அகதியாக வந்த ஈழத்தமிழர் டெரன்ஸ் ஜெயரெட்னத்துக்கு ஆஸியில் உயர் விருது… ஐங்கரன் விக்கினேஸ்வரா

அவுஸ்திரேலியாவில் சமூக நீதி, சுற்றுச்சூழல் பாதுகாப்பு மற்றும் நிலைத்தன்மை சார்ந்த கொள்கைகளை முன்னெடுத்துச் செல்வதில் பல தசாப்தங்களாக அர்ப்பணிப்புடன் பணியாற்றிய பேராசிரியர் டெரன்ஸ் ஜெயரெட்னம் (Terence Jeyaretnam) அவர்களுக்கு, இந்த ஆண்டுக்கான அவுஸ்திரேலியாவின் உயரிய தேசிய விருதுகளில் ஒன்றான Member of the Order of Australia (AM) வழங்கப்பட்டுள்ளது. இந்த அங்கீகாரம், அவரது நீண்டகால சமூகப் பங்களிப்பிற்கும், சுற்றுச்சூழல் நீதிக்காக அவர் மேற்கொண்ட அயராத முயற்சிகளுக்கும் கிடைத்த பெருமைக்குரிய பாராட்டாகக் கருதப்படுகிறது.

ஒரு தமிழரின் சாதனைப் பயணம்

ஈழத்தில் நடைபெற்ற இனக் கலவரத்தால் பாதிக்கப்பட்டு அகதியாக வந்த தமிழர் ஒருவர் இன்று அவுஸ்திரேலியாவின் உயரிய தேசிய கௌரவங்களில் ஒன்றைப் பெறும் அளவுக்கு உயர்ந்திருக்கிறார் என்ற உண்மை, தனிப்பட்ட வெற்றியைத் தாண்டி முழுத் தமிழர் சமூகத்தின் பெருமையாகவே வரலாற்றில் பதிவாகும்.

இந்த ஆண்டுக்கான அவுஸ்திரேலியாவின் மன்னர் பிறந்த நாள் ( King’s Birthday Honours) விருது பட்டியலில், பேராசிரியர் டெரன்ஸ் ஜெயரட்னம் அவர்கள் Member of the Order of Australia (AM) என்ற உயரிய தேசிய கௌரவத்தைப் பெற்றிருப்பது உலகத் தமிழர்களுக்கும், குறிப்பாக அகதித் தமிழர் சமூகத்திற்கும் பெருமை சேர்த்துள்ள ஒரு வரலாற்றுச் சாதனையாகும்.

Member of the Order of Australia (AM) என்பது நாட்டிற்கும் சமூகத்திற்கும் தமது துறைகளில் குறிப்பிடத்தக்க பங்களிப்பை வழங்கியவர்களுக்கு அளிக்கப்படும் அவுஸ்திரேலியாவின் முக்கியமான தேசிய விருதுகளில் ஒன்றாகும். ஆண்டுதோறும் King’s Birthday Honours பட்டியலில் தேர்ந்தெடுக்கப்படும் சிலருக்கு மட்டுமே இந்த கௌரவம் வழங்கப்படுகிறது. 2026 ஆம் ஆண்டின் இந்த பட்டியலில் மொத்தம் 949 அவுஸ்திரேலியர்கள் கௌரவிக்கப்பட்டுள்ளனர்

சமூக நீதி சுற்றுச்சூழல் செயற்பாட்டாளர்:

டெரன்ஸ் ஜெயரெட்னம் அவர்கள் சமூக நீதி சட்டவியலாளர், கல்வியாளர் மற்றும் சுற்றுச்சூழல் செயற்பாட்டாளர் என்ற பல்வேறு அடையாளங்களைக் கொண்டவர். குறிப்பாக சுற்றுச்சூழல் சட்டம், நிலையான வளர்ச்சி, காலநிலை மாற்றக் கொள்கைகள் மற்றும் சமூக நலன் சார்ந்த விடயங்களில் அவர் வழங்கிய தலைமைத்துவம் அவுஸ்திரேலிய சமூகத்தில் குறிப்பிடத்தக்க தாக்கத்தை ஏற்படுத்தியுள்ளது. வளர்ச்சியும் சுற்றுச்சூழல் பாதுகாப்பும் ஒன்றுக்கொன்று முரணானவை அல்ல. மாறாக இரண்டையும் சமநிலையுடன் முன்னெடுக்க முடியும் என்ற கருத்தை அவர் தொடர்ந்து வலியுறுத்தி வந்துள்ளார்.

சுற்றுச்சூழல் பாதுகாப்பு என்பது வெறும் இயற்கை வளங்களைப் பாதுகாப்பது மட்டுமல்ல. அது சமூக நீதியுடனும் மனித உரிமைகளுடனும் நேரடியாக தொடர்புடையது என்பதையும் அவர் தனது பணிகளின் மூலம் எடுத்துக்காட்டியுள்ளார். குறிப்பாக பின்தங்கிய சமூகங்கள், பூர்வீக மக்கள் மற்றும் எதிர்கால தலைமுறைகளின் நலன்களை கருத்தில் கொண்டு உருவாக்கப்படும் கொள்கைகளுக்காக அவர் தொடர்ந்து குரல் கொடுத்துள்ளார்.

கல்வித் துறையிலும் அவர் ஆற்றிய பங்களிப்பு சிறப்புக்குரியது. பல மாணவர்கள் மற்றும் இளம் தொழில்முறை நிபுணர்களுக்கு வழிகாட்டியாக இருந்து, சமூகப் பொறுப்புணர்வு மற்றும் சுற்றுச்சூழல் விழிப்புணர்வின் அவசியத்தை எடுத்துரைத்துள்ளார். அவரது ஆய்வுகள், சொற்பொழிவுகள் மற்றும் பொதுச் செயல்பாடுகள், நிலையான வளர்ச்சி குறித்த பொதுமக்களின் புரிதலை விரிவுபடுத்துவதில் முக்கிய பங்கு வகித்துள்ளன.

அவுஸ்திரேலியாவின் தேசிய விருதுகள் பட்டியலில் இடம்பெறும் AM கௌரவம், நாட்டிற்கும் சமூகத்திற்கும் சிறப்பான சேவையாற்றியவர்களுக்கு வழங்கப்படும் உயரிய அங்கீகாரங்களில் ஒன்றாகும். அந்த வகையில் டெரன்ஸ் ஜெயரெட்னம் அவர்களுக்கு இந்த விருது வழங்கப்பட்டிருப்பது, அவரது தனிப்பட்ட சாதனையை மட்டுமல்லாமல், சமூக நீதி மற்றும் சுற்றுச்சூழல் பாதுகாப்பு போன்ற மதிப்புகளின் முக்கியத்துவத்தையும் மீண்டும் ஒருமுறை வெளிப்படுத்துகிறது.

அகதி தமிழர்க்கு உயர்ந்த விருது:

இந்த விருது, அவுஸ்திரேலிய சமூகத்தின் முன்னேற்றத்திற்காக அர்ப்பணிப்புடன் உழைக்கும் அனைவருக்கும் ஒரு ஊக்கமாக அமைகிறது. சமூக நீதியும் சுற்றுச்சூழல் நிலைத்தன்மையும் இணைந்த எதிர்காலத்தை உருவாக்குவதற்கான முயற்சிகள் தொடர்ந்து மதிக்கப்படுகின்றன என்பதற்கான வலுவான சான்றாகவும் இது விளங்குகிறது. பேராசிரியர் டெரன்ஸ் ஜெயரெட்னம் அவர்களின் இந்த சாதனை, அவுஸ்திரேலியாவிலும் உலகளாவிய அளவிலும் சமூகப் பொறுப்புணர்வுடன் செயல்படும் பலருக்கு உத்வேகம் அளிக்கும் ஒரு முக்கிய நிகழ்வாகப் பதிவாகியுள்ளது.

இந்த விருது, தனிநபர் ஒருவரின் சாதனையை மட்டும் கௌரவிப்பதல்ல; அகதிகளும் இந்த நாட்டின் வளர்ச்சிக்கும் முன்னேற்றத்திற்கும் மதிப்புமிக்க பங்களிப்பை வழங்க முடியும் என்பதை அவுஸ்திரேலிய சமூகம் அங்கீகரிப்பதைக் காட்டுகிறது.

அகதிகளாக அவுஸ்திரேலியாவை அடைந்த பல தமிழர்கள் மொழி, கலாசாரம், பொருளாதாரச் சவால்கள் மற்றும் சமூக ஏற்றுக்கொள்ளல் போன்ற பல தடைகளை எதிர்கொண்டனர். ஆனால் அவற்றைக் கடந்து கல்வி மற்றும் கடின உழைப்பின் மூலம் தமது வாழ்க்கையை மட்டுமல்ல, தாங்கள் வாழும் சமூகத்தையும் வளப்படுத்த முடியும் என்பதை பேராசிரியர் ஜெயரத்னம் அவர்களின் பயணம் வெளிப்படுத்துகிறது.

இன்று அவுஸ்திரேலிய தமிழர்கள் மருத்துவம், சட்டம், பொறியியல், கல்வி, வணிகம் மற்றும் அரசியல் உள்ளிட்ட பல துறைகளில் குறிப்பிடத்தக்க இடத்தைப் பெற்றுள்ளனர். அந்த வெற்றிப் பயணத்தின் ஒரு உயரிய அடையாளமாக இந்த விருது கருதப்படுகிறது.

எனவே, பேராசிரியர் டெரன்ஸ் ஜெயரட்னம் அவர்களின் இந்தப் பெருமைமிக்க கௌரவம், உலகம் முழுவதும் வாழும் தமிழர்களுக்கு ஒரு ஊக்கச் செய்தியாகவும், இளம் தலைமுறைக்கு கல்வி, அர்ப்பணிப்பு மற்றும் விடாமுயற்சி வெற்றிக்கான பாதை என்பதை நினைவூட்டும் ஒளிவிளக்காகவும் விளங்குகிறது