மகிந்தவின் வழக்கு தொடர்பில் மார்ச் 19 ஆம் திகதி பரிசீலிப்பு
முன்னாள் ஜனாதிபதி மஹிந்த ராஜபக்சவுக்கு வழங்கப்பட்ட பாதுகாப்புப் படையினரை 60 ஆக குறைப்பதற்கான அரசாங்கத்தின் முடிவுக்கு எதிராக தாக்கல் செய்யப்பட்ட அடிப்படை உரிமைகள் மனுவை மார்ச் 19 ஆம் திகதி பரிசீலிக்க உயர் நீதிமன்றம் உத்தரவிட்டுள்ளது.
இந்த மனு நேற்று வியாழக்கிழமை நீதிபதிகள் பிரீதி பத்மன் சூரசேன, ஜனக் டி சில்வா மற்றும் சம்பத் அபேகோன் ஆகிய மூவர் கொண்ட உயர் நீதிமன்ற அமர்வு முன் விசாரணைக்கு வந்தது.
அப்போது, பிரதிவாதிகள் சார்பில் ஆஜரான மேலதிக சட்டமா அதிபர் வாருனிகா ஹெட்டிகே, இந்த வழக்கு தொடர்பாக பிரதிவாதிகளிடமிருந்து ஆலோசனை பெறுவதற்கு கால அவகாசம் தேவை என்று நீதிமன்றத்தில் தெரிவித்தார்.
மேலும், இந்த வழக்கு தொடர்பாக ஆட்சேபனைகளை தாக்கல் செய்ய தனக்கு அவகாசம் வழங்குமாறும் அவர் நீதிமன்றத்திடம் கோரினார்.
அதன்படி, பிரதிவாதிகள் ஆட்சேபனைகளைத் தாக்கல் செய்ய அனுமதி அளித்த மூன்று நீதிபதிகள் கொண்ட உயர் நீதிமன்ற அமர்வு, தேவைப்பட்டால் மனுதாரர் தரப்பும் ஆட்சேபனைகளைத் தாக்கல் செய்யலாம் என்று கூறியது.
மனு விசாரணைக்கு எடுத்துக்கொள்ளப்பட்டபோது, மனுதாரர் மஹிந்த ராஜபக்ச சார்பில் ஆஜரான ஜனாதிபதி சட்டத்தரணி அலி சப்ரி, நீதிமன்றத்தின் முன் சாட்சியங்களை முன்வைத்து, எந்தவொரு பாதுகாப்பு மதிப்பீடும் இல்லாமல் தனது கட்சிக்காரரின் பாதுகாப்பைக் குறைக்க நடவடிக்கை எடுக்கப்பட்டுள்ளதாக சுட்டிக்காட்டினார்.
முறையான பாதுகாப்பு மதிப்பீட்டிற்குப் பிறகு அவரது பாதுகாப்பைக் குறைப்பதா அல்லது அதிகரிப்பதா என்பது குறித்து முடிவு எடுக்கப்பட வேண்டும் என்று ஜனாதிபதி வழக்கறிஞர் நீதிமன்றத்தில் தெரிவித்தார்.
அதன்படி, முன்வைக்கப்பட்ட உண்மைகளை பரிசீலித்த மூன்று நீதிபதிகள் கொண்ட உயர் நீதிமன்ற அமர்வு, உண்மைகளை உறுதிப்படுத்த தொடர்புடைய மனுவை மார்ச் 19 ஆம் திகதி அழைக்க உத்தரவிட்டது.
