” சாந்தியை நாடினார் காந்தி மகான்” ….. கவிதை ….  மகாதேவ ஐயர் ஜெயராமசர்மா.

சாந்தியை நாடினார் காந்தி மகான்- அவர்

சத்தியம் நிச்சயம் வெல்லும் என்றார்

கத்தியை ரத்தத்தை ஒதுக்கி நின்றார்- அவர்

நித்தமும் சத்தியம் தர்மம் என்றார்

மதுவை ஒழித்திட வேண்டும் என்றார் – அவர்

மயக்கும் வழிகளை ஒதுக்கு என்றார்

சதியும் பழிகளும் தீமை என்றார் – அவர்

சன்மார்க்கம் நன்மார்க்கம் என உரைத்தார்

ஒற்றுமை ஓங்கிட வேண்டும் என்றார் – காந்தி

உண்மையை உள்ளத்தில் இருத்து என்றார் 

உவப்புடன் பிரார்த்தனை செய்க என்றார் – காந்தி

உயிர்ப்புடன் உழைத்திடல் நன்மை என்றார்.