16 வயதுக்கு கீழ் சமூக ஊடகங்களுக்குத் தடை

சமூக ஊடகங்களைப் பயன்படுத்தும் பயனர்களுக்கு 16 வயது பூர்த்தியாகியிருக்க வேண்டும் என்ற புதிய சட்டமூலத்தை நியூசிலாந்து அரசாங்கம் திங்கட்கிழமை (24) அன்று அறிமுகப்படுத்தியுள்ளது. இன்ஸ்டாகிராம் (Instagram), டிக்டாக் (TikTok) போன்ற தளங்களில் சிறுவர்கள் இணைவதைத் தடுக்கும் முயற்சியில் ஈடுபட்டுள்ள பல நாடுகளுடன் நியூசிலாந்தும் தற்போது இணைந்துள்ளது.

அறிமுகப்படுத்தப்பட்டுள்ள இந்தப் புதிய சட்டத்தின்படி, மெட்டா (Meta) போன்ற நிறுவனங்கள் இணங்கத் தவறினால், தங்களின் உலகளாவிய வருவாயில் 10% வரை அபராதமாகச் செலுத்த நேரிடும்.

“நியூசிலாந்து சிறார்களின் ஒரு தலைமுறைக்கு இழைக்கப்படும் தீங்கினை எங்களால் ஒருபோதும் ஏற்றுக்கொள்ள முடியாது” என்று பிரதமர் கிறிஸ்டோபர் லக்சன் (Christopher Luxon) தெரிவித்தார்.

இன்ஸ்டாகிராம், டிக்டாக், ஸ்னாப்சாட் (Snapchat), ஃபேஸ்புக் (Facebook) ஆகிய தளங்களைக் குறிப்பிட்ட அவர், பயனர்களுக்கு 16 வயதுக்கு மேல் ஆகிவிட்டதா என்பதைச் சரிபார்க்கத் தகுந்த நடவடிக்கைகளை அந்தத் தளங்கள் எடுக்க வேண்டும் என்றார்.

வயதைச் சரிபார்க்க ஏற்கனவே உள்ள கணக்குத் தகவல்கள், முக வயது மதிப்பீடு (facial age estimation), டிஜிட்டல் அடையாளச் சேவைகள் மற்றும் முறையான அடையாள ஆவணங்களைப் பயன்படுத்த வேண்டியிருக்கும் எனத் தெரிவிக்கப்பட்டுள்ளது. மேலும், நிறுவனங்கள் தாங்கள் எதிர்கொள்ளும் ஆபத்துகளை மதிப்பிடுவதுடன், அந்த ஆபத்துகள் எவ்வாறு குறைக்கப்படுகின்றன என்பது குறித்தும் அறிக்கை சமர்ப்பிக்க வேண்டும். விதிமுறைகளுக்கு முரணாகச் செயல்படும் நிறுவனங்களுக்கு அபராதமும் விதிக்கப்படும்.

இந்தப் புதிய சட்டமூலம், தளங்கள் மீது சட்டப்பூர்வமான பொறுப்புகளைச் சுமத்துகிறது என்று கல்வி அமைச்சர் எரிகா ஸ்டான்போர்ட் (Erica Stanford) தெரிவித்தார். மேலும், “குழந்தைகளுக்கோ, அவர்களின் பெற்றோருக்கோ அல்லது பாதுகாப்பாளர்களுக்கோ எந்தவொரு அபராதமும் விதிக்கப்படவில்லை” என்றும் அவர் கூறினார்.

தீங்கு விளைவிக்கும் அல்காரிதம்கள்:

இந்த சட்டமூலம் நிறைவேறுமா என்பது இன்னும் தெளிவாகத் தெரியவில்லை. தேசிய கட்சியின் (National Party) கூட்டணியில் உள்ள தாராளவாத ஏசிடி (ACT) கட்சியும், மக்கள் கட்சியான என்இசட் ஃபர்ஸ்ட் (NZ First) கட்சியும் இந்த சட்டமூலத்தை எதிர்க்கின்றன.

ஆஸ்திரேலியாவில் இந்தச் சட்டம் “பெரும் தோல்வியை” சந்தித்துள்ளதால் தங்களால் இதை ஆதரிக்க முடியாது என்று ‘என்இசட் ஃபர்ஸ்ட்’ தெரிவித்துள்ளது. இந்தச் சட்டம் வேலை செய்யாது என்றும், பதின்பருவத்தினர் எளிதில் இந்தத் தடையை மீறிச் சென்றுவிடுவார்கள் என்றும் ‘ஏசிடி’ கட்சி நம்புகிறது.

இதற்கிடையில், வயது சரிபார்ப்பு எவ்வாறு செயல்படும் மற்றும் எந்தெந்த தளங்கள் பாதிக்கப்படும் என்பது உள்ளிட்ட பல கேள்விகளை முக்கிய எதிர்க்கட்சியான தொழிற்கட்சி (Labour Party) முன்வைத்துள்ளது. ஆதரவு அளிப்பது குறித்து முடிவெடுப்பதற்கு முன்பு இந்த விவகாரங்களை அது பரிசீலித்து வருகிறது.