தேசிய தொழிலாளர் நிறுவனக் கட்டட மோசடி வழக்கு; அமைச்சர்கள் மூவரைக் கைது செய்யக் கோரிய மனு நிராகரிப்பு!
தேசிய தொழிலாளர் நிறுவனத்திற்குச் சொந்தமான தெஹிவளையில் உள்ள ஒரு கட்டிடத்தை மோசடியாக குத்தகைக்கு விட்டதாகக் கூறப்படும் சம்பவம் தொடர்பில், அமைச்சர் வசந்த சமரசிங்க, பிரதி அமைச்சர் மஹிந்த ஜயசிங்க, மற்றும் கடுவெல மேயர் ரஞ்சன் ஜயலால் ஆகியோரைக் கைது செய்யக் கோரி முறைப்பாட்டாளர் சார்பில் ஆஜரான சட்டத்தரணி முன்வைத்த கோரிக்கையை மவுண்ட் லாவினியா நீதவான் நீதிமன்றம் நிராகரித்தது.
நீதவான் பசன் அமரசேகர இது குறித்துத் தீர்ப்பளிக்கையில், இரண்டு மாடிக் கட்டிடத்தை ரூ. 3 மில்லியனுக்கு குத்தகைக்கு எடுக்க போலி குத்தகை ஒப்பந்தம் பயன்படுத்தப்பட்டதாக முறைப்பாடு தாக்கல் செய்யப்பட்டிருந்தாலும், இதுவரை சமர்ப்பிக்கப்பட்ட ஆதாரங்கள் குற்றவியல் குற்றத்திற்கான போதிய அடிப்படைகளை நிறுவவில்லை என்று குறிப்பிட்டார்.
இந்த வழக்கின் கோப்புகள் கடந்த பெப்ரவரியில் சட்டமா அதிபரின் ஆலோசனையைப் பெறுவதற்காக ஏற்கனவே அனுப்பி வைக்கப்பட்டுள்ளதாகவும் நீதிமன்றம் சுட்டிக்காட்டியது.
சந்தேக நபர்கள் இதற்கு முன்னர் கடந்த ஓகஸ்ட் மாதம் நீதிமன்ற உத்தரவுகளுக்கு அமைய கொழும்பு நிதி மோசடி விசாரணைப் பிரிவில் (Colombo Fraud Investigation Bureau) வாக்குமூலம் அளித்திருந்தனர். இந்த குத்தகைக்கு தேசிய தொழிலாளர் காங்கிரஸின் செயற்குழு 2020ஆம் ஆண்டு ஒப்புதல் அளித்ததாக அமைச்சர் சமரசிங்க தெரிவித்திருந்தார்.
இந்த வழக்கு மீண்டும் 2026ஆம் ஆண்டு பெப்ரவரி 27ஆம் திகதி விசாரணைக்கு எடுத்துக் கொள்ளப்படும்.
