அனோஜன் வழக்கு தொடர்பாக 2ச வூதி சட்ட நிறுவனங்களின் சேவையைப் பெற்றுள்ள அரசு; நால்வர் சட்டக் குழு நாளை சவூதி பயணம்

சவூதி அரேபியாவில் மரண தண்டனை விதிக்கப்பட்டுள்ள இலங்கை பிரஜையான அனோஜன் சிவராசாவின் தண்டனையைக் குறைப்பது அல்லது அவரை விடுவிப்பதற்கான சட்டப்பூர்வ வழிகளை ஆராய்வதற்காக, மேலதிக சொலிசிட்டர் ஜெனரல் அசாத் நவாவி (ஜனாதிபதி சட்டத்தரணி) தலைமையிலான நான்கு பேர் கொண்ட இலங்கையின் சட்டப் பிரதிநிதிகள் குழு நாளை செவ்வாய்க்கிழமை சவூதி அரேபியா புறப்படவுள்ளது.

இந்தக் குழுவில் ஜனாதிபதி சட்டத்தரணிகளான பைஸர் முஸ்தபா மற்றும் உபுல் குமாரப்பெரும, மற்றும் சட்டத்தரணி ஹபீல் பாரிஸ் ஆகியோர் அடங்குவர். இக்குழுவினர், வழக்கைக் கையாளும் இரண்டு சவூதி சட்ட நிறுவனங்களின் பிரதிநிதிகளை புதன்கிழமை (07) சந்தித்து, சவூதி உயர் நீதிமன்றத்தில் தாக்கல் செய்யப்படவுள்ள மேல்முறையீடு குறித்து கலந்துரையாடுவர் என எதிர்பார்க்கப்படுகிறது.

மேல்முறையீட்டுக்குத் தேவையான ஆவணங்களை இறுதி செய்யவும், இந்த வழக்கைக் கையாள்வதற்கான சாத்தியமான வழிகளை ஆராய சவூதி அதிகாரிகளைச் சந்திக்கவும் குழு நடவடிக்கை எடுக்கும் என மேலதிக சொலிசிட்டர் ஜெனரல் நவாவி ‘டெய்லி மிரர்’ பத்திரிகைக்குத் தெரிவித்துள்ளார்.

புதன்கிழமை முதல் வியாழக்கிழமை வரை சந்திப்புகளும் ஒருங்கிணைப்புப் பணிகளும் திட்டமிடப்பட்டுள்ளதுடன், வெளியுறவு அமைச்சு, அதன் சம்பந்தப்பட்ட திணைக்களங்கள் மற்றும் இலங்கை தூதரக அதிகாரிகளுடன் இணைந்து மேலதிக ஏற்பாடுகள் செய்யப்பட்டு வருகின்றன.

இந்த வழக்கு தொடர்பாக உதவுவதற்காக இரண்டு சவூதி சட்ட நிறுவனங்களின் சேவையை வெளியுறவு அமைச்சு பெற்றுள்ளது. மரண தண்டனையிலிருந்து நிவாரணம் கோரும் மேல்முறையீடு, சட்டமா அதிபர் திணைக்களத்தின் ஊடாக குறிப்பிட்ட காலத்திற்குள் தாக்கல் செய்யப்படும் என எதிர்பார்க்கப்படுகிறது.

கல்முனை நற்பிட்டிமுனையைச் சேர்ந்த இலங்கை புலம்பெயர் தொழிலாளியான சிவராசாவுக்கு, சமூக ஊடகப் பதிவு ஒன்று தொடர்பாக அல்-அஹ்ஸா குற்றவியல் நீதிமன்றத்தினால் ஆரம்பத்தில் ஐந்து ஆண்டுகள் சிறைத்தண்டனையும், மூன்று மில்லியன் சவூதி ரியால் அபராதமும் விதிக்கப்பட்டது.

தண்டனையைக் குறைக்கக் கோரி சிவராசாவின் சட்டக் குழு மேல்முறையீடு செய்த நிலையில், சவூதி அரசுத் வழக்கறிஞர்கள் கடுமையான தண்டனையை வலியுறுத்தி தனியாக மேல்முறையீடு செய்தனர். அதனைத் தொடர்ந்து, மேல்முறையீட்டு நீதிமன்றம் தண்டனையை மரண தண்டனையாக உயர்த்தியது.

சிவராசாவுக்கு நிவாரணம் பெற்றுத்தருவதற்காக இலங்கை அரசு சட்டப்பூர்வ மற்றும் இராஜதந்திர வழிகளைப் பின்பற்றி வருகிறது. ஜனாதிபதி அனுர குமார திசாநாயக சவூதி மன்னருக்குக் கருணை மனு ஒன்றை அனுப்பவுள்ளதுடன், ஜனாதிபதியின் கருணை மனுவுடன் பிரத்யேக பாராளுமன்றக் குழுவொன்றும் சவூதி அரேபியா செல்லவுள்ளது.

ரியாத்தில் உள்ள இலங்கைத் தூதரகம், இராஜதந்திர வழிகள் மூலம் சவூதி அதிகாரிகளுடன் இணைந்து இவ்வழக்கை தொடர்ந்து கண்காணித்து ஒருங்கிணைத்து வருகிறது.