தமிழக மீனவர்கள் கைது; மத்திய அரசுக்கு முதல்வர் விஜய் கடிதம்!

கச்சத்தீவு அருகே மீன்பிடித்துக்கொண்டிருந்ததாகக் கூறப்படும் நிலையில், தமிழகத்தைச் சேர்ந்த ஒன்பது இந்திய மீனவர்கள் இலங்கை கடற்படையினரால் கைது செய்யப்பட்ட விவகாரத்திலும், அவர்களது விசைப்படகு பறிமுதல் செய்யப்பட்ட விவகாரத்திலும் மத்திய அரசு உடனடியாகத் தூதரக ரீதியாகத் தலையிடக் கோரி, தமிழக முதல்வர் சி. ஜோசப் விஜய் வெளியுறவுத்துறை அமைச்சர் எஸ். ஜெய்சங்கருக்கு  கடிதம் எழுதினார்.

அதிகாரப்பூர்வ அறிவிப்பின்படி, ராமநாதபுரம் மாவட்டத்தைச் சேர்ந்த மீனவர்கள் ஆகஸ்ட் 12 ஆம் திகதி இரவு இலங்கை கடற்பரப்பிற்குள் சட்டவிரோத மீன்பிடி நடவடிக்கையை மேற்கொண்ட குற்றச்சாட்டின் பேரில் இலங்கை கடற்படையினரால் கைது செய்யப்பட்டுள்ளனர்.

ஆகஸ்ட் மாதத்தில் மட்டும் பதிவாகியுள்ள இத்தகைய இரண்டாவது சம்பவம் இதுவாகும்.

தற்போதைய நிலவரப்படி, 49 இந்திய மீனவர்கள் தொடர்ந்து இலங்கை வசம் உள்ளதாக இந்திய ஊடகங்கள் செய்தி வெளியிட்டுள்ளன.

இதற்கிடையில், ராமேஸ்வரத்தில் மீனவச் சமூகத்தினர் இந்த கைது நடவடிக்கைகள் குறித்துத் தங்கள் அதிருப்தியை வெளிப்படுத்தியதுடன், உடனடி நடவடிக்கைகள் எடுக்கப்படாவிட்டால் போராட்டங்கள் நடத்தப்படும் என்றும் எச்சரித்தனர்.

கடந்த ஒன்றரை மாதங்களில் அந்தத் தீவு நாட்டின் கடற்படையால் கைப்பற்றப்பட்ட மூன்றாவது படகு இது என்று சேவியர் மீனவர் சங்கத் தலைவர் சகாயம் சேவியர் குறிப்பிட்டார்.

ராமேஸ்வரத்திலிருந்து இயங்கும் 600-க்கும் மேற்பட்ட இயந்திரப் படகுகளில், 300-க்கும் சற்று அதிகமான படகுகள் மட்டுமே ஆகஸ்ட் 12 அன்று கடலுக்குச் சென்றதாக உள்ளூர் மீனவர்கள் தெரிவித்தனர்.

இலங்கை கடற்படை குறித்த தொடர் அச்சமே இதற்குக் காரணமாகும் என்றும் அவர்கள் குறிப்பிட்டனர்.