போக்ரோவ்ஸ்கை கைப்பற்றிய ரஷ்யா!… உக்ரேன் படைக்கு பாரிய பின்னடைவு….  ஐங்கரன் விக்கினேஸ்வரா

ரஷ்யப் படைகள் கிழக்கு உக்ரேனிய நகரமான போக்ரோவ்ஸ்கை (Pokrovsk) இறுதியாகக் கைப்பற்றி இருப்பதாகத் தெரிகிறது. இது ஜனாதிபதி விளாடிமிர் புட்டின் கடந்த 21 மாதங்களாக அதிக விலை கொடுத்துத் தேடிய ஒரு அடையாள (Symbolic Victory) வெற்றியாகும்.

ரஷ்யப் படைகள் வெற்றிகரமாக இந்த நகரத்திற்குள் ஊடுருவிய பின்னர், கடந்த சில நாட்களில் நகரத்திற்குள் சண்டை தீவிரமடைந்தது. போக்ரோவ்ஸ்கின் வீழ்ச்சியின் விளைவாக உக்ரைனிய படைகளுன் மூலோபாய வழிகள் குறைந்துவிட்டன.

2023 க்குப் பிறகு மாஸ்கோ மிகப்பெரிய வெற்றியைக் கண்டுள்ளது.

போக்ரோவ்ஸ்க் போர்க்களத்தில் உக்ரேனியப் படைகள் ஏற்கனவே சுற்றி வளைக்கப்பட்டுவிட்டன என்ற ரஷ்ய கூற்றுக்களை கீவ் அரசு மறுத்தாலும், ரஷ்ய முன்னேற்றத்தைத் தடுக்கும் தீவிர நடவடிக்கைகள் இன்னும் நடந்து வருவதாக கூறுகிறது. ஆனால் தரையில் உள்ள உக்ரேனிய வீரர்கள் கொடூரமான யுத்த யதார்த்தத்தை விவரித்துள்ளனர்.

பல மாதங்களாக நீடித்த கடுமையான சண்டைக்குப் பிறகு, அக்டோபர் 7, 2025 போர் தீவிரமாக நடந்து வருகின்றது. நகர்ப்புறங்களில் துப்பாக்கிச் சண்டைகள் மற்றும் அனைத்து வகையான ஆயுதங்களுடனும் ஷெல் தாக்குதல்கள் நடத்தப்படுகின்றன. நிலைமை மிக கடினமாக உள்ளது என்று ஒரு உக்ரைனிய பட்டாலியன் தளபதி கூறியுள்ளார்.

நாங்கள் கிட்டத்தட்ட சுற்றி வளைக்கப்பட்டுள்ளோம், ஆனால் நாங்கள் அதற்குப் பழகிவிட்டோம் என்று அவர் கூறினார். ரஷ்ய இராணுவம் தொடர்ந்து அதிக எண்ணிக்கையிலான வீரர்களுடன் முன்னேறி வருவதாகக் கூறினார்.

அவர்களுடைய இராணுவ நகர்வுகளின் தீவிரம் மிக அதிகமாக இருப்பதால் உக்ரேனிய ட்ரோன் இயக்குபவர்கள் வேகத்தைத் தக்க வைத்துக் கொள்ள முடியாது தவிக்கின்றனர். ரஷ்யர்கள் பெரும்பாலும் மூன்று குழுக்களாக நகர்கிறார்கள், இரண்டு பேர் அழிக்கப்படுவார்கள் என்ற உண்மையை எண்ணி, ஆனால் ஒருவர் இன்னும் நகரத்தை அடைந்து அங்கு கால் பதிப்பார் என்ற நம்பிக்கையில் இருக்கிறார்கள். இதுபோன்ற சுமார் நூறு குழுக்கள் மூலம் ஒரு நாளில் கடந்து செல்ல முடியும் என்று அவர்கள் நம்புகிறார்கள்.

களத்தில் ரஷ்யா ஒரு எதிரியை கடந்து செல்ல இரண்டு வீரர்களை தியாகம் செய்யத் தயாராக உள்ளது. அதேசமயம் போக்ரோவ்ஸ்க்கைச் சுற்றி மிக அதிக எண்ணிக்கையிலான ரஷ்ய உயிரிழப்புகள் நிகழ்ந்துள்ளன என சர்வதேச ஆராய்ச்சியாளர்கள் தெரிவித்துள்ளனர்.

ஆரம்பத்தில் போக்ரோவ்ஸ்க்குக்கான போர் ஒரு மூலோபாய முக்கியத்துவம் வாய்ந்த தளவாட மையத்திற்கான போராட்டமாக கருதப்பட்டது. அது இப்போது ஒரு குறியீட்டு போராகவும் மாறியுள்ளது.

போக்ரோவ்ஸ்க் அதன் சாலை மற்றும் ரயில் இணைப்புகள் காரணமாக உக்ரேனியர்களுக்கு ஒரு முக்கிய நகரமாக நீண்ட காலமாகக் காணப்பட்டது. இது பல முக்கிய சாலைகளின் சந்திப்பில் அமைந்துள்ளதுடன், கிழக்கில் டொனெட்ஸ்க் மற்றும் கோஸ்ட்யான்டினிவ்காவிற்கும் மேற்கில் டினிப்ரோ மற்றும் சபோரிஷியாவிற்கும் இடையில் உள்ளது.

உக்ரேனிக்கு இது செயல்பாட்டு ரீதியாக முக்கியத்துவம் வாய்ந்தது. ஏனெனில் இது உக்ரேனிய தளவாட விநியோக மையமாக உள்ளது. மேலும் சிறிய கிராமங்களிலும் போக்ரோவ்ஸ்கைச் சுற்றியுள்ள களத்திலும் உள்ள மற்ற உக்ரேனிய தந்திரோபாய நிலைகளை விரிவுபடுத்தி வந்ததும் குறிப்பிடத்தக்கது.

இருப்பினும், கடந்த கோடைகாலத்தில் ரஷ்யா போக்ரோவ்ஸ்கை சுற்றி வளைக்கத் தொடங்கியவுடன் நிலைமை மாறியது. முக்கிய நெடுஞ்சாலை மற்றும் ரயில் பாதையில் அடிக்கடி ஏற்படும் ட்ரோன் மற்றும் பீரங்கித் தாக்குதல்கள், கீவ்வை மாற்று விநியோக வழிகளைக் கண்டுபிடிக்க கட்டாயப்படுத்தியுள்ளன.

உக்ரேனிய படைகள் தற்போது மைய செயல்பாட்டை போக்ரோவ்ஸ்கிலிருந்து வேறு இடத்திற்கு மாற்றியுள்ளன. இது ரஷ்யர்களுக்கு ஒரு பெரிய வெற்றியாகும். இந்த நகரம் உக்ரைனின் கடைசியாக இயங்கிய கோக்கிங் நிலக்கரி சுரங்கத்தையும் நடத்தியது. ஆனால் அது இந்த ஆண்டு தொடக்கத்தில் மூடப்பட வேண்டிய கட்டாயம் ஏற்பட்டது.

போக்ரோவ்ஸ்க் தாக்குதலை வலுப்படுத்த ரஷ்யா இப்பகுதியில் சுமார் 170,000 துருப்புக்களை குவித்துள்ளதாக உக்ரைன் ஜனாதிபதி வோலோடிமிர் ஜெலென்ஸ்கி தெரிவித்துள்ளார்.

போரின் விளைவால் போக்ரோவ்ஸ்க் தற்போது பெரும்பாலும் அழிக்கப்பட்டு, அதன் மூலோபாய முக்கியத்துவம் குறைந்து விட்டது.

மே 2023 இல் பக்முட்டிற்குப் பிறகு ரஷ்யா கைப்பற்றிய மிகப்பெரிய நகரமாக போக்ரோவ்ஸ்க் இருக்கிறது. இந்த போருக்கு முன்பு சுமார் 60,000 பேர் போக்ரோவ்ஸ்கில் வசித்து வந்தாலும், பிப்ரவரி 2022 இல் ரஷ்யா தனது முழு அளவிலான படையெடுப்பைத் தொடங்கியதிலிருந்து பெரும்பான்மையானவர்கள் வெளியேறிவிட்டனர். உக்ரேனிய அதிகாரிகளின் கூற்றுப்படி இறுதிக் கட்டத்தில் சுமார் 1,200 பொதுமக்கள் மட்டுமே நகரத்தில் வசித்து வந்தனர்.

ஆனால் அங்கு எஞ்சியவர்களில் சிலர் தப்பிச் செல்வதற்கான வாய்ப்பைத் தவறவிட்டனர் என்றும், உக்ரேனிய அதிகாரிகள் தற்போது வெளியேற்றங்கள் சாத்தியமற்றது என்றும் கூறியுள்ளனர்.

இதேவேளை ரஷ்ய பாதுகாப்பு அமைச்சகம் ஏற்கனவே போக்ரோவ்ஸ்க் குடியிருப்பாளர்களை ரஷ்ய பக்கம் வெளியேற்றுவதைக் காட்டும் ஒரு வீடியோவைப் பகிர்ந்துள்ளது.

போர்க்களத்தில் ரஷ்யாவின் இராணுவ வெற்றி தவிர்க்க முடியாதது என்று முன்வைக்க முயற்சிக்கும் ஒரு மூலோபாய தகவல் பிரச்சாரத்தை புட்டின் சிறப்புற நடத்தி வருகிறார்.

கிழக்கு உக்ரைனில் உள்ள டொனெட்ஸ்க் மற்றும் லுஹான்ஸ்க் பகுதிகள் முழுவதையும், தெற்கில் உள்ள கெர்சன் மற்றும் சபோரிஷியாவையும் கைப்பற்றுவதே தனது இலக்கு என்பதை புட்டின் தெளிவுபடுத்தியுள்ளார்.

போக்ரோவ்ஸ்கைக் கைப்பற்றியதன் விளைவாக, உக்ரேன் தனது கவனத்தை வேறு இடத்திற்கு மாற்ற வேண்டிய கட்டாயத்தில் உள்ளது. அதாவது இந்த பிராந்தியத்தில் உக்ரேனிய பாதுகாப்பின் முதுகெலும்பாக இருக்கும் அதன் வடகிழக்கில் உள்ள தொழில்துறை நகரங்களை நோக்கி நகர வேண்டியுள்ளது.

உக்ரேனிய படையின் தலைமை போக்ரோவ்ஸ்கில் எஞ்சியிருப்பதை முடிந்தவரை நீண்ட காலம் தக்க வைத்துக் கொள்ள முயற்சித்தது. இருப்பினும் இந்தப் பகுதியில் உள்ள துருப்புக்களின் முக்கிய கவலை என்னவென்றால் இன்னும் பல ஆயிரம் படைகளை இழக்க வேண்டியிருக்கும் என்பதே. அதேபோல உக்ரைனிய அரசுக்கு இந்த நகரத்தை கைவிடுவது ஒரு பெரிய தோல்வியாகக் கருதப்படும்.

ஆனால் தற்போது போக்ரோவ்ஸ்க்கின் வீழ்ச்சி தவிர்க்க முடியாதது என்பதை அனைவரும் ஏற்கனவே புரிந்துகொண்டிருந்தனர். ஆனால் பின்வாங்குவதற்கான எந்த உத்தரவும் உக்ரைனிய அதிபரிடமிருந்து கிடைக்கவில்லை.

மிக நீண்ட காலமாக போர்க் களத்தில் தடுத்து வைக்கப்பட்ட உக்ரைனிய படைகள் சோர்வடைந்தன. மேலும் விநியோக வலுவூட்டல்கள் சரியான நேரத்தில் அனுப்பப்படவில்லை என்ற குற்றச்சாட்டும் உள்ளது.

உக்ரேனியர்கள் நீண்ட காலம் தாக்குப் பிடிக்க முடியாமல் பின்வாங்குவதும், மிகவும் ஆபத்தானதாக மாறியுள்ளது. இதுவே கிய்வின் படைகளுக்கு முந்தைய வேதனையான அனுபவங்களை மீண்டும் மீண்டும் நினைவூட்டி உள்ளது.

2023 இல் பக்முட் மற்றும் 2024 இல் அவ்திவ்கா போர்கள் இரண்டும் தாமதமான பின்வாங்கல்களால் உக்ரேனிய படைகள் பாரிய இராணுவ தோல்வியை சந்தித்தன. இந்த போரில் உக்ரேனிய வீரர்களின் அதிக உயிரிழப்புக்கு வழிவகுத்தது. இம்முறையும் அதே அவமானகரமான தோல்வியை உக்ரைனிய அரசு எதிர்கொண்டுள்ளது.

நேட்டோவின் ஏவுகணைகளை நம்பியுள்ள உக்ரைன் தனது படைகளை பாரியளவில் இழந்து வருகிறது. மாதம் ஒன்றுக்கு 30000 உக்ரைனிய படைகள் கொல்லப்பட்டோ, காயமடைந்தோ போர்க்களத்தில் இருந்து வெளியேற்றப்படுவதாக முன்னாள் உக்ரைனிய ராணுவ அதிகாரி தெரிவித்துள்ளார்.