திரைப்படமாகவுள்ள மகிந்தவின் வாழ்க்கை! சிறையில் உள்ள நாமலுக்கு கதாநாயகனாக நடிக்க அழைப்பு

மக்கள் விடுதலை முன்னணியை (JVP) அடிப்படையாகக் கொண்டு உருவாக்கப்பட்ட கின்னென் உபன் சீதல திரைப்படத்தின் தயாரிப்பாளர் ஜயலத் பீரிஸ், முன்னாள் ஜனாதிபதி மஹிந்த ராஜபக்சவின் வாழ்க்கை வரலாற்றை திரைப்படமாக உருவாக்கத் திட்டமிட்டுள்ளதாக தகவல்கள் வெளியாகியுள்ளன.

குறித்த திரைப்படத் திட்டம் தொடர்பில் கலந்துரையாடுவதற்காக தயாரிப்பாளர் ஜயலத் பீரிஸ், நாடாளுமன்ற உறுப்பினர் நாமல் ராஜபக்சவை சிறைச்சாலையில் சந்தித்துள்ளதாக தெரிவிக்கப்படுகிறது.

இதன்போது, மகிந்த ராஜபக்சவின் கதாபாத்திரத்தை திரைப்படத்தில் தாம் உருவாக்கவுள்ளதாகவும், அந்தக் கதாபாத்திரத்தில் நாமல் ராஜபக்ச நடிக்க வேண்டும் எனவும் தயாரிப்பாளர் அவரிடம் கோரிக்கை விடுத்ததாக கூறப்படுகிறது.

கதாநாயகனாக மகிந்த

“உங்கள் தந்தையின் கதாபாத்திரத்தை திரைப்படத்தில் கொண்டு வருகிறேன். நீங்கள் அந்த முக்கிய கதாபாத்திரத்தில் நடிக்க வேண்டும்” என தயாரிப்பாளர் ஜயலத் பீரிஸ் நாமல் ராஜபக்சவிடம் தெரிவித்ததாகவும் தகவல்கள் தெரிவிக்கின்றன.

எனினும், இந்த அழைப்பை நாமல் ராஜபக்ச நிராகரித்துள்ளதாக கூறப்படுகிறது. தமக்கு நடிப்புத் திறமை இல்லை என அவர் இதன்போது தெரிவித்ததாகவும் தெரிவிக்கப்படுகிறது.

இதற்கு மாற்றாக, கேரள திரைப்படத்துறையில் திறமையான பல நடிகர்கள் இருப்பதாகக் குறிப்பிட்ட நாமல் ராஜபக்ச, மகிந்த ராஜபக்சவின் கதாபாத்திரத்திற்கு பொருத்தமான நடிகர் ஒருவரைத் தெரிவு செய்வதற்கு தாம் உதவுவதாக உறுதியளித்துள்ளதாகவும் தகவல்கள் தெரிவிக்கின்றன.

எவ்வாறாயினும், இந்த திரைப்படத் திட்டம் தொடர்பான அதிகாரப்பூர்வ அறிவிப்பு இதுவரை வெளியாகவில்லை என்பது குறிப்பிடத்தக்கது.