ஆஸ்திரேலியாவில் H5 பறவைக் காய்ச்சலால் சிறு பெங்குயின் உயிரிழப்பு
ஆஸ்திரேலியாவில் உள்ள விக்டோரியா மாகாணத்தின் பிலிப் தீவில் (Phillip Island), ஆபத்தான H5 பறவைக் காய்ச்சலால் ஒரு சிறு பெங்குவின் (little penguin) உயிரிழந்த முதல் சம்பவம் உறுதி செய்யப்பட்டுள்ளது. இந்தச் சிறு பெங்குவின்களுக்குத் தடுப்பூசி போடத் தொடங்குவதாக மாநில அரசு அறிவித்த சில நாட்களிலேயே இந்த அதிர்ச்சித் தகவல் வெளியாகியுள்ளது.
சிறு பெங்குவின்களிடம் இந்த வைரஸ் தொற்று உறுதி செய்யப்பட்டுள்ளதால், ஆயிரக்கணக்கான பறவைகளுக்குத் தடுப்பூசி போடும் பணிகள் தீவிரப்படுத்தப்பட்டுள்ளன. திங்கட்கிழமை முதல் தடுப்பூசி வழங்கும் பணி தொடங்கப்படும் என அரசு சனிக்கிழமையன்று அறிவித்தது.
அந்தப் பறவை கண்டெடுக்கப்பட்ட துல்லியமான இடத்தை அரசு வெளியிடவில்லை. இருப்பினும், தீவின் புகழ்பெற்ற ‘பெங்குவின் அணிவகுப்பு’ (penguin parade) பகுதிக்குள் அது கண்டெடுக்கப்படவில்லை என்று தெரிவிக்கப்பட்டுள்ளது.
அந்தச் சிறு பெங்குவின் இறந்துவிட்டதை ஒரு செய்தித் தொடர்பாளர் உறுதிப்படுத்தினார்.
பிலிப் தீவில் சுமார் 40,000 சிறு பெங்குவின்கள் உள்ளன. இதுவே இவற்றுடைய உலகின் மிகப்பெரிய குடியேற்றப் பகுதியாகவும், ஒரு முக்கிய சுற்றுலாத் தலமாகவும் திகழ்கிறது. இந்த வைரஸ் தீவை அடைந்தால் சிறு பெங்குவின்கள் பெருமளவில் உயிரிழக்கக்கூடும் என்று சுற்றுச்சூழல் ஆர்வலர்கள் கவலை தெரிவித்துள்ளனர்.
டிகின் பல்கலைக்கழகத்தின் (Deakin University) வனவிலங்கு சூழலியல் மற்றும் பாதுகாப்புப் பேராசிரியரான இவான் ரிச்சி (Euan Ritchie), பெரிதும் நேசிக்கப்படும் இந்தச் சிறு பெங்குவின் கூட்டத்தில் H5 பறவைக் காய்ச்சல் கண்டறியப்பட்டுள்ளது “பேரதிர்ச்சியை” ஏற்படுத்தியுள்ளது என்றார்.
“ஆஸ்திரேலிய ஃபர் சீல்கள் (Australian fur seals), கிழக்கு வரிகளுடன் கூடிய பாண்டிகூட்டுகள் (eastern barred bandicoots), அண்மையில் மீண்டும் அறிமுகப்படுத்தப்பட்ட புஷ் ஸ்டோன் குர்லூக்கள் (bush stone curlews) உள்ளிட்ட பல்வேறு வகையான மற்றும் குறிப்பிடத்தக்க எண்ணிக்கையிலான சுதேசி வனவிலங்குகளின் வாழ்விடமாகப் பிலிப் தீவு திகழ்கிறது” என்று அவர் கூறினார்.
“இந்தப் பறவைக் காய்ச்சல் பரவலை எதிர்கொண்டு வனவிலகுகள் உயிர்வாழவும், மீண்டு வரவும் தேவையான அனைத்து வளங்களையும் அரசாங்கங்கள் வழங்க வேண்டும்” என்றார்.
முன்னதாகப் புதன்கிழமையன்று, காட்டுப் பறவைகளுக்கான உலகின் மிகப்பெரிய H5 பறவைக் காய்ச்சல் தடுப்பூசித் திட்டத்தைத் தொடங்கப் போவதாக விக்டோரியா அரசு அறிவித்தது.
பிலிப் தீவு மற்றும் மெல்போர்னின் செயிண்ட் கில்டா (St Kilda) கடற்கரைப் பகுதி ஆகிய இடங்களில் உள்ள சுமார் 5,000 சிறு பெங்குவின்களுக்குத் தடுப்பூசி போடப்படும் என்று அரசு தெரிவித்தது. காட்டுப் பறவைகளுக்குத் தடுப்பூசி போடுவது சவாலானது என்றாலும், பிலிப் தீவு மற்றும் செயிண்ட் கில்டாவில் உள்ள சிறு பெங்குவின்கள் பொதுவாக ஒவ்வொரு இரவும் தங்களின் அதே வளைகளுக்குத் திரும்புவதால் இது சாத்தியமாகக் கருதப்படுகிறது.
இருப்பினும், இந்தத் தடுப்பூசிக்கு சில வார இடைவெளியில் இரண்டு டோஸ்கள் செலுத்தப்பட வேண்டும்.
பிலிப் தீவில் இந்தத் தொற்று கண்டறியப்பட்டுள்ளது, சில சிறு பெங்குவின்கள் நோயெதிர்ப்புச் சக்தியைப் பெறுவதற்கு தாமதமாகிவிட்டதோ என்ற கவலையை ஏற்படுத்தியுள்ளது.
விக்டோரியாவின் தலைமை பல்லுயிர் பெருக்க அதிகாரி ஜேம்ஸ் டோட் (James Todd), சிறு பெங்குவின் ஒன்றில் இந்த ஆபத்தான வைரஸ் கண்டறியப்பட்டுள்ளது குறித்து விக்டோரியா மக்கள் கவலை அடைவார்கள் என்பதைப் புரிந்துகொள்வதாகத் தெரிவித்தார்.
“பிலிப் தீவில் உள்ள சிறு பெங்குவின் ஒன்றில் இந்தத் தொற்று கண்டறியப்பட்டுள்ளது கவலைக்குரிய விஷயம் என்பதை நாங்கள் அறிவோம்” என்றார் அவர்.
