அமெரிக்க ஆப் ஸ்டோர்களில் மீண்டும் டிக்டோக்!

சீனாவுக்குச் சொந்தமான சமூக ஊடக தளத்தின் தடையை அமுல்படுத்துவதை ஜனாதிபதி டொனால்ட் ட்ரம்ப் ஏப்ரல் 5 ஆம் திகதி வரை ஒத்திவைத்ததை அடுத்து, டிக்டோக் (TikTok) மீண்டும் ஆப்பிள் மற்றும் கூகுளின் அமெரிக்க ஆப் ஸ்டோர்களில் கிடைக்கிறது.

170 மில்லியனுக்கும் அதிகமான அமெரிக்க பயனர்களால் பயன்படுத்தப்படும் பிரபலமான செயலி, தடை காலக்கெடு நெருங்கி வருவதால், கடந்த மாதம் அமெரிக்காவில் சிறிது நேரம் இடைநிறுத்தப்பட்டது.

பின்னர் ட்ரம்ப் டிக்டோக்கிற்கு 75 நாட்கள் நீட்டிப்பு வழங்கும் நிர்வாக உத்தரவில் கையெழுத்திட்டார்.

இந்த நிலையில் அமெரிக்காவில் உள்ள ஆப் ஸ்டோர்களில் வியாழக்கிழமை (13) மாலை முதல் பிரபலமான குறுகிய வீடியோ பயன்பாடு, அதன் சேவைகளை மீட்டமைக்கத் தொடங்கியது.

கருத்துக்கான சர்வதேச ஊடகங்களின் கோரிக்கைக்கு டிக்டோக் உடனடியாக பதிலளிக்கவில்லை.

கடந்த மாதம் ட்ரம்பின் நிர்வாக உத்தரவு டிக்டோக்கின் தடையை 75 நாட்களுக்கு தாமதப்படுத்தியது, சீனாவின் பைட் டான்ஸ் நிறுவனத்திற்கு அமெரிக்காவில் அதன் செயல்பாடுகளை தற்காலிகமாக தொடர அனுமதித்தது.

2024 ஆம் ஆண்டில் 52 மில்லியனுக்கும் அதிகமான பதிவிறக்கங்களுடன், அமெரிக்காவில் அதிகம் பதிவிறக்கம் செய்யப்பட்ட செயலிகளில் டிக்டோக் இரண்டாவது இடத்தில் உள்ளது என்று சந்தை நுண்ணறிவு நிறுவனமான சென்சார் டவர் தெரிவித்துள்ளது.

டிக்டோக்கின் மொத்த பதிவிறக்கங்களில் சுமார் 52% ஆப்பிள் ஆப் ஸ்டோரிலிருந்தும், 48% கடந்த ஆண்டு அமெரிக்காவில் கூகுள் ப்ளேயிலிருந்தும் எடுக்கப்பட்டவை என்று சென்சார் டவர் சுட்டிக்காட்டியுள்ளது.

சீனாவுக்கு சொந்தமான செயலி உளவு பார்ப்பதற்கும் அரசியல் கையாளுதலுக்கும் ஒரு கருவியாக பீஜிங் பயன்படுத்தக்கூடும் என்று சுட்டிக்காட்டி பைடன் நிர்வாகம் டிக்டோக்கிற்கு அமெரிக்காவில் தடை விதித்தது.

சீனாவும் டிக்டோக் நிறுவனமும் இந்தக் குற்றச்சாட்டுகளை பலமுறை மறுத்துள்ளன.

டிக்டோக்கின் அமெரிக்க செயல்பாடுகளை விற்பனை செய்வதற்கான அழைப்புகளையும் பீஜிங் முன்பு நிராகரித்துள்ளது.