ஒவ்வொரு குடிமகனும் கோடீஸ்வரரா? உலகின் செல்வந்த நாடு இதுதான்!
உலகில் அதிக பணக்காரர்கள் வசிக்கும் நாடு என்றால், அமெரிக்காதான் முதலில் நினைவுக்கு வரும். ஆனால், சமீபத்திய வெளியான ஆய்வு தவகல்கள் பலரையும் ஆச்சரியத்தில் ஆழ்த்தியுள்ளது.
உலகில் சுமார் 195 நாடுகள் உள்ள நிலையில், சில நாடுகள் மட்டுமே மிகப்பெரிய செல்வ வளத்தைக் கொண்டுள்ளன. அந்த வகையில், UBS Global Wealth Report 2026-ன் படி, உலகின் அதிக செல்வம் கொண்ட நாடாக சுவிட்சர்லாந்து முதலிடத்தில் உள்ளது.
ஒரு குடிமகனின் சராசரி சொத்து ரூ.9 கோடி
சுவிட்சர்லாந்தில் சராசரி தனிநபர் நிகர சொத்து மதிப்பு சுமார் 9.1 லட்சம் அமெரிக்க டாலர்கள் (சுமார் ரூ.9 கோடி) எனக் குறிப்பிடப்பட்டுள்ளது.
வங்கிச் சேவை, காப்பீடு, மருந்துத் தயாரிப்பு, சுற்றுலா உள்ளிட்ட துறைகள் நாட்டின் பொருளாதாரத்திற்கு முக்கிய பங்களிப்பை வழங்குகின்றன.
உலகப் புகழ்பெற்ற சுவிஸ் கைக்கடிகாரங்கள், சாக்லேட் மற்றும் பால் பொருட்களும் அதன் பொருளாதாரத்தின் முக்கிய அடையாளங்களாக உள்ளன.
இந்தியாவுக்கு எந்த இடம்?
இந்தப் பட்டியலில் அமெரிக்கா இரண்டாவது இடத்தில் உள்ளது. அந்நாட்டின் சராசரி தனிநபர் நிகர சொத்து மதிப்பு சுமார் 6.69 லட்சம் டாலர்கள் (ரூ.6.4 கோடி) எனக் கூறப்படுகிறது.
உலகின் மிகப்பெரிய பொருளாதாரமாக விளங்கும் அமெரிக்கா, சர்வதேச வர்த்தகம் மற்றும் நிதி அமைப்பில் முக்கிய இடத்தைப் பெற்றுள்ளது.
லக்சம்பர்க் சுமார் 6.55 லட்சம் டாலர்களுடன் மூன்றாவது இடத்திலும், ஹாங்காங் 6.48 லட்சம் டாலர்களுடன் நான்காவது இடத்திலும் உள்ளன.
ஆஸ்திரேலியா சுமார் 6.16 லட்சம் டாலர்களுடன் ஐந்தாவது இடத்திலும், சிங்கப்பூர் 5.27 லட்சம் டாலர்களுடன் ஆறாவது இடத்திலும் இடம்பெற்றுள்ளன. ஆனால் இந்தியாவின் நிலை முற்றிலும் மாறுப்படும்.
உலகில் அதிக கோடீஸ்வரர்கள் வசிக்கும் நாடுகளில் ஒன்றாக இந்தியா இருந்தாலும், சராசரி தனிநபர் நிகர சொத்து மதிப்பு சுமார் 2,700 டாலர்கள் மட்டுமே எனக் குறிப்பிடப்படுகிறது.
இதற்கு இந்தியாவின் மிகப்பெரிய மக்கள் தொகையும், நாட்டில் நிலவும் பொருளாதார ஏற்றத்தாழ்வும் முக்கிய காரணங்களாகக் கருதப்படுகின்றன.
உலகின் பெரும் செல்வந்தர்களை கொண்ட நாடு என்ற பெருமையை சுவிட்சர்லாந்து பெற்றிருந்தாலும், ஒரு நாட்டின் மொத்த செல்வமும் அதன் ஒவ்வொரு குடிமகனின் செல்வமும் ஒன்றல்ல என்பதை இந்தியாவின் நிலை தெளிவாக உணர்த்துகின்றது.
