திலீபனின் சிலை யாழ். நீதிமன்றத்தின் காவலில் 

நல்லூரில் உள்ள தியாக தீபம் திலீபனின் பிரதான நினைவுத் தூபியில் இருந்து அகற்றப்பட்ட தியாக தீபம் திலீபனின் சிலை பொலிஸாரால் யாழ்ப்பாணம் நீதிவான் நீதிமன்றத்தில் நேற்று திங்கட்கிழமை  பாரப்படுத்தப்பட்டது.

நல்லூரில் நினைவேந்தலுக்காக வைக்கப்பட்ட தியாக தீபம் திலீபனின் சிலை கடந்த 27ம் திகதி பொலிஸாரால் வலுக்கட்டாயமாக அகற்றப்பட்டு, பொலிஸ் நிலையம் கொண்டு செல்லப்பட்டது.

இந்த விடயம் தொடர்பில் வழக்கு தாக்கல் செய்த யாழ் மாவட்ட குற்றத்தடுப்பு பொலிஸார், சிலையை நீதிமன்றத்தில் பாரப்படுத்துவதற்கான அனுமதியை கோரிய போதும் அதற்கான அனுமதியை நீதிமன்றம் வழங்க மறுத்திருந்தது. குறிப்பாக,இந்தச்  சிலை வழக்கில் எந்த ஒரு சந்தேக நபர்களின் பெயரும் குறிப்பிடப்படாததையடுத்தே சிலையை பொறுப்பேற்க நீதிமன்றம் மறுத்திருந்தது. மேலும் சிலை தொடர்பான வழக்கை அடுத்த ஜனவரி மாதத்திற்கு நீதிமன்றம் ஒத்துவைத்தது.

இந்நிலையில் யாழ்.பொலிஸ் நிலையத்தில் கடந்த 8 நாட்களாக வைக்கப்பட்டிருந்த திலீபனின் சிலை நேற்று  யாழ்ப்பாணம் நீதிவான் நீதிமன்றத்தில் பாரப்படுத்தப்பட்டது.

பொலிஸ் நிலையத்தில் இருந்து வெள்ளைத் துணியால் மூடிக்கட்டப்பட நிலையில், பொலிஸ் வாகனத்தில் ஏற்றிவரப்பட்ட  திலீபனின் சிலை நீதிமன்ற வளாகத்திற்குள் கொண்டு செல்லப்பட்டு நீதிமன்ற கட்டுக்காவலுக்காக ஒப்படைக்கப்பட்டது.