நல்லூரில் வைக்கப்பட்ட திலீபனின் திருவுருவச்சிலை அகற்றம்; பின்னணியில் சி.வி.கே : எழுந்துள்ள குற்றச்சாட்டு

யாழ்ப்பாணம் – நல்லூரில் அமைந்துள்ள தியாக தீபம் திலீபன் நினைவிடத்தில் வைக்கப்பட்டிருந்த திலீபனின் திருவுருவச்சிலை  (27) யாழ்ப்பாணம் காவல்துறையினரால் பலவந்தமான முறையில் அகற்றப்பட்டுள்ளதாக தமிழ் தேசிய மக்கள் முன்னணியின் செயலாளர் செல்வராஜா கஜேந்திரன் தெரிவித்துள்ளார்.

இது குறித்து தங்களுக்கு எந்தவித அறிவுறுத்தலும் வழங்காமல் திடீரென வாகனங்களில் வந்த பதினைந்துக்கும் மேற்பட்ட காவல்துறையினர் பாதணிகளுடன் வந்து அந்த சிலையை உடைத்துச்சென்றதாக தங்களுடைய ஆதரவாளர்கள் தெரிவித்ததாக அவர் மேலும் சுட்டிக்காட்டினார்.

இந்த சம்பவத்திற்கு பின்னால் இலங்கைத் தமிழரசுக்கட்சியின் பதில் தலைவர் சி.வி.கே. சிவஞானம் இருக்கின்றார் என்ற வலுவான குற்றச்சாட்டையும் முன்வைப்பதாக அவர் மேலும் குறிப்பிட்டுள்ளார்.

இனவெறிச் செயற்பாடு

இது குறித்து அவர் மேலும் தெரிவிக்கையில், தியாக தீபம் திலீபனின் திருவுருவச்சிலையை உடைத்துச் சென்றமையை வன்மையாக கண்டிக்கின்றேன். இது அநுர அரசாங்கத்தின் இனவெறியின் மற்றுமொரு முகத்தை வெளிப்படுத்துகின்றது.

அநுரகுமார திசாநாயக்க தமிழ் மக்களை ஏமாற்றி வாக்குகளைப் பெறுவதற்காக தன்னுடைய முகவர்களைப் பயன்படுத்தி தேர்தல் காலப்பகுதியில் நினைவேந்தல்களை அனுமதிப்போம், சிலைகளை நிறுவுவோம் என்று மேடை மேடையாகச் சொல்லியிருந்தார்கள்.

அநுர அரசு சார்பில் போட்டியிட்டவர்கள் மாவீரர்களை நினைவுகூருவதற்கான சந்தர்ப்பம் உறுதிப்படுத்தப்படும் என்று பல்வேறு சந்தர்ப்பங்களில் தெரிவித்திருந்தனர்.

முன்வைக்கப்பட்டுள்ள குற்றச்சாட்டு 

மகிந்த ராஜபக்ச மற்றும் கோட்டாபய ராஜபக்ச போன்றோருக்கும் அநுரகுமார திசாநாயக்கவிற்கும் எந்தவித வித்தியாசமும் இல்லை. தமிழர்களுக்கு எதிரான இனவெறி மனப்பான்மை ஒரே மாதிரி இருக்கின்றது என்பதை இந்த செயற்பாடு உறுதிப்படுத்துகின்றது.

கடந்த 18ஆம் திகதி திலீபனின் நினைவேந்தலுக்காக நல்லூரில் உள்ள திலீபன் நினைவேந்தல் பூங்காவில் ஒலி பெருக்கிக்கான அனுமதியை பெற யாழ் மாநகரசபை மேஜரிடம் தமிழ் தேசிய மக்கள் முன்னணி கட்சியின் உறுப்பினர்கள் தொடர்பு கொண்டபோது அவர் கட்சி தலைமை தேவையில்லாத சிக்கல்கள் வரும் என்று தெரிவிப்பதாக தெரிவித்தார்.

இதையடுத்து நான் சி.வி.கே. சிவஞ்ஞானம் ஐயாவுடன் தொடர்பு கொண்டு பேசிய போது அவர் என்னிடம் மிக காட்டமாக கேட்டார், நீங்கள் யாரை கேட்டு இந்த சிலை வைக்கின்றீர்கள், 26ஆம் திகதியோடு இந்த சிலை அகற்றப்படவில்லை என்றால் நான் இந்த சிலையை எடுப்பேன் என என்னிடம் தெரிவித்தார்.

நான் எதிர்பாக்கவில்லை இவர் இவ்வளவு கீழ்த்தரமாக செய்வார் என்று, காவல்துறையினரின் கைக்கூலிகளாக தமிழரசு கட்சி செயற்பட்டிருக்கின்றது என்பதுடன் தமிழரசு கட்சியும் அநுர அரசும் சேர்ந்து தான் இந்த கூட்டு நாடகத்தை ஆடியிருக்கிறார்கள். இந்த செயற்பாட்டிற்கு தமிழரசுக் கட்சி பொறுப்பேற்க வேண்டும்.” என அவர் மேலும் தெரிவித்தார்.