதிநிதிகள் குழு இலங்கைக்கு விஜயம் செய்தது. இந்தக் குழுவினர் இலங்கை விமானப்படை தளபதி, இலங்கை கடற்படைத் தலைமை அதிகாரி மற்றும் மேல், தெற்கு கடற்படை கட்டளை அதிகாரிகளை சந்தித்துப் பேசினர்.

“விண்வெளிப் பகுதி விழிப்புணர்வை (space domain awareness) அதிகரித்தல், செயற்கைக்கோள் தொடர்பாடல்கள் மற்றும் பிராந்திய பாதுகாப்பு ஒத்துழைப்பு” ஆகிய விடயங்கள் குறித்தே இச்சந்திப்புகளில் முக்கியமாக விவாதிக்கப்பட்டதாகத் தெரிகிறது.

இந்த விஜயமானது, கரைக்கு அருகில் சுறுசுறுப்பான நடவடிக்கைகளுக்காக வடிவமைக்கப்பட்ட அமெரிக்காவின் ‘யுஎஸ்எஸ் கன்பெரா’ (USS Canberra) என்ற போர்க் கப்பல் இலங்கைக்கு மேற்கொண்ட இரண்டாவது விஜயத்துடன் ஒரே நேரத்தில் நிகழ்ந்துள்ளது. இவைகளை ஒன்றாகப் பார்க்கும்போது, இந்தோ-பசிபிக் பிராந்தியத்தில் அமெரிக்காவின் இராணுவக் கட்டமைப்பிற்குள் இலங்கை மேலும் ஆழமாக ஈர்க்கப்பட்டு வருவதை இது உணர்த்துகிறது.

இந்தோ-பசிபிக் பிராந்தியத்தில் “விண்வெளி மேலாதிக்கத்தை” (space superiority) பேணுவதே தங்களது நோக்கம் என்று USSPACEFOR-PAC பிரகடனப்படுத்தியுள்ளது. “விண்வெளி மேலாதிக்கம்” என்பது அமெரிக்காவும் அதன் தோழமை நாடுகளும் எவ்வித “தடைகளுமின்றி” விண்வெளியில் சுதந்திரமாக இயங்குவதை உறுதி செய்வதையும், அதே வேளையில் எதிரிகளுக்கு அத்தகைய சுதந்திரத்தை மறுப்பதையும் குறிக்கிறது. இது வான்வெளி மேலாதிக்கத்திற்குச் சமமான, அடிப்படையில் போர்க்குணம் கொண்ட ஒரு நோக்கமாகும். இது விண்வெளியை அமைதியான முறையில் பயன்படுத்துவதை விடுத்து, விண்வெளி மூலமாக அல்லது விண்வெளியில் போருக்குத் தயாராகுவதை நோக்கமாகக் கொண்டது.

ஐக்கிய நாடுகள் சபையின் கட்டமைப்பிற்குட்பட்ட 1967 ஆம் ஆண்டின் ‘வெளிப்புற விண்வெளி ஒப்பந்தத்திற்கு’ (Outer Space Treaty) இலங்கையும் கட்டுப்பட்ட ஒரு தரப்பாகும். வெளிப்புற விண்வெளியை ஆராய்வதும் பயன்படுத்துவதும் அனைத்து நாடுகளின் நன்மைக்காகவும் மேற்கொள்ளப்பட வேண்டும் என்றும், சந்திரனும் ஏனைய விண்வெளிப் பொருட்களும் அமைதியான நோக்கங்களுக்காக மட்டுமே பயன்படுத்தப்பட வேண்டும் என்றும் அவ்வொப்பந்தம் தெளிவாகக் கூறுகிறது. மேலும் விண்வெளியில் அணுஆயுதங்களை நிறுத்துவதற்கும் இது தடை விதிக்கிறது.

சீனா, ரஷ்யா மற்றும் பல அணிசேரா இயக்க நாடுகள் ‘விண்வெளியில் ஆயுதங்களை நிறுத்துவதைத் தடுக்கும் ஒப்பந்தம்’ (PPWT) என்ற சட்டப்பூர்வ பிணைப்புள்ள ஒப்பந்தம் ஒன்றின் மூலம் இந்தக் கொள்கையை வலுப்படுத்த முயன்றுள்ளன. இந்த வரைவு ஒப்பந்தமானது விண்வெளியில் ஆயுதங்களை வைப்பதையும், விண்வெளிப் பொருட்களுக்கு எதிராக அச்சுறுத்தல் விடுப்பதையோ அல்லது பலத்தைப் பயன்படுத்துவதையோ தடை செய்ய முற்படுகிறது. இருப்பினும், அமெரிக்கா உள்ளிட்ட மேலைநாடுகள் இத்தகைய ஒப்பந்தத்தை நோக்கிய முன்னேற்றங்களைத் தடுத்து வருகின்றன.

எனவே, லெப்டினன்ட் கேணல் புஜிமுராவின் விஜயமானது, அமெரிக்கா தனது போர்க்குணம் கொண்ட விண்வெளித் திட்டங்களில் இலங்கையையும் பங்கெடுக்க வைக்க முயல்கிறது என்ற தெளிவான சந்தேகத்தை ஏற்படுத்துகிறது. சீனா, ரஷ்யா, ஈரான் மற்றும் ஏனைய நாடுகளை இலக்காகக் கொண்ட அமெரிக்காவின் விண்வெளிப் போர் ஆயத்தச் சங்கிலியில் இலங்கை ஒரு அங்கமாக மாறக்கூடாது.

இலங்கையின் கிழக்குக் கரையில் “விண்வெளித் தளம் ” (space port) ஒன்றை அமைப்பதற்கு இஸ்ரேலும் ஏனைய வெளிநாட்டு சக்திகளும் முன்மொழிந்துள்ளதாக வெளியாகும் செய்திகளும் மிகுந்த தீவிரத்துடன் பரிசீலிக்கப்பட வேண்டும். இஸ்ரேல் தனது பாதுகாப்பு மற்றும் பாதுகாப்பு கட்டமைப்பை விண்வெளித் துறைக்கும் தீவிரமாக விரிவுபடுத்தி வருகிறது. இதில் விண்வெளி சார்ந்த லேசர் திறன்கள், செயற்கைக்கோள் எதிர்ப்பு விழிப்புணர்வு மற்றும் சுற்றுப்பாதை கண்காணிப்பு தொழில்நுட்பங்கள் அடங்கும். மேலும் இது விண்வெளி தொடர்பான முயற்சிகளில் நேட்டோ (NATO) அமைப்புடன் நெருக்கமாக ஒத்துழைக்கிறது.

காசாவில் இடம்பெற்ற இனப்படுகொலை மற்றும் லெபனானில் மேற்கொள்ளப்பட்ட நடவடிக்கைகளைத் தொடர்ந்து, இலங்கையின் கிழக்குக் கரையில் சட்டவிரோத குடியிருப்புகளை அமைத்தல் மற்றும் இஸ்ரேல் பாதுகாப்புப் படையினருக்கான ஓய்வு மற்றும் பொழுதுபோக்கு வசதிகளை ஏற்படுத்தியமை போன்ற இஸ்ரேலின் முந்தைய நடவடிக்கைகளில் இருந்து இந்த முன்மொழிவை தனித்துப் பார்க்க முடியாது. “முன்மொழியப்பட்டுள்ள இந்த ‘விண்வெளி மையம்’ இலங்கையிலுள்ள இஸ்ரேலிய விரிவாக்க நடவடிக்கைகளின் மற்றொரு தொடர்ச்சியா?” என்று கம்யூனிஸ்ட் கட்சி கேள்வி எழுப்புகிறது.

கிழக்குக் கரையில் இஸ்ரேலின் கட்டுப்பாட்டிலுள்ள அல்லது இஸ்ரேலுடன் தொடர்புடைய ஒரு “விண்வெளி மையம்” அமைந்தால், அது சீனா, ஈரான் மற்றும் ரஷ்யா உள்ளிட்ட இலங்கைக்கு நட்புறவான நாடுகளுக்கு பாரிய விளைவுகளை ஏற்படுத்தும். இது மலாக்கா நீரிணை மற்றும் மியான்மரை நோக்கிச் செல்லும் முக்கிய கடல் வழிகளைக் கண்காணிக்கும் மையமாக அமைவதுடன், வெளிநாட்டு இராணுவ மற்றும் உளவுத்துறை நடவடிக்கைகளுக்கான ஒரு மூலோபாயச் சொத்தாக இலங்கையின் நிலப்பரப்பை மாற்றிவிடும்.

எனவே, இலங்கை அரசாங்கம் உடனடியாக பின்வரும் விபரங்களை பகிரங்கப்படுத்த வேண்டும் என கம்யூனிஸ்ட் கட்சி கோருகிறது.

1.அமெரிக்கா, இஸ்ரேல் மற்றும் ஏனைய வெளிநாட்டு சக்திகளுடனான இலங்கையின் இராணுவக் கூட்டுறவின் முழுமையான விபரம்;

2. ACSA மற்றும் மாநில பங்காண்மைத் திட்டத்தின் (SPP) கீழ் மேற்கொள்ளப்பட்ட அனைத்து ஒப்பந்தங்கள், புரிந்துணர்வு ஒப்பந்தங்கள், கூட்டுப் பயிற்சிகள், உளவுத்துறை ஏற்பாடுகள் மற்றும் வசதிகளைப் பயன்படுத்தும் ஏற்பாடுகள்;

3. USSPACEFOR-PAC பிரதிநிதிகள் குழுவின் விஜயத்தின் துல்லியமான நோக்கம் மற்றும் விண்வெளிப் பகுதி விழிப்புணர்வு, செயற்கைக்கோள் தொடர்பாடல் அல்லது பிராந்திய பாதுகாப்பு ஒத்துழைப்பு தொடர்பாக வழங்கப்பட்ட உறுதிகள்;

4.இஸ்ரேல், அமெரிக்கா அல்லது வேறு ஏதேனும் வெளிநாட்டு சக்திகள் சம்பந்தப்பட்ட “விண்வெளி மையம்” ஒன்றை கிழக்குக் கரையில் அமைப்பதற்கான எந்தவொரு முன்மொழிவையும் அரசாங்கம் பெற்றுக்கொண்டதா, பரிசீலித்ததா அல்லது அதற்கு ஒப்புதல் அளித்ததா என்பது பற்றிய விபரம்;

5.வெளிநாட்டு இராணுவ நடவடிக்கைகளுக்கு இலங்கையின் நிலப்பரப்பு, வான்வெளி, பிராந்தியக் கடல் எல்லை, தொடர்பாடல் உள்கட்டமைப்புகள் மற்றும் விண்வெளி சார்ந்த வசதிகள் பயன்படுத்தப்படுவதைத் தடுப்பதற்கு என்னென்ன பாதுகாப்பு நடைமுறைகள் உள்ளன என்பது பற்றிய விபரம்.