செர்பியாவில் கூட்டு ராணுவ பயிற்சியில் நேட்டோ: ரஷ்ய உறவை முறிக்கிறதா பால்கன் நாடு?…  ஐங்கரன் விக்கினேஸ்வரா

ஐரோப்பிய அரசியலில் நீண்டகாலமாக நடுநிலை நாடு என்ற அடையாளத்தை காத்து வந்த செர்பியா (Serbia), தற்போது ஒரு முக்கியமான மாற்றத்தின் வாசலில் நிற்கிறது. ஒருகாலத்தில் தனது தலைநகர் பெல்கிரேட்டை குண்டுவீசிய நேட்டோவுடனே கூட்டு ராணுவப் பயிற்சியில் ஈடுபடுவது, பால்கன் பிராந்திய அரசியலில் புதிய அத்தியாயத்தைத் தொடங்கியுள்ளது.

கொசோவோப் போரில் நேட்டோ :

கொசோவோப் போரின் காயங்கள் இன்னும் செர்பிய மக்களின் நினைவில் உயிரோடு இருக்கும் நிலையில், இந்த இராணுவ ஒத்துழைப்பு உலக அரசியலில் பல கேள்விகளையும் புதிய விளக்கங்களையும் உருவாக்குகிறது. 1999 ஆம் ஆண்டு நடைபெற்ற கொசோவோப் போர் (Kosovo War) காலத்தில், நேட்டோ தலைமையிலான கூட்டுப்படைகள், முன்னாள் யுகோஸ்லாவிய நாட்டில் இருந்த செர்பியா அரசின் மீது விமானத் தாக்குதல்களை கோரமாக மேற்கொண்டன. குறிப்பாக பெல்கிரேட் (Belgrade) மீது நடத்தப்பட்ட குண்டுவீச்சுகள் செர்பிய மக்களின் தேசிய மனநிலையை ஆழமாகப் பாதித்தன.

நேட்டோவின் கொடூரமான வான் தாக்குதல்களில் அரசு கட்டிடங்கள், பாலங்கள், தகவல் தொடர்பு மையங்கள் மட்டுமன்றி பொதுமக்களும் பலர் உயிரிழந்தனர். நேட்டோவின் நடவடிக்கை மனித உரிமை பாதுகாப்பு என்ற பெயரில் நடந்தாலும், செர்பிய சமூகத்தில் அது இன்னும் அரசியல் அவமதிப்பு மற்றும் மேற்கத்திய ஆக்கிரமிப்பு என்றே இன்றும் நினைவு கூரப்படுகிறது.

முப்பது ஆண்டுகளுக்கு முன்பு செர்பிய தலைநகர் பெல்கிராட் மீது குண்டு வீசிய நேட்டோ கூட்டணிக்கும், இந்த பால்கன் நாட்டிற்கும் இடையிலான ஒரு வரலாற்றுச் சிறப்புமிக்க ஒத்துழைப்பாக, செர்பியாவும் நேட்டோவும் தங்களின் முதல் கூட்டு இராணுவப் பயிற்சியை தற்போது தொடங்கியுள்ளன.

மே 12 தொடங்கி மே 23 வரை நடைபெறும் இந்த இரண்டு வார காலப் பயிற்சிகளில், செர்பியா, இத்தாலி, ருமேனியா மற்றும் துருக்கி ஆகிய நாடுகளைச் சேர்ந்த சுமார் அறுநூறு வீரர்கள் பங்கேற்கின்றனர். பிரான்ஸ், ஜெர்மனி, இத்தாலி, மாண்டினீக்ரோ, ருமேனியா, செர்பியா, துருக்கி, ஐக்கிய இராச்சியம் மற்றும் அமெரிக்கா ஆகிய நாடுகளைச் சேர்ந்த இராணுவத் திட்டமிடுபவர்களும் பார்வையாளர்களும் இதில் பங்கேற்கின்றனர்.

பால்கன் பிராந்தியத்தில் நீண்ட அமைதியையும் நிலையான ஸ்திரத்தன்மையையும் பாதுகாப்பதே இந்த ஒத்துழைப்பின் நோக்கம் என்று செர்பியாவின் பாதுகாப்பு அமைச்சகம் கூறியது. இந்தப் பயிற்சியின் திட்டமிடல், இந்தக் கூட்டு முயற்சியின் ஒரு முக்கியப் பகுதியாக இருந்துள்ளது. நேட்டோ மற்றும் செர்பிய ஆயுதப் படைகள் ஆகிய இரண்டுக்கும் பெரிய சர்வதேசப் பயிற்சிகளைத் திட்டமிடுவதில் நீண்டகால அனுபவம் உள்ளது.

இந்த தந்திரோபாய இராணுவ பயிற்சி, நேட்டோவின் ‘அமைதிக்கான கூட்டாண்மை’ திட்டத்தின் கீழ் வருகிறது. இதில் செர்பியா கிட்டத்தட்ட இருபது ஆண்டுகளாக ஒரு அங்கமாக இருந்து வருகிறது. அந்நாடு நேட்டோ உறுப்பினர்களுடன் தொடர்ந்து பயிற்சிகளில் பங்கேற்று வந்தாலும், இந்தக் கூட்டணியுடன் நேரடியாக நடத்தப்படும் முதல் பயிற்சி இதுவாகும்.

பெல்கிராட் துயரமான வரலாற்று நினைவுகளுக்கிடையே தற்போது இரண்டு வாரங்கள் நீடிக்கும் கூட்டு ராணுவப் பயிற்சியை செர்பியா நடத்துவது மிகப்பெரிய அரசியல் திருப்பமாகவும் பார்க்கப்படுகிறது. இந்தப் பயிற்சி வெறும் ராணுவ ஒத்துழைப்பாக மட்டும் இல்லாமல், ஐரோப்பிய பாதுகாப்பு கட்டமைப்பில் செர்பியா எவ்வாறு தன்னுடைய இடத்தை மறுசீரமைக்கிறது என்பதற்கான அடையாளமாகவும் கருதப்படுகிறது.

செர்பியா கடந்த பல ஆண்டுகளாக ஒருபுறம் ரஷ்யாவுடன் பாரம்பரிய நட்புறவைத் தொடர்ந்தும், மறுபுறம் ஐரோப்பிய ஒன்றியத்துடனும் பாதுகாப்பு அமைப்புகளுடனும் உறவை மேம்படுத்தியும் வந்துள்ளது. இந்த இரட்டை அணுகுமுறை, கிழக்குக்கும் மேற்குக்கும் இடையிலான சமநிலை அரசியல் என்று விவரிக்கப்படுகிறது. ஆனால் உக்ரைனிய போரின் பிறகு ஐரோப்பாவின் பாதுகாப்பு அரசியல் வேகமாக மாறியதால், செர்பியாவும் தன்னுடைய ராணுவ மற்றும் வெளியுறவுக் கொள்கைகளை மறுபரிசீலனை செய்ய வேண்டிய நிலைக்கு தள்ளப்பட்டுள்ளது.

நிகழ் காலத்தில் இந்தப் பயிற்சிகள் மூலம் நேட்டோ, பால்கன் (Balkan) பிராந்தியத்தில் தனது செல்வாக்கை மேலும் வலுப்படுத்த முயல்கிறது. ஏற்கனவே கொசோவோவில் நேட்டோ தலைமையிலான KFOR அமைதி படைகள் செயல்பட்டு வருகின்றன. அதேசமயம், செர்பியாவின் உள்நாட்டில் இந்த ஒத்துழைப்புக்கு எதிர்ப்பு குரல்களும் எழுகின்றன. குறிப்பாக தேசியவாத அரசியல் இயக்கங்கள், நேற்றைய எதிரியுடன் இன்று இணைவது வரலாற்றை மறப்பது என கடுமையாக விமர்சிக்கின்றன.

ஆனாலும் இன்னொரு புறம், நடைமுறை அரசியல் நோக்கில் பார்க்கும் போது, செர்பியாவுக்கு இது பாதுகாப்பு மற்றும் தொழில்நுட்ப ரீதியாக பல நன்மைகளை வழங்கக் கூடும். நேட்டோ நாடுகளுடன் இணைந்து செயல்படுவது, நவீன ராணுவப் பயிற்சி, தகவல் பரிமாற்றம், பாதுகாப்பு ஒருங்கிணைப்பு ஆகிய துறைகளில் செர்பியாவுக்கு புதிய அனுபவத்தை வழங்குகிறது. மேலும், ஐரோப்பிய ஒன்றியத்தில் இணைவதற்கான தனது நீண்டகால நோக்கத்துக்கும் இது ஒரு சைகையாகக் கருதப்படுகிறது.

இந்த மாற்றம், உலக அரசியலின் அடிப்படை உண்மையையும் மீண்டும் நினைவூட்டுகிறது. சர்வதேச நாடுகளில் நிரந்தர நண்பர்களோ எதிரிகளோ இல்லை. நிரந்தரமானது அவர்களின் தேசிய நலன்கள் மட்டுமே. ஒருகாலத்தில் குண்டு வீச்சின் சத்தம் கேட்ட இடங்களில் இன்று கூட்டுப் பயிற்சியின் ஒத்துழைப்பு மொழி ஒலிக்கிறது. அதுவே சர்வதேச அரசியலின் முரண்பாடான இயல்பாகும். இது எதிர்காலத்தில் உக்ரைன் மீண்டும் கைகோர்க்கும் வாய்ப்புகளும் உள்ளன.

கொசோவோ போரின்போது, ​​1999இல் செர்பியாவுக்கு எதிராக நேட்டோ நடத்திய வான்வழித் தாக்குதலைத் தொடர்ந்து, செர்பியாவில் நேட்டோ ஒரு எதிர்ப்பு நிலை மனோபாவமாக இருந்து வருகிறது. 1999 போர் முடிவடைந்ததிலிருந்து, நேட்டோ தலைமையிலான ஒரு அமைதிப்படை கொசோவோவில் நிலை நிறுத்தப்பட்டுள்ளது. மேலும், செர்பியா தனது முன்னாள் கொசோவா மாகாணத்தின் சுதந்திரப் பிரகடனத்தை ஒருபோதும் அங்கீகரித்ததில்லை.

ஐரோப்பிய ஒன்றியத்தில் இல்லாத சில பால்கன் நாடுகளில் செர்பியாவும் ஒன்றாகும். அது நேட்டோ மற்றும் ரஷ்யா ஆகிய இரு நாடுகளுடனும் நெருங்கிய உறவுகளைப் பேணிவரும் அதே வேளையில், நடுநிலைமைக் கொள்கையையும் கடைப்பிடித்து வருகிறது. கடந்த பத்து ஆண்டுகளில், ரஷ்யா மற்றும் சீனாவிடமிருந்து ஆயுதங்களை வாங்குவதோடு, நேட்டோ உறுப்பு நாடுகளிடமிருந்தும் ஆயுதங்களை வாங்குவதன் மூலம் செர்பியா தனது இராணுவத் திறன்களைக் கணிசமாக வலுப்படுத்தியுள்ளது.

செர்பியா – நேட்டோ உறவின் இந்த புதிய கட்டம் எதிர்காலத்தில் பால்கன் பிராந்தியத்தின் பாதுகாப்பு அமைப்பையே மாற்றக்கூடியதாக இருக்கலாம். ஆனால் வரலாற்றுக் காயங்கள் முழுமையாக ஆறாமல் இருக்கும் நிலையில், இந்த ஒத்துழைப்பு எவ்வளவு நிலைத்திருக்கும் என்பது இன்னும் திறந்த கேள்வியாகவே உள்ளது.