சமஷ்டித் தீர்வே இங்கு அவசியம்; கனேடியத் தூதரிடம் சாணக்கியன்!
நீண்டகால அரசியல் தீர்வாக சமஷ்டி அடிப்படையிலான ஆட்சி அமைப்பு மற்றும் உண்மையான அதிகாரப் பங்கீடு அவசியம் என இலங்கைக்கான கனடா உயர்ஸ்தானிகர் இசபெல் மார்டினிடம் இலங்கை தமிழரசுக் கட்சி பாராளுமன்ற உறுப்பினர் சாணக்கியன் இராசமாணிக்கம் தெரிவித்துள்ளார்.
கொழும்பில் கனடா உயர்ஸ்தானிகரை தனிப்பட்ட முறையில் சந்தித்த போதே சாணக்கியன் எம்.பி இவ்வாறு கூறியுள்ளார்.
இந்த சந்திப்பு தொடர்பில் ஊடகங்களுக்கு கருத்து தெரிவித்துள்ள சாணக்கியன் எம்.பி குறிப்பிட்டுள்ளதாவது,
இந்தச் சந்திப்பின் போது, இலங்கையில் தமிழர்கள் நீண்டகாலமாக எதிர்நோக்கும் அடிப்படை பிரச்சினைகள் குறித்து நான் தெளிவாக முன்வைத்தேன். காணாமல் ஆக்கப்பட்டவர்களின் நீதி, நில அபகரிப்பு, இராணுவ ஆக்கிரமிப்பு, மனித உரிமை மீறல்களுக்கு பொறுப்பேற்பு இல்லாமை போன்ற விடயங்கள் இன்னும் தீர்வு காணப்படாமல் தொடர்வதை நான் சுட்டிக்காட்டினேன்.
மேலும், வடக்கு மற்றும் கிழக்கு மாகாணங்கள் கடுமையான பொருளாதார சவால்களை எதிர்கொண்டு வருகின்றன என்பதையும், வேலைவாய்ப்பு பற்றாக்குறை, முதலீட்டு இல்லாமை, மற்றும் போர் பிந்தைய மறுசீரமைப்பு முழுமையடையாத நிலை ஆகியவை அப்பகுதி மக்களின் வாழ்வாதாரத்தை பாதித்து வருகின்றன என்பதையும் விளக்கினேன்.
இந்த நிலைமையில், தமிழர் மக்களின் நீண்டகால அரசியல் தீர்வாக சமஷ்டி அடிப்படையிலான ஆட்சி அமைப்பு மற்றும் உண்மையான அதிகாரப் பங்கீடு அவசியம் என்பதை நான் வலியுறுத்தினேன்.
அதே நேரத்தில், கனடா போன்ற நாடுகள் பல இன, மொழி மற்றும் பண்பாட்டு பல்வகைமையைக் கொண்ட சமூகங்களில் சமஷ்டி ஆட்சிமுறையின் மூலம் அதிகாரப் பங்கீட்டை வெற்றிகரமாக நடைமுறைப்படுத்தி வருகின்றன என்பதையும், அந்த அனுபவங்கள் இலங்கைக்கு ஒரு முக்கியமான முன்னுதாரணமாக இருக்க முடியும் என்பதையும் நான் குறிப்பிட்டேன்.
எனவே, இலங்கையில் நிலையான அரசியல் தீர்வை எட்டுவதற்காக, நீதி, பொறுப்பேற்பு, பொருளாதார முன்னேற்றம் மற்றும் சமஷ்டி அடிப்படையிலான அதிகாரப் பங்கீடு ஆகியவை ஒன்றிணைந்த முறையில் முன்னெடுக்கப்பட வேண்டியது அவசியம் என்பதை நான் அந்த சந்திப்பில் வலியுறுத்தினேன் என குறிப்பிட்டுள்ளார்.
