விடுதலைப் புலிகள் ஆதரிக்கும் நிகழ்ச்சிகளுக்கு தடை! காவல்துறை முக்கிய அறிக்கை

தமிழீழ விடுதலைப் புலிகள் அமைப்பை ஆதரிக்கும் பாடல்களைப் பாடியதாக கூறி குற்றம் சாட்டப்பட்ட சந்தேக நபர் ஒருவர் கைது செய்யப்பட்டதைத் தொடர்ந்து, பொழுதுபோக்கு நிகழ்ச்சிகளில் இசை நிகழ்ச்சிகளுக்குத் தடை விதிக்கப்பட்டுள்ளதாகக் கூறும் சமூக ஊடகச் செய்திகளைப் பொய்யானவை என சிறிலங்கா காவல்துறை சுட்டிக்காட்டியுள்ளது.

மற்றும் இவை தவறாக வழிநடத்துபவை என காவல்துறை கூறியுள்ளது.

இதன்படி பொது பொழுதுபோக்கு நிகழ்ச்சிகளில் பாடல்கள் இசைப்பதற்கு முழுமையான தடை எதுவும் விதிக்கப்படவில்லை என காவல்துறை ஓர் அறிக்கையில் வலியுறுத்தியுள்ளது.

மே 31 அன்று சாவகச்சேரி, நவக்குளியில் நடைபெற்ற ஒரு இசை நிகழ்ச்சியில் விடுதலைப் புலிகள் அமைப்பு தொடர்பான பாடல்களைப் பாடியதாகக் கூறப்படும் குற்றச்சாட்டின் பேரில், கிளிநொச்சி, உதயநகரைச் சேர்ந்த 24 வயது இளைஞர் ஒருவர் ஜூன் 2 அன்று கைது செய்யப்பட்டதைத் தொடர்ந்து இந்த அறிக்கை வெளியிடப்பட்டுள்ளது.

யாழ்ப்பாண பிரதேச குற்றப் புலனாய்வுப் பணியகம் நடத்திய விசாரணையில், சந்தேக நபர் நிகழ்ச்சியில் இசைக்கப்பட்ட இரண்டு பாடல்களை, விடுதலைப் புலிகளைப் போற்றும் வகையில் திருத்தித் தனது சமூக வலைதளக் கணக்கில் பதிவேற்றியது தெரியவந்துள்ளது என காவல்துறை கூறியுள்ளது.

காவல்துறையின் கூற்றுப்படி, தடைசெய்யப்பட்ட அமைப்புக்கு ஆதரவான உள்ளடக்கத்தைச் சேர்க்கும் வகையில் அந்தப் பதிவுகள் வேண்டுமென்றே மாற்றியமைக்கப்பட்டிருந்தன எனவும் காவல்துறை கூறியுள்ளது.

இதன் மூலம் அவை இணையத்தில் பரவலாகப் பரப்பப்பட்டன. சந்தேக நபர், 1979-ஆம் ஆண்டின் 48-ஆம் இலக்க பயங்கரவாதத் தடுப்புச் சட்டத்தின் 3(G) பிரிவின் கீழ், ஜூன் 3 அன்று சாவகச்சேரி நீதவான் நீதிமன்றத்தில் முன்னிலைப்படுத்தப்பட்ட நிலையில், ஜூன் 17 வரை விளக்கமறியலில் வைக்கப்பட்டார்.

அனைத்து அரசியலமைப்புச் சட்டம் மற்றும் நாட்டின் சட்டங்களுக்கு இணங்க செயல்பட வேண்டும் என்று காவல்துறை மீண்டும் வலியுறுத்தியதுடன், சமூக ஊடகங்களில் பரவி வரும் தவறான தகவல்களால் பொதுமக்கள் தவறாக வழிநடத்தப்பட வேண்டாம் என்றும் கேட்டுக்கொண்டது.