தமிழக தேர்தலும் சினிமா அரசியலும்…  ஐங்கரன் விக்கினேஸ்வரா

(கடந்த 25 ஆண்டுகளில் திமுக மற்றும் அதிமுக ஆகிய இரண்டு கட்சிகளுமே, இந்தியாவில் மிகக் குறைந்த வறுமை விகிதத்தைக் கொண்ட மாநிலமாகத் தமிழ்நாட்டை மாற்றிய பொருளாதார நவீனமயமாக்கலுக்கு வலுவான நிர்வாகத் தொடர்ச்சியை வழங்குவதில் முக்கியப் பங்காற்றியுள்ளன என்பதை மறுக்க முடியாது. மேலும், இந்தியாவிலேயே அதிக நகரமயமாக்கப்பட்ட மாநிலமாகவும் தமிழ்நாடு திகழ்கிறது. உண்மையில் தமிழ்நாட்டின் வளர்ச்சிக்கு திமுக அரசு உறுதுணையாக இருந்தது என்பதை மறுக்க முடியாது)

நடந்த முடிந்த தமிழக தேர்தல் முடிவுகளைத் வெறுமனே தனித்துப் பார்க்கக்கூடாது. அதை நேபாளம் மற்றும் இலங்கையின் பின்னணியில் பார்க்க வேண்டும். இந்த மூன்று நிகழ்வுகளிலும், இளைஞர்களின் வாக்குகள் நீண்டகாலமாக இருந்துவந்த அரசியல் கட்டமைப்பை முற்றிலுமாக மாற்றியமைத்தன.

இந்த தேர்தல் களங்களில் கருத்துக்களை உருவாக்குவதிலும் மாற்றுவதிலும் சமூக ஊடகங்கள் பெரும் பங்கு வகித்துள்ளன. அதேசமயம் மரபுசார் ஊடகங்கள் பழைய பாணியிலான கொள்கை சார்ந்த விவாதங்களையே கடைப்பிடித்தன. இருப்பினும், இந்த மூன்று நாடுகளின் தேர்தல் முடிவுகள், மாற்றத்திற்காக வாக்களித்த இளைஞர்களிடையே நம்பிக்கையைப் பிரதிபலித்தன.

நேபாளம் மற்றும் இலங்கையை ஒரு உதாரணமாகக் கொண்டால், பழைய தலைமுறையினரின் வெளியேற்றம் என்பது கட்டாயம் ஒரு நடக்க வேண்டிய விஷயம் தான் என்று மக்களால் தீர்மானிக்கப்பட்டு வாக்களித்துள்ளதை வெளிப்படையாக காணலாம்.

தமிழக அரசியலில் விஜய் அலை:

தமிழக அரசியல் பல தசாப்தங்களாக இரண்டு பெரிய திராவிட கட்சிகளே மையமாகவே இயங்கிக் கொண்டிருக்கின்றன. ஆனால் சமீப காலங்களில், இந்த நிலையை சவால் செய்யும் புதிய அரசியல் சக்திகள் உருவாகும் சூழல் உருவாகியுள்ளது. அந்த வகையில், நடிகர் விஜய் அரசியலுக்குள் நுழைந்ததன் பின்னர் விஜய் அலை என்ற சொல்லாக்கம் அரசியல் மற்றும் சமூக வட்டாரங்களில் பரவலாக பேசப்பட்டது.

விஜய், வெறும் நடிகராக மட்டுமல்லாமல், தனது திரைப்படங்கள் மற்றும் பொதுக்கூட்டங்களின் மூலம் சமூக பிரச்சினைகள் குறித்து கருத்து தெரிவித்து வந்தவர். குறிப்பாக இளைஞர்களிடம் அவருக்கு உள்ள செல்வாக்கு மிக அதிகம். இதன் காரணமாகவே, அவர் அரசியல் கட்சியைத் தொடங்கியதும், ஒரு புதிய எதிர்பார்ப்பு உருவானது. ரசிகர் மன்றங்களை அரசியல் அமைப்பாக மாற்றும் முயற்சி, விஜய் அலை உருவாக முக்கிய காரணமாகக் கூறப்படுகிறது.

இந்த அலைக்கு முக்கிய ஆதாரம் இளைஞர்கள் மற்றும் முதல் முறையாக வாக்களிக்க வருபவர்கள். அவர்கள் பாரம்பரிய அரசியல் கட்சிகளின் மீது கொண்டுள்ள அதிருப்தி, மாற்றத்திற்கான ஆவல் ஆகியவை விஜய்க்கு சாதகமாக அமைந்துள்ளது. அதுவே தேர்தலின் வெற்றிப் போக்கையும் தீர்மானித்துள்ளது. மேலும், சமூக ஊடகங்களில் விஜயின் ஆதரவு பெரிதாக இருப்பதும், இந்த அலை வேகமாக பரவ உதவியதை மறுக்க முடியாது.

தமிழக அரசியலில் சினிமா:

தமிழக அரசியலில் சினிமாவின் தாக்கம் என்பது இந்திய அரசியல் வரலாற்றிலேயே தனித்துவமான ஒரு நிகழ்வாகும். சினிமா என்பது வெறும் பொழுதுபோக்கு ஊடகம் மட்டுமல்ல, அது சமூக கருத்துகளை உருவாக்கும், அரசியல் சிந்தனைகளை பரப்பும், மற்றும் பொதுமக்களின் மனநிலையை மாற்றும் சக்தி வாய்ந்த கருவியாக வளர்ந்துள்ளது. குறிப்பாக தமிழகத்தில், சினிமாவும் அரசியலும் ஒன்றோடொன்று பின்னிப் பிணைந்து, அரசியல் கலாச்சாரத்தின் முக்கிய அங்கமாக மாறியுள்ளது.

இந்த தொடர்பின் ஆரம்பத்தைப் புரிந்துகொள்ள, திராவிட இயக்கத்தின் வளர்ச்சியை கவனிக்க வேண்டியது அவசியம். திராவிட இயக்கம் சமூக நீதி, சாதி ஒழிப்பு, மொழி அடையாளம் போன்ற கருத்துகளை முன்னிறுத்திய இயக்கமாகும். இந்த இயக்கத்தின் தலைவர்களில் முக்கியமானவர்கள் சி. என். அண்ணாதுரை மற்றும் எம். கருணாநிதி. இவர்கள் சினிமாவை ஒரு சக்திவாய்ந்த பிரச்சார கருவியாக பயன்படுத்தினர். அண்ணாதுரை எழுதிய திரைக்கதைகள் மற்றும் கருணாநிதியின் வசனங்கள், சமூக மாற்றத்திற்கான கருத்துகளை மக்களிடம் எளிதாக கொண்டு சென்றன. திரைப்படங்கள் மூலம் சாதி எதிர்ப்பு, சமத்துவம், தமிழர் பெருமை போன்ற எண்ணங்கள் பரவலாகப் பரவின.

சினிமா மற்றும் அரசியல் இணைப்பு இவ்வளவு வலுவாக உருவாக காரணம், திரைப்படங்கள் பொதுமக்களிடம் மிகுந்த தாக்கத்தை ஏற்படுத்தும் தன்மை கொண்டது. குறிப்பாக 1950–70களில், எழுத்தறிவு குறைவாக இருந்த காலத்தில், திரைப்படங்கள் மக்களுக்கு ஒரு முக்கிய தகவல் ஊடகமாக இருந்தன. அந்த காலகட்டத்தில், கதாநாயகர்கள் நீதிக்காக போராடும் வீரர்களாகவும், ஏழைகளின் குரலாகவும் காட்டப்பட்டனர். இதன் மூலம் மக்கள் அந்த கதாநாயகர்களை நிஜ வாழ்க்கை தலைவர்களாகக் கருதத் தொடங்கினர்.

இந்த நிலைமையை மிகச் சிறப்பாக பயன்படுத்தியவர் எம். ஜி. இராமச்சந்திரன் (MGR). அவர் நடித்த திரைப்படங்களில், அவர் எப்போதும் ஏழைகளுக்கு உதவும், நேர்மையான, தியாகமான மனிதராகவே காட்டப்பட்டார். இந்த திரைபடப் படிமம், அவரின் அரசியல் வாழ்க்கையில் பெரும் ஆதரவாக அமைந்தது. மக்கள் அவரை ஒரு நடிகராக மட்டுமல்ல, ஒரு நம்பிக்கைக்குரிய தலைவராகக் கண்டனர். இதன் விளைவாக, அவர் தமிழகத்தின் முதல்வராக உயர்ந்தார். இது சினிமா மூலம் உருவான பிரபலத்தைக் கொண்டு அரசியல் அதிகாரத்தை அடைந்த முக்கியமான எடுத்துக்காட்டாகும்.

MGR-க்கு பின்பு, ஜெயலலிதா அரசியலில் மிகப் பெரிய தாக்கத்தை ஏற்படுத்தியவர். அவர் MGR-ன் அரசியல் வாரிசாக மட்டுமல்லாமல், தனிப்பட்ட திறமையாலும், உறுதியாலும் தலைமைத்துவத்தை நிரூபித்தார். அவரின் சினிமா புகழும், பொதுமக்களுடன் கொண்டிருந்த தொடர்பும், அவரை ஒரு வலுவான அரசியல் தலைவராக மாற்றியது. இதனால், சினிமாவில் இருந்து அரசியலுக்கு வரும் பாதை மேலும் உறுதியானது.

இதற்கு பிறகு, பல நடிகர்கள் அரசியலுக்கு வந்துள்ளனர். விஜயகாந்த் தனது “கேப்டன்” என்ற திரைபடப் பெயரால் மக்களிடம் பிரபலமானவர். அவர் அரசியல் கட்சியைத் தொடங்கி, ஒரு முக்கிய எதிர்க்கட்சித் தலைவராக உருவெடுத்தார். அதேபோல், கமல்ஹாசன் அரசியலில் நேரடியாக பங்கேற்று, புதிய தலைமுறையினருக்கு மாற்று அரசியல் சிந்தனைகளை முன்வைத்துள்ளார். ரஜினிகாந்த் அரசியலுக்கு வருவது குறித்து நீண்டகாலமாக விவாதிக்கப்பட்டு வந்தாலும், அவரது ரசிகர் அடிப்படை அரசியல் சக்தியாக பார்க்கப்படுகிறது. மேலும், விஜய் போன்ற இன்றைய நடிகர்களும் எதிர்கால அரசியல் வெற்றியை சாத்தியமாக்கி உள்ளனர்.

தமிழ்நாட்டு அரசியல் பொருளாதரம்:

தற்போதைய தமிழகம் இரண்டு ரில்லியன் அமெரிக்க டாலர் மதிப்புள்ள ஒரு வலுவான பொருளாதாரம் ஆகும்.

இது வாகனத் தொழில், தகவல் தொழில்நுட்பம், ஜவுளி ஏற்றுமதி, ரயில் இன்ஜின் உற்பத்தி மற்றும் நிதிச் சேவைகளின் மையமாகத் திகழ்கிறது.
1970-களில் இந்திரா காந்தி வங்கித் துறையை தேசியமயமாக்காமல் இருந்திருந்தால், தமிழகம் ஆசியாவில் ஒரு பிராந்திய நிதி மையமாக மாறியிருக்கக்கூடும்.

வரலாற்று ரீதியாக 1800-களின் முற்பகுதியில், தமிழக வங்கியாளர்கள்தான் காலனித்துவ இலங்கை, பர்மா மற்றும் மலாயாவில் ஒரு அதிநவீன முறைசாரா வங்கி வலையமைப்பை அறிமுகப்படுத்தினர். இது ஈயச் சுரங்கங்கள், இரப்பர் தோட்டங்கள், கிராஃபைட் சுரங்கங்கள், தேயிலைத் தோட்டங்கள் மற்றும் சில்லறை வர்த்தகம் ஆகியவற்றில் உள்நாட்டு முதலீடுகளைச் சாத்தியமாக்கியது.

இவ்வாறு வளர்ச்சி அடைந்த தமிழ் நாட்டில் அரசியல் நிலைப்பாடு திடமாகவே இருந்து வந்துள்ளது. கடந்த 25 ஆண்டுகளில் திமுக மற்றும் அதிமுக ஆகிய இரண்டு கட்சிகளுமே, இந்தியாவில் மிகக் குறைந்த வறுமை விகிதத்தைக் கொண்ட மாநிலமாகத் தமிழ்நாட்டை மாற்றிய பொருளாதார நவீனமயமாக்கலுக்கு வலுவான நிர்வாகத் தொடர்ச்சியை வழங்குவதில் முக்கியப் பங்காற்றியுள்ளன என்பதை மறுக்க முடியாது. மேலும், இந்தியாவிலேயே அதிக நகரமயமாக்கப்பட்ட மாநிலமாகவும் தமிழ்நாடு திகழ்கிறது. உண்மையில் இந்த வளர்ச்சிக்கு திமுக இந்தச் சூழலுக்கு ஏற்ப தன்னை உயர்த்திக் கொண்டு செயல்பட்டது.

விஜயின் வெற்றிக்கு பின்னர், தமிழக ஆட்சியின் எதிர்காலத்தைத் தேசியக் கட்சிகள் எவ்வாறு வடிவமைக்கும் என்று உறுதியாகத் தெரியவில்லை. பீகார் மாநிலத் தேர்தல்களின் தொடக்கத்தில், காங்கிரஸ் தேஜஸ்வி யாதவின் செல்வாக்கைக் குறைத்தது. மேற்கு வங்க மாநிலத் தேர்தலில், ராகுல் காந்தி வேண்டும் என்றே மம்தா பானர்ஜியின் செல்வாக்கைக் குறைத்தார். தமிழ்நாடு மாநிலத் தேர்தலில், அவர் திமுக ஸ்டாலினுடன் இணைந்து பிரச்சாரம் செய்ய முதலில் மறுத்துவிட்டார். ஹரியானாவில், அவர் ஆம் ஆத்மி கட்சிக்கு இடமளிக்க மறுத்துவிட்டார்.

ஆனாலும் கேரளா, ஆந்திரா மற்றும் கர்நாடகாவில் காங்கிரஸ் வெற்றி பெற்றிருந்தாலும், டெல்லியில் தனியாக ஆட்சியைப் பிடிக்க முடியும் என்று ஒருபோதும் நம்ப முடியாது. அது நம்பகமான கூட்டணிகளை உருவாக்குவது மட்டுமல்லாமல், அவற்றை நிலைநிறுத்தவும் வேண்டும்.

மத்தியிலும்- மாநிலத்திலும் வேறுபட்ட அரசியல் சூழ்நிலை நிலவுகிறது. என்னவாயினும் தமிழகத்தில் சினிமா மற்றும் அரசியல் இணைப்பு, சமூக மாற்றத்தின் ஒரு முக்கிய கருவியாகவும், அரசியல் வளர்ச்சியின் ஒரு தனித்துவமான அம்சமாகவும் விளங்குவதை தற்போதய தேர்தலும் வெளிப்படுத்தி இருக்கிறது. இது மக்கள் மனநிலையை மாற்றும் சக்தியை கொண்டதோடு, அரசியல் தலைமைத்துவத்தை உருவாக்கும் ஒரு வழியாகவும் உள்ளது. அதே நேரத்தில், இது ஜனநாயகத்தின் தரம் குறித்து கேள்விகளை எழுப்பும் ஒரு பிரச்சினையாகவும் உள்ளது. எனவே, சினிமாவின் தாக்கத்தை புரிந்துகொண்டு, அதனை சீராக பயன்படுத்துவது தமிழக அரசியலின் எதிர்கால வளர்ச்சிக்கு முக்கியமானதாகும்.