மீண்டும் ஒருமுறை களத்தில் மெஸ்ஸி – பிரியாவிடைக்கு தயாராகும் ஆர்ஜென்டீனா

சர்வதேச கால்பந்துப் போட்டிகளில் இருந்து ஓய்வு பெறுவதாக அறிவித்துள்ள ஆர்ஜென்டீனா அணியின் தலைவர் லியோனல் மெஸ்ஸி, கடைசியாக ஒரு போட்டியில் அந்த அணிக்காக விளையாடவுள்ளார்.

ஆர்ஜென்டீனா அணி வரும் ஒக்டோபர் 6ஆம் திகதி பெனின் அணியுடன் நட்பு ரீதியிலான போட்டியில் விளையாடவுள்ளது. இந்தப் போட்டியில் மெஸ்ஸி கடைசியாக ஒருமுறை களமிறங்க சம்மதித்துள்ளதாக ஆர்ஜென்டீனா கால்பந்து கழகம் தெரிவித்துள்ளது.

39 வயதான மெஸ்ஸி, சர்வதேச போட்டிகளில் இருந்து ஓய்வு பெறுவதாக அண்மையில் சமூக ஊடகப் பதிவொன்றின் மூலம் அறிவித்திருந்தார். இளைஞர்களுக்கு வாய்ப்பளிக்கும் நோக்கில் இந்த முடிவை எடுத்துள்ளதாகவும் அவர் குறிப்பிட்டிருந்தார்.

ஆர்ஜென்டீனா அணிக்காக 2005ஆம் ஆண்டு முதல் 2026ஆம் ஆண்டு வரை 21 ஆண்டுகள் விளையாடிய மெஸ்ஸி, 2022ஆம் ஆண்டு உலகக் கோப்பையை வென்று கொடுத்தார். மேலும், ஆர்ஜென்டீனாவுக்காக அதிகபட்சமாக 125 கோல்களை அடித்த வீரர் என்ற சாதனையையும் அவர் படைத்துள்ளார்.

மெஸ்ஸி திடீரென ஓய்வை அறிவித்ததால், அவருக்கு முறையான பிரியாவிடை வழங்கும் வாய்ப்பு ஆர்ஜென்டீனா அணிக்கு இல்லாமல் போனது. இதையடுத்து, அவரது இறுதிப் போட்டியாக ஒக்டோபர் 6ஆம் திகதி நடைபெறும் பெனின் அணிக்கு எதிரான நட்பு ஆட்டத்தை நடத்த தீர்மானிக்கப்பட்டுள்ளது.

இது தொடர்பாக ஆர்ஜென்டீனா கால்பந்து கழகம், தலைமைப் பயிற்சியாளர் லியோனல் ஸ்கலோனியுடன் கலந்துரையாடி, மெஸ்ஸியை மீண்டும் ஒருமுறை களமிறக்க முடிவு செய்துள்ளதாகவும், அவருக்கான பிரியாவிடை நிகழ்வை அந்தப் போட்டியில் நடத்தவுள்ளதாகவும் தெரிவித்துள்ளது.