கவிதைகள்
“ஒற்றுமை உணர்வை உளத்தில் இருத்துவோம்” …. கவிதை …. மகாதேவ ஐயர் ஜெயராமசர்மா.
மகாதேவ ஐயர் ஜெயராமசர்மா
மேனாள் தமிழ் மொழிக் கல்வி இயக்குநர்
மெல்பேண் ….. அவுஸ்திரேலியா
இனத்தாற் சண்டை மொழியால் சண்டை
மதத்தால் சண்டை எங்கும் நடக்குது
தேவையா என்பதை நினைத்துப் பார்த்தால்
தெளிவும் பிறக்கும் வழியும் தெரியும்
யாதும் ஊரே யாவரும் கேளிர்
மூத்தோர் மொழிந்தார் முழங்கிறோம் எங்கும்
உலகம் தழுவிய ஒற்றுமைத் தத்துவம்
உணர்வில் கலந்தால் உலகம் ஒளிரும்
ஓடும் உதிரம் ஒழுகும் கண்ணீர்
ஒன்றாய் இருப்பதை உணருதல் வேண்டும்
இறைச்சி தோலெலும்பில் வேற்றுமை உண்டா
இதயம் இருத்தினால் இல்லையே சண்டை
பசியும் தாகமும் பிணியும் இறப்பும்
உறக்கமும் விழிப்பும் யாவர்க்கும் ஒன்றே
மனித மனத்தின் வக்கிர நிலையால்
இனமாய் மதமாய் பிரிந்தே கிடக்கிறோம்
பிறப்பு என்பதே பெருவர மாகும்
வரத்தைச் சாபமாய் ஆக்குதல் முறையா
வேற்றுமை என்பதை விரட்டியே ஒழிப்போம்
ஒற்றுமை உணர்வை உளத்தில் இருத்துவோம் !
