வளைகுடாவில் அணு ஆயுத தாக்குதல் சாத்தியமா ?…  ஈரான் போர் கட்டுப்பாட்டை மீறிச் செல்கிறதா ?….  ஐங்கரன் விக்கினேஸ்வரா

இஸ்ரேல், அமெரிக்கா மற்றும் ஈரான் இடையேயான போர் ஏற்கனவே உள்நாட்டிலும், பிராந்திய அளவிலும், உலக அளவிலும் பல உயிரிழப்புகளை ஏற்படுத்தியுள்ளது. அணு ஆயுதங்களின் பயன்பாடு, குறிப்பாக ஈரானில், உயிரிழப்புகளின் எண்ணிக்கையை பல மடங்கு அதிகரிக்கும். தற்போதைக்கு, அணு ஆயுதப் போருக்கான சாத்தியக்கூறுகள் நேரடியாக இல்லை.

ஆனால் ஈரான் மீதான அமெரிக்காவின் தாக்குதல் திட்டம் எதிர்பார்த்தபடி வெற்றிபெறவில்லை என்பதையும், அது ஒரு மிகப்பெரிய தவறு என்றும் பல ஐரோப்பிய நாடுகளின் தலைவர்கள் விமர்சித்துள்ளனர். இந்தப் போரில் உண்மையான அணுசக்தி ஆபத்து யாரால் இருக்கலாம் என்பதே தற்போதைய கேள்வியாக உள்ளது. ஏனெனில் இஸ்ரேலிய உளவு அமைப்பு தனது எச்சரிக்கை ஒன்றை விடுத்துள்ளது.

ஈரான் போரை வெற்றிகரமாக முடிவுக்கு கொண்டுவர அணு ஆயுதத்தைப் பயன்படுத்த இஸ்ரேல் பரிசீலிக்கலாம் என்றும் கூறப்படுகிறது. ஏனெனில் ஈரான் அணு ஆயுதங்களை பயன்படுத்தி தாக்குதல் நடத்த முதல், இஸ்ரேல் தயாராக உள்ளதாக கூறப்படுகிறது.

ஈரான் போர் கட்டுப்பாட்டை மீறிச் சென்றால், இஸ்ரேல் அணுசக்தி விருப்பங்களைக் கருத்தில் கொள்ளலாம் என்று டிரம்ப் ஆலோசகர் டேவிட் சாக்ஸ் என்பவர் எச்சரித்த கருத்துகளை அண்மையில் தெரிவித்துள்ளார்.

தற்போது ஈரான் மற்றும் இஸ்ரேல்-அமெரிக்கா இடையே போர் தீவிரமடைந்து வரும் நிலையில், சர்வதேச அணுசக்தி ஆயுதப் பரவல் தடை ஒப்பந்தத்தில் (NPT) இருந்து விலகுவதற்கான அவசர சட்டமூலத்தை ஈரான் நாடாளுமன்ற உறுப்பினர்கள் முன்மொழிந்துள்ளனர்.

கடந்த பெப்ரவரி 28 முதல் ஈரான் மீது நடத்தப்பட்டு வரும் வான்வழித் தாக்குதல்கள் மற்றும் அணுசக்தி நிலையங்கள் குறிவைக்கப் படுவதற்குப் பதிலடியாக இந்த அதிரடி முடிவு எடுக்கப்பட்டுள்ளது.

அணுசக்தி அச்சுறுத்தல் ஈரானால் என்று சொல்லப்பட்டு வந்தாலும், உண்மையில் இந்த பிராந்தியத்தில் இஸ்ரேலிய அணு ஆயுத அச்சுறுத்தல்கள் தொடர்ந்து அதிகரித்து வருகின்றன. ஆனால் இந்த விவகாரத்தில் அமெரிக்க ஒரு போதும் கேள்வி கேட்பது இல்லை.

உலகிற்கு பல ஆண்டுகளாக ஈரானை எதிர்த்து சொல்லப்பட்டு வரும் பிரச்சாரம், அமெரிக்க இஸ்ரேல் மீது ஒரு போதும் குற்றச்சாட்டு வைப்பது இல்லை. இப்போது இந்தப் போர் இந்தப் பிராந்தியத்தை நினைத்துப் பார்க்க முடியாததை நோக்கித் தள்ளக்கூடும் என்று எச்சரிக்கின்றனர்.

இதனால்தான் அமெரிக்க இப்போது ஈரான் போரிலிருந்து “விலகல்” பற்றிப் பேசுகிறது. ஏனென்றால் பெரும் மோதல் நிலையை அடைந்தவுடன் அதனை தடுத்து நிறுத்த முடியாத நிலை ஏற்பட வாய்ப்புள்ளது. கடந்த இரண்டு வாரங்களாக நீடிக்கும் இந்தப் போர், அமெரிக்காவிற்கு மிகப்பெரிய பின்னடைவைத் தந்துள்ளதாகவும், ட்ரம்பின் திட்டங்கள் தோல்வியடைந்து வருவதாகவும் சுட்டிக் காட்டப்பட்டுள்ளது.

ஈரானுடனான மோதல் தீவிரமடைந்தால் இஸ்ரேல் ஒருபோதும் அணு குண்டைப் பயன்படுத்தாது என்று டிரம்ப் தெரிவித்து இருந்தார். அவ்வாறு சொல்வதன் மூலம், அணு ஆயுதங்கள் வைத்திருப்பதை வெளிப்படையாக ஒப்புக்கொள்ளாத இஸ்ரேலின் நீண்டகால கொள்கையை அவர் புறக்கணித்தது மட்டுமல்லாமல், அவர் இஸ்ரேலின் சார்பாகப் பேசுகிறாரா என்ற கேள்வியையும் எழுந்துள்ளது. தற்போது இந்த விவகாரம் சர்வதேச அரங்கில் பெரும் விவாதத்தைக் கிளப்பியுள்ளது.

அதிகமான அரசியல் ஆய்வாளர்கள் இவற்றைப் பற்றி வெளிப்படையாகப் பேசத் தொடங்கியுள்ளனர்.

ஈரானின் நிலத்தடி அணுசக்தி :

ஈரானில் நிலத்தடியில் சேமிக்கப்பட்ட அணுப் பொருட்கள் இருப்பதாக நம்பப்படும் நடன்ஸ் மற்றும் ஃபோர்டோ ஆகிய இரண்டு இடங்களில் அமெரிக்கா அணு ஆயுதத் தாக்குதல் நடத்தி வருகிறது. ஆயினும், ஈரானிய அதிகாரிகள் ஆழமாகத் தோண்டப்பட்ட சுரங்கங்கள் வழியாக இந்தப் பொருட்களை நகர்த்தியிருக்கலாம் என்று கருதப்படுகிறது. அமெரிக்க இராணுவ வட்டாரங்களின்படி, வழக்கமான, மிகப் பெரிய பதுங்குகுழி தகர்ப்பு குண்டுகள் இந்த அமைப்புகளை முழுமையாக அழிக்கும் அளவுக்கு சக்தி வாய்ந்தவை அல்ல என்றும் தெரிவிக்கப்படுகிறது.

டொனால்ட் டிரம்பின் ஆலோசகர்கள் கடந்த ஆண்டு, பூமிக்கு மிக ஆழத்தில் உள்ள ஃபோர்டோவில் இருக்கும் பொருட்களை ஒரு தந்திரோபாய அணு ஆயுதத்தால் மட்டுமே அழிக்க முடியும் என்று கூறினர். கடந்த ஜூன் மாதம், ஈரானுடனான 12 நாள் இஸ்ரேலிய-அமெரிக்கப் போரின்போது, ​​வெள்ளை மாளிகை இந்த அணு ஆயுதத் தேர்வை வெளிப்படையாக நிராகரிக்கவில்லை.

மற்றய முக்கிய விடயம் அமெரிக்கப் பதற்றத்தை அதிகரிக்கும் பொறியாக இஸ்ரேலிய அரசு செயல்படுகிறது.

இங்குள்ள யதார்த்தவாத அரசியல் அறிவியலில் இராணுவப் பதற்றத்தை அதிகரிக்கும் ஏணி என்று இஸ்ரேல் அழைக்கப்படுகிறது.

ஈரானில் வழக்கமான இராணுவ வழிமுறைகள் தீர்ந்துவிடும்போது, ​​பெருகிவரும் பற்றாக்குறையான அல்லது கடினமான இராணுவ இலக்குகளைக் குறிவைத்து நடத்தப்படும் பெரிய அளவிலான குண்டுவீச்சுகள் மட்டுமே எஞ்சியிருக்கும். அதையும் தாண்டி பொதுமக்கள் இலக்குகள் மீதான பெரும் தாக்குதல்கள் நடந்தால் பாரிய அழிவுகளை ஏற்படுத்தும். அதுவே அணு ஆயுதப் போரை நோக்கிய அடுத்த படியாக கருதவேண்டி வரும்.

ஈரான் நீண்ட காலத்திற்கு இந்தப் போரைத் தொடரத் தயாராக இருப்பதாகத் தெரிகிறது. இதனால், உலகப் பொருளாதாரத்திற்கான விளைவுகள் மேலும் மேலும் கடுமையாகின்றன. பெரும் அவமானத்தைச் சந்திக்காமல் இந்த மோதலை எப்படி முடிவுக்குக் கொண்டுவருவது என்று தெரியாத ஒரு சூழ்நிலையில் டிரம்ப் தன்னைக் கண்டுகொள்ளக்கூடும்.

அவர் பெரும்பாலும் சுயமாகவே முடிவெடுப்பதாலும், குறிப்பாகத் தன்னை ஒரு தோல்வியாளராக முத்திரை குத்திவிடும் வகையிலான அவமானங்கள் குறித்து டிரம்ப் கொண்டிருக்கும் உணர்திறனாலும், பதற்றத்தை அதிகரிக்கும் படிநிலையில் அவர் ஒரு தீவிரமான படியைத் தேர்ந்தெடுப்பது சாத்தியமற்றதல்ல.

மேலும் ஈரான் எண்ணெய் விநியோகத்தை முழுமையாக நிறுத்தினால், அழிக்கக்கூடிய இலக்குகளை இஸ்ரேல் முழுவதுமாக தாக்கி அழிக்கும் என்றும் எச்சரிக்கை விடுக்கப்பட்டுள்ளது. அது, ஈரான் மீண்டும் ஒரு தேசமாக கட்டமைக்கப்படுவதை கிட்டத்தட்ட சாத்தியமற்றதாக்கி விடும் என்றும் கூறப்படுகிறது.

இது வெறுமனே ஒரு அணு அச்சுறுத்தல் மட்டுமல்ல, உலக அழிவு சார்ந்த, கடந்த 50 ஆண்டுகளில் மிகவும் வன்முறையான, கொடூரமான ஒரு நாடு அணு ஆயுதத்தை வைத்திருக்க ஈரானை அனுமதிக்க முடியாது என அமெரிக்க அதிபர் டிரம்ப் கூறியுள்ளார்.

ஈரான் அணு ஆயுதங்களைப் பயன்படுத்துவதைக் கருத்தில் கொண்டால், எதிர்காலத்தில் மத்திய கிழக்கு இல்லாமல் போய்விடும். கேள்விக்கே இடமின்றி இஸ்ரேல்தான் முதலில் அழியும் என்று அமெரிக்க அதிபர் டிரம்ப் தெரிவித்துள்ளார். இதனால் இஸ்ரேல் தற்போதய போரை தீவிரப்படுத்தக்கூடும் என்ற சாத்தியக்கூறு குறித்து சில நாட்களுக்கு முன்பு எச்சரித்துள்ளது.

போர் தீவிரமானால் ஒரு கட்டத்தில், ஈரான் இதுவரை பயன்படுத்தாத மிகவும் மேம்பட்ட ஏவுகணைகளை நிலைநிறுத்தக்கூடும். அதே நேரத்தில் இஸ்ரேல் தனது விலையுயர்ந்த தற்காப்பு ஆயுதங்களின் இருப்பைப் பயன்படுத்தக்கூடும். சில நாட்களுக்கு முன்பு, இஸ்ரேல் அமெரிக்காவிடம் இருந்து கூடுதல் ஏவுகணை எதிர்ப்பு அமைப்புகளை அவசரமாகக் கோரியதாக அறிக்கைகள் உள்ளன.

போர் தீவிரமானால் நெதன்யாகு அரசு ஒரு தந்திரோபாய அணு ஆயுதத்தைப் பயன்படுத்தும் என்றும் கூறப்படுகிறது.

மேலும் அமெரிக்கா போரிலிருந்து விலகினால், இஸ்ரேல் இதைத் தன்னை இருப்புக்கே ஆபத்தான சூழ்நிலையில் கண்டுகொள்வதாகக் காட்டிக்கொள்ளக்கூடும். காசாவிலும் தற்போது லெபனான் மற்றும் தெஹ்ரானிலும் தமது படை வலுவை நிரூபிக்க வேண்டிய கட்டாயம் இஸ்ரேலுக்கு ஏற்பட வாய்ப்புள்ளது.