Computer Keyboard இல் எழுத்துக்கள் ஏன் வரிசைப்படி இல்லை?
நாம் தினமும் கம்ப்யூட்டர் மற்றும் மொபைல் கீபோர்டுகளைப் பயன்படுத்தி பல வார்த்தைகளைத் தட்டச்சு செய்கிறோம்.
ஆனால், அதிலுள்ள எழுத்துக்கள் ஏன் A-B-C-D என அகரவரிசையில் இல்லாமல் ஏன் Q-W-E-R-T என்ற வரிசையில் அமைந்துள்ளன என்று எப்போதாவது சிந்தித்திருக்கிறீர்களா? அது குறித்த சுவாரஸ்யமான வரலாறு குறுத்து இந்த பதிவில் விரிவாக பார்க்கலாம்.
என்ன காரணம்?
நாம் இன்று பரவலாகப் பயன்படுத்தும் இந்த அமைப்பு QWERTY Keyboard Layout எனப்படுகிறது. இதன் வரலாறு 1870-களில் கிறிஸ்டோபர் லாதம் ஷோல்ஸ் உருவாக்கிய தட்டச்சு இயந்திரத்திலிருந்து தொடங்குகிறது.
ஆரம்பத்தில் எழுத்துக்கள் அகரவரிசைப்படி அமைக்கப்பட்டிருந்தன. ஆனால் வேகமாகத் தட்டச்சு செய்யும்போது, அடிக்கடி பயன்படுத்தப்படும் எழுத்துக்களின் இயந்திரவியல் கைகள் ஒன்றுடன் ஒன்று மோதி தட்டச்சு இயந்திரம் சிக்கிக் கொள்ளும் பிரச்சினை ஏற்பட்டது.
இந்தப் பிரச்சினையைத் தவிர்க்க, ஷோல்ஸ் மற்றும் அவரது சகாக்கள் எழுத்துக்களின் அமைப்பை மாற்றி, அடிக்கடி பயன்படுத்தப்படும் எழுத்துக்கள் ஒன்றுக்கொன்று தொலைவில் இருக்கும் வகையில் வடிவமைத்தனர்.இதன் விளைவாக உருவான QWERTY அமைப்பு 1878-ல் காப்புரிமை பெற்றது.
அதன் பெயர், கீபோர்டின் மேல் வரிசையில் உள்ள முதல் ஆறு எழுத்துகளான Q-W-E-R-T-Y என்பதிலிருந்து வந்தது. பின்னர் கணினி கீபோர்டுகள் அறிமுகமானபோதும், மக்கள் ஏற்கனவே QWERTY அமைப்புக்கு பழகியிருந்ததால் அதே அமைப்பு தொடர்ந்து பயன்படுத்தப்பட்டது.
இதனுடன் Function Keys, Arrow Keys, Number Keys உள்ளிட்ட கூடுதல் விசைகளும் சேர்க்கப்பட்டன. QWERTY மட்டுமே உள்ள ஒரே கீபோர்டு அமைப்பு அல்ல.
Dvorak மற்றும் Colemak போன்ற மாற்று அமைப்புகளும் உருவாக்கப்பட்டுள்ளன.அவை அதிக செயல்திறனை நோக்கமாகக் கொண்டிருந்தாலும், QWERTY ஏற்கனவே பரவலாகப் பயன்படுத்தப்பட்டு வந்ததால் அவற்றுக்கு அதே அளவிலான வரவேற்பு கிடைக்கவில்லை.
இதனால், இன்று நாம் கம்ப்யூட்டர் மற்றும் மொபைல் கீபோர்டுகளில் பயன்படுத்தும் QWERTY அமைப்பு, வெறும் எழுத்துக்களை ஒழுங்கற்ற முறையில் அடுக்கியது அல்ல, மாறாக தட்டச்சு இயந்திரங்களில் ஏற்பட்ட தொழில்நுட்பச் சிக்கல்களைத் தீர்க்க உருவாக்கப்பட்ட ஒரு வரலாற்றுச் சிறப்புமிக்க வடிவமைப்பாகும் என்பது குறிப்பிடத்தக்கது.
