காணாமல் போனோரின் குடும்பங்களுக்கு உள்நாட்டு செயல்முறைகளில் நம்பிக்கை இல்லை என்பது தெரிகிறது

பல்வேறு காரணங்களால் காணாமல் போனோரின் குடும்பங்களுக்கு உள்நாட்டு செயல்முறைகள் மீது நம்பிக்கை இன்மை உள்ளது என்பதை காணாமல் போனோர் பற்றிய அலுவலகம் முழுமையாக உணர்ந்துள்ளது. ஆனால், இதை ஒரு முக்கிய சவாலாகவே நாங்கள் பார்க்கிறோம் என காணாமல் போனோர் பற்றிய அலுவலகத்தின் ஆணையர் சட்டத்தரணி மீராக் ரஹீம் தெரிவித்தார்.

செம்மணி மனிதப் புதைகுழி அகழ்வு பணிகளுக்கு பின்னர் ஊடகங்களுக்கு கருத்து தெரிவித்த போது இதனை தெரிவித்தார்.

மேலும் தெரிவிக்கையில், காணாமல் போனவர்களின் குடும்பத்தினரின் டிஎன்ஏ தரவுகளைச் சேகரிப்பது தொடர்பான பிரச்சினை குறித்து காணாமல் போனோர் பற்றிய அலுவலகம் தீவிரமாகப் பணியாற்றி வருகிறது. நீதிமன்ற வழக்குகளுக்கு எவ்வாறு பதிலளிப்பது என்பது மட்டுமின்றி, ஒரு டிஎன்ஏ வங்கியை உருவாக்குவதை நோக்கியும் நாம் செயல்படுவதை உறுதிசெய்ய முயல்கிறோம்.

ஏனெனில், கடந்த சில ஆண்டுகளில் காணாமல் போனவர்களின் குடும்ப உறுப்பினர்கள் சிலர் காலமாகியுள்ளனர் என்பதை நாம் உணர்ந்துள்ளோம். எனவே, இந்தப் பணியின் அவசரத் தன்மையையும் நாம் உணர்ந்து செயல்படுகிறோம்.”

“அடையாளம் காணும் பிரச்சினை என்பது காணாமல் போனோர் பற்றிய அலுவலகம் கவனித்து வரும் ஒரு முக்கிய விஷயம். இது குறித்து உள்ளூர் மற்றும் சர்வதேச அளவிலான பல்வேறு தரப்பினருடன் கலந்துரையாடி வருகிறோம். ஏனெனில், இது ஒரு சிக்கலான செயல்முறை என்பதை நாம் உணர்ந்துள்ளோம்; இது வெறும் டிஎன்ஏ தொடர்பான விஷயம் மட்டுமல்ல.

குடும்பங்களிடமிருந்து தகவல்களைச் சேகரிப்பது, அதாவது மரணத்திற்கு முந்தைய தகவல்கள், அவர்களுக்கு ஏதேனும் விபத்துகள் நிகழ்ந்ததா, அவர்கள் காணாமல் போனபோது என்ன ஆடை அணிந்திருந்தார்கள் என்பது போன்ற தகவல்களைச் சேகரித்து, புதைமேட்டுப் பகுதிகளிலிருந்து நமக்குக் கிடைக்கும் தகவல்களுடன் ஒப்பிட்டுப் பார்ப்பதும் இதில் அடங்கும். அத்துடன், சூழ்நிலை சார்ந்த தகவல்களையும் நாம் கருத்தில் கொள்வதை உறுதி செய்ய வேண்டும்.

இந்த மனித புதைகுழி பகுதி காணாமல் போன சம்பவங்களுடன் எவ்வாறு தொடர்புடையதாக இருக்கிறது என்பதையும், இதை ஒரு முழுமையான செயல்முறையாகப் பார்ப்பதையும் நாம் உறுதி செய்கிறோம். மேலும், அடையாளம் காணும் பணி என்பது பல்துறை சார்ந்த ஒன்று என்பதையும், அதற்கு வெவ்வேறு துறை சார்ந்த வல்லுநர்கள் தேவை என்பதையும் நாம் புரிகிறோம்.

காணாமல் போனவர்களின் குடும்பங்கள் உட்பட நாட்டிற்குள் உள்ள பல தரப்பினருடன் கலந்தாலோசிக்க வேண்டும் என்பதையும், பல்வேறு சர்வதேச தொழில்நுட்ப அனுபவங்களைப் பெற்று, அந்த அனுபவங்களிலிருந்து கற்றுக்கொண்டு, அவை இலங்கைக்கு எவ்வாறு பொருந்தும் என்பதைக் கண்டறிய வேண்டும் என்பதையும் நாம் உணர்ந்துள்ளோம்.”

“பல்வேறு காரணங்களால் காணாமல் போனோர் குடும்பங்களுக்கு காணாமல் போனோர் பற்றிய அலுவலகம் மீது மட்டுமன்றி, உள்நாட்டு செயல்முறைகள் மீதும் நம்பிக்கையின்மை உள்ளது என்பதை காணாமல் போனோர் பற்றிய அலுவலகம் முழுமையாக உணர்ந்துள்ளது. ஆனால், இதை ஒரு முக்கிய சவாலாகவே நாங்கள் பார்க்கிறோம்.

வெவ்வேறு குடும்பங்களுடன் கலந்துரையாடவும், செயல்பாடுகள் மூலம் மட்டுமே அவர்களை நம்ப வைக்க முடியும் என்பதையும் உணர்ந்து நாங்கள் பணியாற்றி வருகிறோம். மேலும், மனித புதைகுழி செயல்முறையை குடும்பங்கள் சிறப்பாகப் புரிந்து கொள்வதை உறுதி செய்ய அவர்களுடன் தொடர்பில் இருப்பது மிகவும் அவசியம் என்றும் உணர்கிறோம்.

அவர்கள் காணாமல் போனோர் பற்றிய அலுவலகத்தை முழுமையாக ஆதரிக்க வேண்டும் என்று நாங்கள் கோரவில்லை; ஆனால், காணாமல் போன மற்றும் காணாமலாக்கப்பட்ட நபர்கள் எங்கே இருக்கிறார்கள் என்பதைக் கண்டறியவும், நீதித்துறை செயல்முறைகள் மூலம் நீதியைப் பெறவும் காணாமல் போனோர் பற்றிய அலுவலகம் மற்றும் இது போன்ற செயல்முறைகளுடன் அவர்கள் இணைந்து செயல்படுவது மிகவும் முக்கியம் என்றே நாங்கள் கூறுகிறோம் – என்றார்.