பட்டம் பெற்ற மகனுக்கு ஆட்டைப் பரிசளித்த தாய்

பொதுவாகப் பல்கலைக்கழகத்தில் பட்டப்படிப்பை முடித்த பிள்ளைகளுக்குப் பெற்றோர் கார் பரிசளிப்பதோ அல்லது வெளியில் விருந்துக்கு அழைத்துச் செல்வதோ வழக்கம். ஆனால், புரோமிஸ் ஒக்கோரோவிற்கு (Promise Okoro) ஒரு வித்தியாசமான, அதே சமயம் பாரம்பரியம் மிக்கப் பரிசு காத்திருந்தது. ஆம், அவரது தாயார் அவருக்கு ஆடு ஒன்றைப் பரிசாக வழங்கியுள்ளார்!

“என் மகிழ்ச்சியை என்னால் கட்டுப்படுத்தவே முடியவில்லை,” என்று 23 வயதான புரோமிஸ் தனது நெகிழ்ச்சியைப் பகிர்ந்துகொண்டார். பட்டமளிப்பு விழாவில் அவர் காட்டிய அந்தத் துள்ளலான மகிழ்ச்சியும், தாயின் பரிசும் காணொளியாகப் பதிவாகி தற்போது இணையத்தில் வைரலாகப் பரவி வருகிறது.

தென்கிழக்கு நைஜீரியாவைச் (Nigeria) சேர்ந்த புரோமிஸ்ஸின் குடும்பத்தில், விலங்குகள் மிக முக்கிய இடத்தைப் பிடிக்கின்றன. நைஜீரியக் கலாசாரத்தில் விலங்குகள் உன்னதமான பரிசாகவே மதிக்கப்படுகின்றன. மரியாதை, பாராட்டு மற்றும் அன்பைப் வெளிப்படுத்துவதற்காக இத்தகைய விலங்குகளைப் பரிசாக வழங்குவது அங்கு ஒரு கௌரவமாகக் கருதப்படுகிறது.

“என் மகனுக்கு ஒரு கார் வாங்கும் அளவுக்கு என்னிடம் பணம் இல்லை,” என்று புரோமிஸ்ஸின் தாயார் கனிவுடன் கூறினார். “இருப்பினும், அவனால் நான் அடைந்த பெருமிதத்தை வெளிப்படுத்தவே நான் அந்த ஆட்டை வாங்கினேன்,” என்று அவர் நெகிழ்ச்சியுடன் தெரிவித்தார்.

அந்தப் பழுப்பு நிற ஆட்டைத் தனது சொந்த கிராமத்திலிருந்து 120,000 நைரா (சுமார் 113 டொலர்) கொடுத்து வாங்கியதாக அவர் குறிப்பிட்டார். விலையுயர்ந்த பொருட்களை விட, தாயின் அன்பும் நம்பிக்கையும் நிறைந்த இந்தப் பரிசு, புரோமிஸ்ஸின் வாழ்வில் மறக்க முடியாத ஒரு தருணமாக மாறியுள்ளது.