ஜனாதிபதி வேட்பாளர்களுக்கு பாதுகாப்பு அச்சுறுத்தல்: நேரடி தலையீடு இல்லை என்கிறது தேர்தல் ஆணைக்குழு

ஜனாதிபதி வேட்பாளர்களின் பாதுகாப்பில் தமக்கு நேரடிப் பங்கு இல்லையென்றாலும், விசேட கோரிக்கையின் பேரில் சில தலையீடுகளை மேற்கொள்ளவுள்ளதாக தேர்தல்கள் ஆணைக்குழு (EC) தெளிவுபடுத்தியுள்ளது.

ஜனாதிபதி வேட்பாளர்களில் சிலரது பாதுகாப்புக்கு அச்சுறுத்தல் விடுக்கப்பட்டுள்ள நிலையில், பல ஜனாதிபதி வேட்பாளர்கள் பாதுகாப்பு அதிகாரிகளை நியமிக்க மறுத்துள்ளதாக பொலிஸார் அண்மையில் குறிப்பிட்டுள்ளனர்.

இது குறித்து ​​தேர்தல் ஆணையத்தின் தலைவர் ஆர்.எம்.ஏ.எல்.ரத்நாயக்க கருத்து வெளியிடுகையில்,

இந்த விடயத்தில் தங்களுக்கு நேரடியான பங்கு இல்லை எனவும், “வேட்பாளர்களின் பாதுகாப்பு தொடர்பான முடிவுகளை எடுக்க அரசாங்கத்தால் ஒரு குழு நியமிக்கப்பட்டதாகவும் குறிப்பிட்டுள்ளார்.

அந்தக் குழு குறிப்பிட்ட பணியைச் செய்ய உறுதிபூண்டுள்ளது. எனவே, அவர்கள் தேவையான ஏற்பாடுகளைச் செய்வார்கள்.”

யாராவது கோரிக்கை வைத்தால் தேர்தல் ஆணையம் தலையிடும் என்றும் அவர் கூறினார்.

“நாங்கள் தலையிடுவதற்கு ஏதேனும் கோரிக்கை இருந்தால், நாங்கள் நடவடிக்கை எடுப்போம். இருப்பினும், வேட்பாளர்களின் பாதுகாப்பு தொடர்பாக எங்களுக்கு எந்த முறைப்பாடும் வரவில்லை.” என குறிப்பிட்டுள்ளார்.

இதேவேளை, ஜனாதிபதி வேட்பாளர்களுக்கு பொலிஸ் பாதுகாப்பை வழங்குவதற்கு தயாராக இருக்கும் அதே வேளையில், பலர் அத்தகைய பாதுகாப்பை மறுத்துள்ளதாக பொலிஸ் ஊடகப் பேச்சாளர் நிஹால் தல்துவ தெரிவித்துள்ளார்.

எவ்வாறாயினும், வேட்பாளர்கள் பாதுகாப்பைக் கோரினால், அவர்களுக்கு பாதுகாப்புக்காக பொலிஸ் அதிகாரிகள் நியமிக்கப்படுவார்கள் என அவர் வலியுறுத்தினார்.

எவ்வாறாயினும், இந்த நோக்கத்திற்காக நியமிக்கப்பட்ட பொலிஸ் அதிகாரிகளின் எண்ணிக்கையை அவர் வெளியிடவில்லை, எனினும் பல ஜனாதிபதி வேட்பாளர்களுக்கு அச்சுறுத்தல் உள்ளதை ஒப்புக்கொண்டார்.