நீர்கொழும்பு சிறையிலிருந்த வெளிநாட்டு பெண்ணின் காணொளி எவ்வாறு கசிந்தது?

கட்டுநாயக்க பண்டாரநாயக்க சர்வதேச விமான நிலையத்தில் 46 கிலோகிராம் குஷ் போதைப்பொருளுடன் கைது செய்யப்பட்ட பிரித்தானிய பிரஜையை ஜூன் 13 ஆம் திகதி வரை தொடர்ந்து விளக்கமறியலில் வைக்குமாறு நீர்கொழும்பு மேலதிக நீதவான் தர்ஷிமா பிரேமரத்ன உத்தரவிட்டுள்ளார்.

தொடர்புடைய வழக்கு விசாரணைக்கு அழைக்கப்பட்ட போது, ​​அந்த இளம் பெண் தொடர்பாக பிரித்தானிய டெய்லி மெயில் சமீபத்தில் வெளியிட்ட வீடியோ பதிவானது, அந்த இளம் பெண்ணுக்குத் தெரியாமல் பதிவு செய்யப்பட்டது என்பது நீதிமன்றத்தில் தெரியவந்தது.

கடந்த மே 12 ஆம் திகதி கட்டுநாயக்க விமான நிலையத்தில் சுங்கத் திணைக்களத்தின் போதைப்பொருள் தடுப்பு பிரிவினரால் சார்லட் மே லீ என்ற 21 வயது பிரித்தானிய பிரஜை கைது செய்யப்பட்டார்.

தாய்லாந்தின் பெங்கொக்கில் இருந்து இலங்கைக்கு ஸ்ரீலங்கன் எயார்லைன்ஸ் விமானத்தில் வந்த இளம் பெண்ணின் இரண்டு பயணப் பைகளில் 46 கிலோகிராம் “குஷ்” போதைப்பொருள் கண்டுபிடிக்கப்பட்டது.

பின்னர் அந்த இளம் பெண் நீர்கொழும்பு நீதவான் நீதிமன்றத்தில் ஆஜர்படுத்தப்பட்டு விளக்கமறியலில் வைக்கப்பட்டார்.

இவ்வாறான நிலையில் சம்பந்தப்பட்ட இளம் பெண் நீர்கொழும்பு சிறைச்சாலையில் குறைந்த வசதிகளுடன் இருப்பதாக பிரித்தானிய டெய்லி மெயில் வலைத்தளம் 21 ஆம் திகதி வெளிப்படுத்தியது.

இந்த வழக்கு விசாரணைகள் நேற்று நீர்கொழும்பு இல 02 மேலதிக நீதவான் தர்ஷிகா பிரேமரத்ன முன்னிலையில் மீண்டும் விசாரணைக்கு வந்தது, அப்போது, ​​சிறை அதிகாரிகள் அந்த இளம் பெண்ணை நீதிமன்றத்தில் ஆஜர்படுத்தினர்.

விசாரணை அதிகாரிகள் இளம் பெண்ணின் பயணப் பையிலிருந்து கைப்பற்றப்பட்ட 46 கிலோ குஷ் போதைப்பொருளை நீதிமன்றத்தில் சமர்ப்பித்தனர், மேலும் அதை நீதிமன்றத்தின் வழக்கு கோப்பு அறையில் வைப்பதற்கு நீதிவான் உத்தரவிட்டார்.

சந்தேகத்திற்குரிய பிரித்தானிய பெண் சார்பாக ஆஜரான சிரேஷ்ட சட்டத்தரணி சம்பத் பெரேரா, ஊடகவியலாளர்கள் என்று கூறிக்கொள்ளும் ஒரு குழு சமீபத்தில் தங்கள் கட்சிக்காரர் தடுத்து வைக்கப்பட்டுள்ள நீர்கொழும்பு சிறைச்சாலைக்குச் சென்று, சம்பவத்தைப் படம்பிடித்து உலகம் முழுவதும் ஒளிபரப்பியதாகக் குறிப்பிட்டார்.

இந்த விடயம் தனது கட்சிக்காரருக்கு பாதிப்பை ஏற்படுத்தியுள்ளதாகவும், இதனை முழுமையாக ஆராய்ந்து தகுந்த உத்தரவுகளை பிறப்பிக்குமாறு சட்டத்தரணி நீதவானிடம் கோரினார்.

இந்த சம்பவம் குறித்து பதிலளித்த சிறைச்சாலை அதிகாரிகள், அந்த இளம் பெண்ணின் நண்பர்கள் என்று கூறிக்கொள்ளும் ஒரு குழுவினர் வந்து அவருடன் பேச அனுமதி கோரியதால், வழக்கமான நடைமுறையின் கீழ் அனுமதி வழங்கப்பட்டதாகக் கூறினர்.

அங்கு வந்த ஒருவர், பொத்தான் வடிவில் உள்ள ஒரு சாதனத்தைப் பயன்படுத்தி, அந்த இளம் பெண்ணுடன் நடந்த உரையாடல்களைப் பதிவு செய்துள்ளதாக சிறைச்சாலை அதிகாரிகள் தெரிவித்துள்ளனர்.

சமர்ப்பணங்களை பரிசீலித்த நீதவான், சந்தேக நபரைப் பார்க்க சிறைச்சாலைக்கு வரும் பார்வையாளர்கள் தொடர்பில் மிகுந்த அவதானமாக இருக்குமாறு சிறைச்சாலை அதிகாரிகளுக்கு அறிவுறுத்தினார், மேலும் அவரைப் பார்க்க வருபவர்கள் முன் அனுமதி பெற வேண்டும் என்றும் உத்தரவுகளைப் பிறப்பித்தார்.