ஜேர்மனியில் குடியுரிமை பெற காத்திருப்பவர்களுக்கு மகிழ்ச்சியான செய்தி: புதிய சட்டம் நடைமுறைக்கு வந்தது

ஜேர்மனியில் புதிய குடியுரிமை சீர்திருத்த சட்டம் நடைமுறைக்கு வந்துள்ளது. இதன்படி, ஜேர்மனியில் வசிக்கும் வெளிநாட்டவர்கள் தங்களின் முதல் குடியுரிமையை விட்டுக்கொடுக்காமல் மிக விரைவாகவும் ஜேர்மன் குடியுரிமையைப் பெறலாம்.

குடியுரிமை பெறுவதற்கான நடைமுறைகள் மற்றும் கால அளவை எளிமையாக்கி புதிய சட்டம் நடைமுறைக்கு வந்துள்ளது.

ஜேர்மன் அரசாங்கத்தால் அறிமுகப்படுத்தப்பட்ட புதிய குடியுரிமை சீர்திருத்தங்கள் ஜூன் 27, 2024 முதல் நடைமுறைக்கு வந்துள்ளதாக அந்நாட்டு ஊடகங்கள் செய்தி வெளியிட்டுள்ளன.

புதிய குடியுரிமைச் சட்டம் ஜேர்மனியில் உள்ள வெளிநாட்டவர்களின் குடியுரிமைகளைப் பராமரிக்கும் அதே வேளையில் ஜேர்மன் குடியுரிமைக்கு விண்ணப்பிக்கவும் அனுமதிக்கிறது.

ஜேர்மன் குடியுரிமையைப் பெறும்போது குடியுரிமைக்கு விண்ணப்பிப்பவர்கள் தங்கள் முந்தைய குடியுரிமையை கைவிட வேண்டியதில்லை.

புதிய சட்டத்தின் கீழ், குடியுரிமை விண்ணப்பதாரர்கள் இப்போது ஜேர்மன் குடியுரிமையை விரைவாகப் பெற முடியும்.

ஜேர்மனியில் ஐந்து ஆண்டுகள் சட்டப்பூர்வ வசிப்பிடத்திற்குப் பிறகு வெளிநாட்டினர் குடியுரிமைக்கு விண்ணப்பிக்க முடியும் என்பதுடன், முன்னதாக இது எட்டு ஆண்டுகளாக இருந்தது.

ஜேர்மன் குடிமக்களை திருமணம் செய்துகொண்ட வெளிநாட்டினருக்கு, ஜேர்மன் குடியுரிமைக்கு விண்ணப்பிப்பதற்கான காத்திருப்பு காலம் நான்கு ஆண்டுகளாக குறைக்கப்பட்டுள்ளது.

நல்ல பணித்திறனை கொண்டவர்கள், தன்னார்வப் பணிகளில் ஈடுபடுபவர்கள், நிதி ரீதியாகத் தன்னம்பிக்கை கொண்டவர்கள் மற்றும் உயர் புலமையுடன் ஜேர்மன் மொழியைப் பேசுபவர்கான காலம் மூன்று ஆண்டுகளாக குறைக்கப்படுகிறது.

ஜேர்மனியில் வெளிநாட்டுப் பெற்றோருக்குப் பிறக்கும் பிள்ளைகள் தங்கள் பெற்றோரின் குடியுரிமையைத் தக்க வைத்துக் கொண்டு ஜெர்மன் குடியுரிமையைப் பெறமுடியும்.

குறைந்தபட்சம் ஒரு பெற்றோராவது ஜேர்மனியில் ஐந்து ஆண்டுகளுக்கும் மேலாக சட்டப்பூர்வமாக வசிப்பவராக இருந்து நிரந்தரக் குடியுரிமை பெற்றிருந்தால் ஒரு குழந்தை குடியுரிமையைப் பெற முடியும்.

ஜேர்மன் குடியுரிமை தேர்விலும் மாற்றங்கள் செய்யப்பட்டுள்ளன.

புதிய சட்டத்தின் கீழ், 1960களில் மேற்கு ஜேர்மனிக்கு தொழில்துறையில் வேலை செய்யச் சென்ற துருக்கிய நாட்டினரை உள்ளடக்கிய வருகை தொழிலாளர்களின் தலைமுறைக்கு இனி குடியுரிமை சோதனை தேவையில்லை.

இந்த வகையைச் சேர்ந்த வெளிநாட்டினர் ஜேர்மன் மொழியில் புலமையை வெளிப்படுத்தினால் அவர்களுக்கு குடியுரிமை வழங்கப்படும்.

புதிய சட்டம் நாட்டின் பலதரப்பட்ட சமூகத்திற்கு நீதி வழங்குவதாக மத்திய உள்துறை அமைச்சர் நான்சி ஃபைசர் தெரிவித்துள்ளார்.

எவ்வாறாயினும், ஜேர்மன் குடியுரிமை வழங்குவது நாட்டின் மதிப்பைக் குறைக்கும் என்று எதிர்க்கட்சிகள் தெரிவித்தன.

தாம் ஆட்சிக்கு வந்தால் இந்த திருத்தம் ரத்து செய்யப்படும் என்றும் எதிர்க்கட்சி தெரிவித்துள்ளது.