சேர்பியாவில் பதவி விலகும் அதிபர் வுசிச்! தொடரும் மாணவர் போராட்டத்தின் விளைவா ?…. ஐங்கரன் விக்கினேஸ்வரா

ஐரோப்பாவின் பால்கன் (Balkan) பிராந்தியத்தில் அமைந்துள்ள சேர்பியா (Serbia) கடந்த சில ஆண்டுகளாக அரசியல் பதற்றம், மக்கள் போராட்டங்கள் மற்றும் ஜனநாயக விவாதங்களின் மையமாக இருந்து வருகிறது. இந்த நிலையில், சேர்பிய அதிபர் அலெக்சாண்டர் வுசிச் (Aleksandar Vučić) தனது பதவியை இன்னும் சில வாரங்களில் ராஜினாமா செய்வதாக அறிவித்திருப்பது, அந்த நாட்டின் அரசியலில் மட்டுமல்லாது ஐரோப்பிய அரசியல் சூழலிலும் முக்கியமான மாற்றமாகக் கருதப்படுகிறது. இந்த அறிவிப்பு, சுமார் ஒன்றரை ஆண்டுகளாக நீடித்து வந்த மக்கள் எதிர்ப்பு போராட்டங்களின் பின்னணியில் வெளியாகியுள்ளது.

அலெக்சாண்டர் வுசிச் 2014 முதல் சேர்பியாவின் அரசியல் அதிகாரத்தின் மையமாக இருந்து வருகிறார். முதலில் பிரதமராகவும், பின்னர் 2017 முதல் அதிபராகவும் பதவி வகித்த அவர், SNS (Serbian Progressive Party) கட்சியின் தலைவராக நாட்டின் அரசியலை ஆதிக்கம் செலுத்தி வந்தார்.

அவரது ஆதரவாளர்கள், பொருளாதார வளர்ச்சி, வெளிநாட்டு முதலீடுகளை ஈர்த்தல் மற்றும் தேசிய ஸ்திரத்தன்மையைப் பேணிய தலைவராக அவரைப் பாராட்டுகின்றனர். அதேவேளை, எதிர்க்கட்சிகள் மற்றும் மனித உரிமை அமைப்புகள், ஊடக சுதந்திரத்தை கட்டுப்படுத்தியதோடு அதிகாரத்தை ஒரே மையத்தில் குவித்ததாகவும், ஜனநாயக அமைப்புகளை பலவீனப்படுத்தியதாகவும் குற்றம்சாட்டி வருகின்றன.

2024 ஆம் ஆண்டு சேர்பியாவின் நோவி சாட் நகரில் புதுப்பிக்கப்பட்ட தொடருந்து நிலையத்தின் கூரை இடிந்து விழுந்ததில் 16 பேர் உயிரிழந்தனர். இந்த விபத்து நாடு முழுவதும் அதிர்ச்சியை ஏற்படுத்தியது. ஆனாலும் பொதுமக்கள், இது ஒரு சாதாரண விபத்து அல்ல; அரசின் அலட்சியம், ஊழல் மற்றும் தரமற்ற கட்டுமானத்தின் விளைவு என்று குற்றஞ்சாட்டினர். இதனைத் தொடர்ந்து மாணவர்கள் தலைமையில் ஆரம்பமான போராட்டங்கள் பின்னர் ஆசிரியர்கள், தொழிலாளர்கள், சட்டத்தரணிகள், சமூக ஆர்வலர்கள் என பல்வேறு தரப்பினரின் ஆதரவுடன் நாடு முழுவதும் பரவின.

அதிபர் வுசிசின் தற்போதைய பதவிக்காலம் 2027 வரை நீடிக்க வேண்டியிருந்தது. இருப்பினும் அவர், அதற்கு ஒரு ஆண்டுக்கு முன்பே பதவி விலகத் தயாராக இருப்பதாக அறிவித்துள்ளார். அதே நேரத்தில், முன்கூட்டிய அதிபர் மற்றும் நாடாளுமன்றத் தேர்தல்களை நடத்தவும் அவர் முன்மொழிந்துள்ளார்.

அரசியல் ஆய்வாளர்களின் கருத்துப்படி, இது முழுமையான அரசியல் விலகல் அல்ல. மாறாக, பிரதமர் பதவிக்கு போட்டியிட்டு மீண்டும் அரசின் செயற்பாட்டு அதிகாரத்தைத் தக்கவைத்துக் கொள்ளும் அரசியல் உத்தியின் ஒரு பகுதியாக இருக்கலாம் என்று அவர்கள் கருதுகின்றனர்.

போராட்டக்காரர்களின் முக்கிய கோரிக்கைகளை அரசுக்கு முன்வைத்துள்ளனர். அரசு ஊழலுக்கு முழுமையான விசாரண, நீதித்துறையின் சுயாதீனம், ஊடக சுதந்திரம்,வெளிப்படையான மற்றும் நியாயமான தேர்தல்கள், அதிகார துஷ்பிரயோகத்திற்கு முற்றுப்புள்ளி போன்ற கோரிக்கைகளை முன்வைத்துள்ளனர்.

ஆனாலும் வுசிச் அரசு இந்த குற்றச்சாட்டுகளை தொடர்ந்து மறுத்து வருகிறது. போராட்டங்களின் பின்னணியில் வெளிநாட்டு அரசியல் செல்வாக்கு இருப்பதாகவும் அவர் கூறியுள்ளார். ஆனால் போராட்டக்காரர்கள் தங்களது இயக்கம் முழுமையாக உள்நாட்டு ஜனநாயகக் கோரிக்கைகளை அடிப்படையாகக் கொண்டது என வலியுறுத்துகின்றனர்.

2024 ஆம் ஆண்டின் இறுதியிலிருந்து தொடங்கி 2025 மற்றும் 2026 ஆம் ஆண்டுகளிலும் தொடர்ந்த சேர்பிய மாணவர் போராட்டங்கள், நாட்டின் சமீபத்திய அரசியல் வரலாற்றில் மிகப்பெரிய மக்கள் எழுச்சிகளில் ஒன்றாகக் கருதப்படுகின்றன. பல்கலைக்கழக மாணவர்கள் முன்னெடுத்த இந்தப் போராட்டம், ஒரு தனிப்பட்ட விபத்துக்கு எதிரான கோபமாகத் தொடங்கினாலும், பின்னர் ஊழல், அதிகார துஷ்பிரயோகம், சட்டத்தின் ஆட்சி, ஜனநாயக உரிமைகள் மற்றும் அரசின் பொறுப்புக்கூறல் போன்ற பரந்த அரசியல் கேள்விகளை மையமாகக் கொண்ட தேசிய இயக்கமாக மாறியது.

2024 நவம்பர் மாதம், நோவி சாட் பகுதியில் உள்ள ரயில் நிலையத்தின் மேற்கூரை இடிந்து விழுந்ததில் பலர் உயிரிழந்தனர். இந்த விபத்து நாடு முழுவதும் பெரும் அதிர்ச்சியை ஏற்படுத்தியது. புதியதாகப் புதுப்பிக்கப்பட்ட நிலையத்தில் ஏற்பட்ட இந்த விபத்து, கட்டுமானத் தரமின்மை மற்றும் அரசாங்க ஊழலின் விளைவு என்ற குற்றச்சாட்டுகள் எழுந்தன.

மாணவர்கள், இது வெறும் விபத்து அல்ல; பொறுப்பற்ற ஆட்சியின் விளைவு என்று வலியுறுத்தினர். சம்பவத்திற்குப் பொறுப்பான அதிகாரிகள் மீது நடவடிக்கை எடுக்க வேண்டும், அனைத்து ஒப்பந்தங்களும் வெளிப்படையாக வெளியிடப்பட வேண்டும், மேலும் உண்மையான விசாரணை நடத்தப்பட வேண்டும் என்ற கோரிக்கைகள் வலுப்பெற்றன.

சேர்பிய இளைஞர்களிடையே பல ஆண்டுகளாகவே அரசியல் அமைப்பின் மீதான அதிருப்தி நிலவி வந்தது. வேலைவாய்ப்பு பற்றாக்குறை, ஊழல், அரசியல் தலையீடு, ஊடகச் சுதந்திரக் குறைபாடு மற்றும் நீதித்துறையின் சுயாதீனத்தன்மை குறித்த சந்தேகங்கள் ஆகியவை இளைஞர்களின் எதிர்கால நம்பிக்கையை பாதித்தன. இந்தப் பின்னணியில், ரயில் நிலைய விபத்து ஒரு திருப்புமுனையாக அமைந்தது. மாணவர்கள் பல்கலைக்கழக வளாகங்களில் கூட்டங்களை நடத்தி, வகுப்புகளைப் புறக்கணித்து, அமைதிப் பேரணிகளை ஏற்பாடு செய்தனர். பின்னர் இந்த இயக்கம் ஆசிரியர்கள், வழக்கறிஞர்கள், தொழிற்சங்கங்கள், விவசாயிகள் மற்றும் பொதுமக்களின் ஆதரவையும் பெற்றது.

மாணவர்கள் முன்வைத்த கோரிக்கைகள் வெறும் அரசியல் மாற்றத்திற்காக மட்டுமல்ல; நல்லாட்சியை வலியுறுத்துவதாகவும் இருந்தன. ரயில் நிலைய விபத்து தொடர்பான அனைத்து ஆவணங்களையும் வெளியிட வேண்டும். விபத்துக்குப் பொறுப்பான அதிகாரிகள் மற்றும் ஒப்பந்தக்காரர்கள் மீது சட்ட நடவடிக்கை எடுக்க வேண்டும். நீதித்துறையின் சுயாதீனத்தை உறுதி செய்ய வேண்டும். சேர்பிய நாட்டில் ஊழலை ஒழிக்க வேண்டும். முழுமையான ஊடகச் சுதந்திரத்தை பாதுகாக்க வேண்டும். ஜனநாயக நிறுவனங்களை வலுப்படுத்த வேண்டும் போன்ற கோரிக்கைகளை முன்வைத்து மாணவர்கள் போராட்டம் நடத்தினர்.

சேர்பியா, ஐரோப்பிய ஒன்றிய உறுப்பினராக இணைய விரும்பும் நாடாக இருந்தாலும், அதன் வெளிநாட்டு கொள்கை தனித்துவமான சமநிலையைப் பின்பற்றுகிறது. ஒருபுறம், ஐரோப்பிய ஒன்றியத்துடன் இணைவதற்கான பேச்சுவார்த்தைகளை முன்னெடுத்தாலும், மறுபுறம் ரஷ்யா , சீனா ஆகிய நாடுகளுடன் நெருக்கமான அரசியல் மற்றும் பொருளாதார உறவுகளையும் பேணி வருகிறது.

இதனால், செர்பியாவின் உள்நாட்டு அரசியல் மாற்றங்கள் ஐரோப்பிய ஒன்றியம் மட்டுமல்லாது ரஷ்யா மற்றும் சீனாவின் பிராந்திய நலன்களுக்கும் தாக்கத்தை ஏற்படுத்தக்கூடும். பல அரசியல் விமர்சகர்கள், வுசிசின் ராஜினாமா அறிவிப்பை ஜனநாயகத்திற்கான தன்னார்வ முடிவாக அல்லாமல், அரசியல் அதிகாரத்தை வேறு வடிவில் தொடர்வதற்கான திட்டமிடப்பட்ட நடவடிக்கையாகவே பார்க்கின்றனர்.

சேர்பிய அரசியலமைப்பின்படி, ஒரே நபர் தொடர்ந்து மூன்றாவது முறையாக அதிபராக போட்டியிட முடியாது. எனவே, பிரதமர் பதவிக்கு மாறுவதன் மூலம் தனது அரசியல் செல்வாக்கைத் தொடர முயற்சிக்கலாம் என்ற கருத்து பரவலாக பேசப்படுகிறது.

இந்த ராஜினாமா அறிவிப்பைத் தொடர்ந்து நடைபெறவுள்ள முன்கூட்டிய தேர்தல்கள், கடந்த ஒரு தசாப்தமாக சேர்பிய அரசியலை வழிநடத்திய வுசிசின் அரசியல் எதிர்காலத்தைத் தீர்மானிக்கும்.

தற்போது நடக்கவிருக்கும் இந்தத் தேர்தல், ஆளும் கட்சியின் ஆதரவை மீண்டும் உறுதிப்படுத்துமா என்பது கேள்விக்குறியாக இருக்கிறது. அதேசமயம் பொது மக்கள் போராட்டங்களுக்கு அரசியல் வெற்றி கிடைக்குமா என்பதும் சந்தேகமே. அதேவேளை புதிய தலைமுறை அரசியல் சக்திகள் உருவாகுமா என்பதை பொறுத்திருந்துதான் பார்க்கவேண்டும். மேலும் சேர்பியா ஐரோப்பிய ஒன்றியத்தை நோக்கி மேலும் நகருமா என்ற கேள்வியும் எழுந்துள்ளது. இப்படியான பல கேள்விகளுக்குப் பதில் அளிக்கும் முக்கிய நிகழ்வாக இருக்கும்.

பால்கன் பிராந்தியம் வரலாற்று ரீதியாக அரசியல் மற்றும் இன மோதல்களின் மையமாக இருந்து வந்துள்ளது. எனவே செர்பியாவில் ஏற்படும் எந்தவொரு பெரிய அரசியல் மாற்றமும் அண்டை நாடுகளான போஷ்னியா (Bosnia and Herzegovina,) கோசாவா ( Kosovo )மற்றும் மொன்டநீகரோ (Montenegro) ஆகியவற்றுடனான உறவுகளிலும் தாக்கத்தை ஏற்படுத்தக்கூடும். மேலும், ஐரோப்பிய ஒன்றியம், நேட்டோ மற்றும் ரஷ்யா ஆகியவற்றின் பிராந்திய செல்வாக்கு போட்டியிலும் இந்த மாற்றம் முக்கிய இடத்தைப் பெறும்.

அலெக்சாண்டர் வுசிசின் ராஜினாமா அறிவிப்பு, ஒரு தலைவரின் தனிப்பட்ட அரசியல் முடிவாக மட்டும் பார்க்கப்பட முடியாது. அது, மக்கள் போராட்டங்களின் தாக்கம், ஜனநாயகத்தின் எதிர்காலம், அதிகார அரசியலின் மாற்றம் மற்றும் ஐரோப்பிய அரசியல் சமநிலையின் புதிய அத்தியாயம் ஆகிய அனைத்தையும் உள்ளடக்கிய வரலாற்றுச் சம்பவமாகும்.

அவர் உண்மையில் அரசியலிலிருந்து விலகுகிறாரா அல்லது பிரதமர் பதவியின் மூலம் மீண்டும் அதிகார மையத்திற்குத் திரும்புகிறாரா என்பது வரவிருக்கும் தேர்தல்களின் மூலம் தெளிவாகும். ஆனால் ஒரு விஷயம் மட்டும் உறுதி. சேர்பியாவில் கடந்த ஒன்றரை ஆண்டுகளாக எழுந்த மக்கள் குரல், அந்த நாட்டின் அரசியல் வரலாற்றில் அழியாத தடத்தை ஏற்படுத்தியுள்ளது.