பதவியிலிருந்து விலகிய; குமார ஜயகோடியை மீண்டும் அமைச்சராக்குவதற்கு முயற்சி; மரிக்கார் எம்.பி. கூறுகிறார்

முன்னாள் மின்சாரம் மற்றும் எரிசக்தி அமைச்சர் குமார ஜயகோடியை வரும் ஜனவரி மாதத்திற்குள் மீண்டும் அமைச்சராக நியமிக்க அரசாங்கம் தயாராகி வருவதாக ஐக்கிய மக்கள் சக்தி பாராளுமன்ற உறுப்பினர் எஸ்.எம். மரிக்கார் தெரிவித்துள்ளார்.

கொழும்பில் நடைபெற்ற ஊடக சந்திப்பில் உரையாற்றியபோதே மரிக்கார் எம்.பி.இவ்வாறு தெரிவித்தார்.

மின்சாரம் மற்றும் எரிசக்தி அமைச்சகத்தில் ஏற்பட்டுள்ள நெருக்கடி நிலை மற்றும் நிலக்கரி கொள்முதல் செயல்முறையில் உள்ள சிக்கல்கள் காரணமாக, முன்னாள் அமைச்சர் குமார ஜயக்கொடியும், அமைச்சகத்தின் செயலாளர் பேராசிரியர் உதயங்க ஹேமபாலவும் முன்னதாகத் தங்கள் பதவிகளிலிருந்து விலகியிருந்தனர். இத்தகைய பின்னணியில், அவரை மீண்டும் அமைச்சராக நியமிக்க அரசாங்கம் தயாராகி வருவதாக மரிக்கார் எம்.பி. சுட்டிக்காட்டினார்.

மின்சார அமைச்சகத்தின் கூடுதல் செயலாளர் மூலம் தமக்குக் கிடைத்த அலுவல் குழுவின் அறிக்கையை மேற்கோள் காட்டி, தரமற்ற நிலக்கரி இறக்குமதியால் நாட்டிற்கு ஏற்பட்ட மொத்த இழப்பு சுமார் 20 பில்லியன் ரூபா என்று அவர் றினார். இந்த இழப்பை 15.68 பில்லியன் ரூபா எனக் கூறி, தற்போதைய அமைச்சர் அனுர கருணாதிலக்க உண்மையை மறைக்க முயற்சிப்பதாகவும் அவர் குற்றம் சாட்டினார்.

தரமற்ற நிலக்கரியால் 300 மெகாவாட் மின்சார உற்பத்தித் திறன் இழப்பு ஏற்பட்டதால், அந்தப் பற்றாக்குறையை ஈடுசெய்ய மின்சாரம் கொள்முதல் செய்ய ரூ. 8.572 பில்லியன் செலவிடப்பட்டுள்ளது.

தரமற்ற நிலக்கரியிலிருந்து தேவையான மின்சாரத் திறனை உற்பத்தி செய்வதற்காக, உபரி நிலக்கரியை எரித்ததால் ஏற்பட்ட இழப்பு ரூ. 7.099 பில்லியன் ஆகும்.

இயந்திரங்களின் கூடுதல் பராமரிப்பிற்காக ரூ. 80.4 மில்லியனும், தரமற்ற நிலக்கரியால் குவிந்த பெரும் அளவிலான சாம்பலைக் கையாள்வதற்காக ரூ. 13.1 மில்லியனும் செலவிடப்பட்டுள்ளது.

25 கப்பல்களுக்கான ஒப்பந்தப்புள்ளியில் 19 கப்பல்கள் மட்டுமே வந்துள்ளதால், மீதமுள்ள 5 கப்பல்கள் சந்தை விலையை விட ரூ. 2,284 மில்லியன் அதிகமாக அவசரகால கொள்முதல் மூலம் வாங்கப்பட்டுள்ளன.

நிலக்கரி தரம் குறைந்ததாக இருப்பதை உறுதி செய்வதற்காக, அவுஸ்திரேலியாவின் பியூரோ வெரிடாஸ் நிறுவனம் ஒரு கப்பலுக்கு ரூ. 1.4 மில்லியன் அல்லது ரூ. 26.6 மில்லியன்.

செப்டம்பர் 01 முதல் 04 வரை ஒரு கப்பல் தாமதமானதால், மின்சாரம் வாங்கியதோடு கூடுதலாக ரூ. 402.8 மில்லியன் செலவிடப்பட்டுள்ளது.

இந்தக் கணக்கீடுகளுடன் 300 மெகாவாட் பற்றாக்குறையை ஈடுசெய்ய டீசலைப் பயன்படுத்தி மின்சாரம் தயாரிப்பதில் அரசுக்கு ஏற்பட்ட பெரும் இழப்புகள் இந்த அறிக்கைகளில் சேர்க்கப்படவில்லை என்று மரிக்கார் எம்.பி.வலியுறுத்தினார்.

ஒரு லீற்றர் டீசலின் விலை ரூ. 700 ஆக இருந்தபோது, அரசுக்கும் பெட்ரோலியக் கூட்டுத்தாபனத்திற்கும் ஒரு லீற்றருக்கு ரூ. 350 இழப்பு ஏற்பட்டது என்றும், இந்த இழப்பைக் கணக்கிடும்போது, இந்த மோசடியால் ஏற்பட்ட மொத்த இழப்பு ரூ. 20 பில்லியனைத் தாண்டுகிறது என்றும் அவர் கூறினார்.

“பொதுப் பணத்தில் ஒரு சதம் கூட திருடப்படவோ அல்லது வீணடிக்கப்படவோ அனுமதிக்க மாட்டோம் என்று மக்கள் முன்னிலையில் மேடைகளில் வாக்குறுதியளித்த தற்போதைய ஆட்சியாளர்கள், ஆட்சிக்கு வந்த பிறகு மக்களை ஏமாற்றி, இதுபோன்ற பெரிய அளவிலான விரயமான பரிவர்த்தனைகளை மேற்கொண்டு வருகின்றனர்,” என்றும் மரிக்கார் எம்.பி. மேலும் கூறினார்.