“விசித்திர விலங்கு- வௌவால்” …. கே.ஆர்.இரமேஷ்.முதுகலை விலங்கியல் ஆசிரியர்,

ஆசிரியர் வகுப்பறைக்குள் நுழைந்தார். கடைசி பெஞ்சில் மாணவர்களோடு அமர்ந்து கொண்டார். மாணவர்கள் உற்சாகமாக கரவொலி எழுப்பி அன்றைய தின கருத்தரங்கிற்கு பேசுவதற்காக சக நண்பர்களான சந்திரனையும், ராமனையும் அழைத்தனர். இருவரும் தயங்கியபடி முன்னால் வந்து நின்றனர். ராமன் தான் கொண்டு வந்த படத்தை விரித்து காண்பித்தான். அனைவரும் உற்று நோக்கினர். சந்திரன் பேச ஆரம்பித்தான், இது வௌவால், நரியின் முகத்தோற்றத்தையும் மூஞ்சுறுவின் உருவத்தையும் ஒத்து இருக்கும்.ச சுமார் 30 ஆண்டுகள் உயிர்வாழும். பறக்கும் திறன் படைத்த ஒரே பாலூட்டியினம். இதனை சிலர் பறக்கும் நரி என்பர். பறக்கும் போது உடல் எடையை இலகுவாக்க சாப்பிட்ட உணவை விரைவாக ஜீரணிக்கும். கழிவுகளை அடிக்கடி வெளியேற்றிக் கொண்டே இருக்கும் என்றான்.
ராமன் குறுக்கிட்டான்.எங்க ஊர்ல ஒரு பாழடைந்த கட்டிடத்திற்கு சென்று பார்த்தோம். கட்டிட மேற்கூரையின் அடிப்பகுதியை வௌவால்கள் தனது கால்களால் இறுகப்பற்றிக் கொண்டு தலைகீழாக தொங்கிக் கொண்டு இருந்தன. கூட்டமாக காணப்படும் இவைகள் பகலில் தூங்கி ஓய்வெடுக்கும். உலகமே உறங்கி ஓய்வெடுக்கும் ராத்திரியில் உணவு உள்ளிட்ட தனது தேவைகளுக்காக வெளில வரும்.நாள் பூரா தலைகீழா தொங்கினாலும் ரெக்கையால் தனது உடலை மூடி கொள்வதால் சோர்வடையாதாம். பகல் பொழுதில் வெளில வந்தா வல்லூறு,ப பூனை, பாம்பு போன்ற மிருகங்களுக்கு இரையாக நேரிட்டு வௌவால் இனமே அழிந்து போகும் அபாயம் ஏற்படுமாம்.. அதனாலதான் வௌவால்களை பாதுகாக்க மறைந்து வாழும் உயிரினமாக இயற்கை படைத்துள்ளது என்று பெரியவர் ஒருத்தர் சொன்னபோது ஆச்சரியமாக இருந்தது என்றான்.
இரவில் அலையும் சாத்தான்.
ஒரு மாணவன் எழுந்தான். வௌவால்கள் வீட்டிற்குள் வந்தால் அபச குணம்னு சொல்றாங்களே உண்மையா என்றான். சந்திரன் தொடர்ந்தான். கருத்தமேனியோடு அறுவெறுக்கத்தக்க தோற்றத்துடன் நோயுண்டாக்கும் வைரஸ்களை தன்னுள் கொண்டு ராத்திரியில் அலைந்து திரிவதால் இரவில் அலையும் சாத்தான் என்ற பெயருண்டு. மற்றபடி அபசகுணம் என்பது மூடநம்பிக்கை என்றான். மற்றொரு மாணவன் ராத்திரியில இதுகளுக்கு கண்ணு எப்படி தெரியும்..னான். டார்ச் லைட்ட கைல கொண்டு போகுமாக்கும் என்றான் யாரோ ஒருவன். சிரிப்பொலி வகுப்பறை முழுவதும் பரவியது. அதுவரை பின்னால் அமர்ந்திருந்த ஆசிரியர் முன்னால் தோன்றி, மாணவர்கள் ராமனையும் சந்திரனை பாராட்டியதோடு தொடர்ந்து பேச ஆரம்பித்தார்.
இரவில் இயங்கும் வௌவால்கள் கண்ணொளியை விட குரலொலியை பெரிதும் நம்பி வாழும்.அதாவது மனிதனால் கேட்க இயலாத (மீயோலி) சிறு சிறு துடிப்பலைகளாக குரல் எழுப்பி அவை எதிரில் தென்படும் பொருட்களின்மீது பட்டு எதிரொலிப்பதை (கால இடைவெளி, தூர இடைவெளி அடிப்படையில்) கேட்டுணர்ந்து பறந்து செல்வது இதன் தனிச்சிறப்பு.
வௌவால்களால் பயன்படுத்தப்பட்டு வரும் இந்த செயல்நுட்பம் தான் ராணுவம், மருத்துவம், தொழில்துறையில் தொலைகண்டுணர்வியாக (ரேடார் கருவியாக) பயன்படுத்தப்படுகிறது.
சூழ்நிலைமண்டலத்துக்கு வௌவால்கள் அவசியமா?
வௌவால்களை மூன்று வகையாக பிரித்துள்ளனர். முதல் வகை உருவத்தில் பெரியது. பழங்களையும், பூக்களையும் சாப்பிட்டு, விதையை தூவுதல், மகரந்த சேர்க்கை என தாவர பெருக்கத்திற்கு உதவுகிறது.
இரண்டாம் வகை உருவத்தில் சிறியது. வண்டு, வெட்டுக்கிளி என விவசாயத்திற்கு தீங்கு செய்யும் பூச்சி இனங்களை, தனது உணவுக்காக வேட்டையாடி அதன் பெருக்கத்தை கட்டுப்படுத்துகிறது. ஒரு வௌவால் சுமார் 600முதல் 1000 கொசுக்களை கொன்றழிக்கும். அது மட்டுமல்லாது வாய் வழியாகவே உணவு உண்டு வாய் வழியாகவே கழிவை வெளியேற்றும் வௌவாலின் (மாணவர்கள் முகம் சுழிப்பதைக் காண முடிந்தது. கழிவுகள் புரதச்சத்து மிகுந்த இயற்கை உரம்.
மூன்றாம் வகை ரத்தத்தை உறிஞ்சி குடிக்கும் இரத்த காட்டேரிகள். நம்ம நாட்டுல கிடையாது.பிற உயிரினங்களுக்கு ஊறு விளைவிக்கும் இந்த வௌவால்களின் உடலிலிருந்து இரத்தம் உறைதலில் தடைசெய்யும் பொருளை பிரித்தெடுத்து மனிதர்களின் இதய நோய்க்கு மருந்தாக பயன்படுத்துகின்றனர். இவ்வாறாக வௌவால்கள் சூழ்நிலை மண்டலத்திற்கு உதவுகிறது.
மறைந்து வாழும் உயிரினம்:
பூமி உயிர்கோளமாக இருக்க ஒவ்வொரு உயிரினமும் அவசியமென்பதால்தான் வௌவால் இனம் அழியாமல் பாதுகாக்க மாறுபட்ட இயல்புகளோடு மறைந்து வாழும் உயிரினமாக இயற்கை படைத்துள்ளது. அதுபோல மாணவர்கள் ஒவ்வொருவரும் தனித்தனி திறமைகளோடு படைக்கப்பட்டுள்ளீர்கள். (எல்லோருக்கும் ஒன்று போல் திறமை இருக்காது). அத்திறன்களை வளர்த்து இச்சமூகத்திற்கு கடமையாற்றிட வேண்டும் என்பதே விசித்திர வௌவால்கள் உணர்த்தும் பாடமாகும் என்று ஆசிரியர் நிறைவு செய்தார்.

கே.ஆர்.இரமேஷ்,
முதுகலை விலங்கியல் ஆசிரியர்,