வரியை பழிவாங்கும் ஆயுதமாக இந்தியா பயன்படுத்தாது
இந்தியா – சீனா இடையேயான வர்த்தக உறவுகளில் சுங்கவரி அல்லாத தடைகளே (non-tariff barriers) மிகப்பெரிய தடையாக உள்ளதாக நிதியமைச்சர் நிர்மலா சீதாராமன் தெரிவித்துள்ளார்.
தாய்லாந்தில் நடைபெற்ற உலக வங்கி – சர்வதேச நாணய நிதியத்தின் (IMF) ஆண்டுக்கூட்டங்களுக்கு இடையே, அட்லாண்டிக் கவுன்சிலைச் சேர்ந்த மைக்கேல் கூகுள்மேனுடன் நடைபெற்ற கலந்துரையாடலின் போது அவர் இதனைக் குறிப்பிட்டார்.
” சீனாவுடன் இந்தியாவின் வர்த்தகப் பற்றாக்குறை தொடர்ந்து அதிகரித்து வருகிறது. பல ஆண்டுகளாகப் பேச்சுவார்த்தை நடத்தியும் இந்த நிலையை மாற்ற முடியவில்லை.
சீனாவில் மகத்தான சந்தை வாய்ப்புகள் உள்ள பொருட்களுக்குக்கூட இந்தியாவுக்குச் சந்தை அனுமதி மறுக்கப்படுகிறது.
உலகளாவிய போட்டித்திறன் கொண்ட பொதுவான மருந்துகள் (generic drugs), மாட்டுக்கறி, காய்கறிகள் மற்றும் அழுகக்கூடிய பொருட்கள் போன்ற பல துறைகளில் இந்தியப் பொருட்களுக்குத் தொடர்ச்சியான முட்டுக்கட்டைகள் போடப்படுகின்றன.
தாவரப் பாதுகாப்பு (phytosanitary) நடவடிக்கைகள் போன்ற காரணங்களைக் கூறி சீனா சுங்கவரி அல்லாத தடைகளைத் தொடர்ச்சியாகப் பயன்படுத்தி வருகிறது.
பிற நாடுகளைப் போல திடீர் பழிவாங்கும் சுங்கவரிகளை விதிக்கும் முறையைக் கடைப்பிடிக்காமல், இந்தியா எப்போதும் பேச்சுவார்த்தை மூலமாகவே தீர்வு காண முயல்கிறது; இருப்பினும், இந்த வர்த்தகச் சமநிலையின்மையைச் சரிசெய்வதில் சிரமங்களை எதிர்கொள்கிறது.” – எனவும் இந்திய நிதி அமைச்சர் குறிப்பிட்டுள்ளார்.
