13 வயதுச் சிறுமி பாலியல் துஷ்பிரயோகம் சித்தப்பாவுக்கு 12 ஆண்டுகள் கடூழியச் சிறை; மட்டக்களப்பு மேல் நீதிமன்றம் தீர்ப்பு
மட்டக்களப்புப் பகுதியைச் சேர்ந்த 13 வயதுச் சிறுமியைப் பாலியல் துஷ்பிரயோகம் செய்த குற்றத்துக்காக, அவரது சித்தப்பாவான க.ஜெயானந்தம் (வயது 35) என்பவருக்கு இரு குற்றச்சாட்டுகளின் கீழ் 12 ஆண்டுகள் கடூழியச் சிறைத் தண்டனையும், 10,000 ரூபா அபராதமும் விதித்து மட்டக்களப்பு மேல் நீதிமன்ற நீதிபதி ரி.ஜே. பிரபாகரன் தீர்ப்பளித்தார். அத்துடன், பாதிக்கப்பட்ட சிறுமிக்கு 50,000 ரூபா நஷ்டஈடு வழங்குமாறும் உத்தரவிட்டார்.
2019ஆம் ஆண்டு மே மாதம் 19ஆம் திகதி, 13 வயதுச் சிறுமியை அவரது சித்தப்பா (வயது 35) பாலியல் துஷ்பிரயோகம் செய்ததாகச் சிறுமியின் உறவினர்கள் பொலிஸ் நிலையத்தில் முறைப்பாடு செய்தனர். இதனையடுத்தே அவர் கைது செய்யப்பட்டார்.
அவருக்கு எதிராக, தண்டனைச் சட்டக் கோவையின் 354ஆம் பிரிவின் கீழ் ‘சிறுமியைக் கடத்திச் சென்றமை’ மற்றும் 364ஆம் பிரிவின் கீழ் ‘பாலியல் துஷ்பிரயோகம் செய்தமை’ ஆகிய இரு குற்றச்சாட்டுகளின் கீழ் பொலிஸார் மட்டக்களப்பு மேல் நீதிமன்றத்தில் வழக்குத் தாக்கல் செய்தனர்.
இவ்வழக்கின் விசாரணைகள் தொடர்ந்து நடைபெற்று வந்த நிலையில், அரசுத் தரப்பில் அரச சட்டவாதிகளான எஸ். அனுஷாங்கன் மற்றும் பி. தர்சிகா ஆகியோர் ஆஜராகி வாதாடினர்.
விசாரணைகளின் முடிவில், அவர் குற்றவாளி எனச் சென்ற மாதம் (24.08.2026) நீதிமன்றத்தால் தீர்மானிக்கப்பட்டு, வெள்ளிக்கிழமை (18) தண்டனை விவரங்கள் அறிவிக்கப்படும் என நீதிபதி தெரிவித்திருந்தார்.
அதன்படி, முதலாவது குற்றச்சாட்டான ‘சிறுமியைக் கடத்திச் சென்றமைக்கு’ 2 ஆண்டுகள் கடூழியச் சிறைத் தண்டனையும் 5,000 ரூபா அபராதமும், இரண்டாவது குற்றச்சாட்டான ‘பாலியல் துஷ்பிரயோகம் செய்தமைக்கு’ 10 ஆண்டுகள் கடூழியச் சிறைத் தண்டனையும் 5,000 ரூபா அபராதமும் விதிக்கப்பட்டது. மேலும், பாதிக்கப்பட்ட சிறுமிக்கு 50,000 ரூபா நஷ்டஈடு செலுத்துமாறும் மேல் நீதிமன்ற நீதிபதி ரி.ஜே. பிரபாகரன் தீர்ப்பளித்தார்.
