ஜப்பான்- ரஷ்யா பிராந்திய முறுகல்…  குரில் தீவுகளுக்கு புட்டின் விஜயம்… ஐங்கரன் விக்கினேஸ்வரா

(புட்டின் குரில் தீவுகளுக்குச் சென்ற நேரமும் முக்கியமானது. ஜப்பான் சரணடைந்த இரண்டாம் உலகப் போரின் முடிவை நினைவுகூரும் ஆகஸ்ட் 15 நாளுக்கு சில நாட்களுக்கு முன்னரே இந்தப் பயணம் நடைபெற்றுள்ளது. இதனால் அதன் அரசியல் தாக்கம் மேலும் அதிகரித்துள்ளது. இந்த பயணம் பசிபிக் பகுதியில் நடைபெற்ற இராணுவ நடவடிக்கைகளின் பின்னணியிலும் இடம்பெற்றுள்ளது. ரஷ்யா சமீப ஆண்டுகளில் குரில் தீவுகளில் தனது இராணுவ இருப்பை வலுப்படுத்தியுள்ளது. இதன் மூலம் மாஸ்கோ, இந்தப் பகுதிகள் ரஷ்யாவின் கட்டுப்பாட்டில் உள்ளன. அவற்றை விட்டுக்கொடுக்கும் எண்ணம் இல்லை என்ற தெளிவான செய்தியை அனுப்புகிறது)

இரண்டாம் உலகப் போரின் முடிவில் சோவியத் ஒன்றியத்தால் கைப்பற்றப்பட்ட குரில் தீவுகளில் (Kuril Islands) ஒன்றான இடுருப் தீவுக்கு ரஷ்ய ஜனாதிபதி விளாடிமிர் புட்டின் மேற்கொண்ட சமீபத்திய பயணம், ரஷ்யா–ஜப்பான் உறவுகளில் நீண்டகாலமாகத் தீர்க்கப்படாமல் இருக்கும் பிராந்தியத் தகராறை மீண்டும் சர்வதேச கவனத்தின் மையத்திற்குக் கொண்டு வந்துள்ளது.

2026 ஆகஸ்ட் 13 அன்று இடுருப் தீவுக்குச் ( Iturup Island) சென்ற புட்டின் அங்குள்ள பாடசாலை, மருத்துவமனை மற்றும் மீன்பிடி உற்பத்தி நிலையம் உள்ளிட்ட இடங்களைப் பார்வையிட்டார். ரஷ்யாவின் கட்டுப்பாட்டில் உள்ள இந்தத் தீவை ஜப்பான் “எதொரோஃபு” என அழைக்கிறது; மேலும் அது தனது வடக்கு பிரதேசங்கள் எனக் குறிப்பிடும் நான்கு தீவுகளில் ஒன்றாகும்.

இந்தப் பயணம் சாதாரண ஜனாதிபதி பயணம் அல்ல. இரு நாடுகளுக்கும் இடையே இரண்டாம் உலகப் போருக்குப் பின்னரும் முறையான சமாதான உடன்படிக்கை கையெழுத்தாகாததற்கு முக்கிய காரணமாகத் தொடரும் ஒரு வரலாற்றுப் பிரச்சினையின் மீது ரஷ்யா தனது நிலைப்பாட்டை மீண்டும் வெளிப்படையாகப் பதிவு செய்த நடவடிக்கையாகவே இது பார்க்கப்படுகிறது.

குரில் தீவுகள் என்பது ரஷ்யாவின் கம்சட்கா தீபகற்பத்திலிருந்து ஜப்பானின் ஹொக்கைடோ தீவு வரை வடக்கு–தெற்காக நீண்டு செல்லும் எரிமலைத் தீவுக்கூட்டமாகும். பசிபிக் பெருங்கடலையும் ஓகோட்ஸ்க் கடலையும் இணைக்கும் முக்கியமான கடல்வழிப் பகுதியில் இத்தீவுகள் அமைந்துள்ளன. இத்தீவுகளில் தெற்குப் பகுதியில் அமைந்துள்ள இடுருப், குனாஷிர், ஷிகோத்தான் மற்றும் ஹபோமாய் தீவுகள்தான் (Iturup, Kunashir,Shikotan, Habomai Islands) தற்போதைய ரஷ்யா–ஜப்பான் பிரச்சினையின் மையப்புள்ளிகள்.

ஜப்பான் இந்நான்கு தீவுகளையும் வடக்கு பிரதேசங்கள் என்று அழைக்கிறது. ரஷ்யா அவற்றை “தெற்கு குரில் தீவுகள்” எனக் குறிப்பிடுகிறது. இரு நாடுகளும் இத்தீவுகளின் மீது தமக்கே இறையாண்மை இருப்பதாகக் கூறுகின்றன. இரண்டாம் உலகப் போரின் முடிவின் பின்னரே பிரச்சினையின் தொடக்கம் உருவானது.

இந்த பிராந்திய தகராறின் மூலம் 1945ஆம் ஆண்டுக்குச் செல்கின்றன.

1945 ஆகஸ்ட் 9 அன்று, ஜப்பானுடன் சோவியத் ஒன்றியம் கொண்டிருந்த நடுநிலை ஒப்பந்தம் இன்னும் நடைமுறையில் இருந்தபோதிலும், சோவியத் படைகள் ஜப்பானுக்கு எதிராகப் போரைத் தொடங்கின. ஜப்பான் ஆகஸ்ட் 14 அன்று போட்ஸ்டாம் பிரகடனத்தை ஏற்றுக்கொண்டு சரணடையத் தயாராக இருப்பதாக அறிவித்த பின்னரும் சோவியத் இராணுவ நடவடிக்கைகள் தொடர்ந்தன என்று ஜப்பானிய வரலாற்றுப் பதிவுகள் கூறுகின்றன.

1945 ஆகஸ்ட் 28 முதல் செப்டம்பர் 5 வரை சோவியத் படைகள் நான்கு தெற்கு குரில் தீவுகளையும் கைப்பற்றின. அதன் பின்னர் அங்கு வசித்திருந்த ஜப்பானிய மக்கள் பெருமளவில் வெளியேற்றப்பட்டனர். ஜப்பானிய அரசின் தரவுகளின்படி, சுமார் 17,000 ஜப்பானியர்கள் அங்கிருந்து வெளியேற்றப்பட்டனர். இதுவே இன்று வரை நீடிக்கும் வடக்கு பிரதேசங்கள் பிரச்சினையின் வரலாற்றுப் பின்னணியாகும்.

ஆனாலும் ரஷ்யாவின் நிலைப்பாடு முற்றிலும் வேறுபட்டது. மாஸ்கோவின் பார்வையில், இரண்டாம் உலகப் போரின் முடிவில் ஏற்பட்ட சர்வதேச ஒப்பந்தங்கள் மற்றும் போருக்குப் பிந்தைய நிலைமைகள் குரில் தீவுகள் மீது சோவியத் ஒன்றியத்தின் உரிமையை உறுதிப்படுத்துகின்றன.

1945ஆம் ஆண்டின் யால்டா (Yalta Agreement) உடன்பாட்டில், ஜப்பானுக்கு எதிரான போரில் சோவியத் ஒன்றியம் இணையும்போது குரில் தீவுகள் சோவியத் ஒன்றியத்துக்குக் கிடைக்கும் என்ற ஏற்பாடு இடம்பெற்றிருந்தது. பின்னர் 1951ஆம் ஆண்டு சான் பிரான்சிஸ்கோ சமாதான உடன்பாட்டில் ஜப்பான் குரில் தீவுகளின் மீதான தனது உரிமைகள், உரிமைத் தலைப்புகள் மற்றும் கோரிக்கைகளைத் துறந்தது. ஆனால் இங்கேதான் முக்கியமான சட்ட மற்றும் வரலாற்று விவாதம் உருவாகிறது.

ஜப்பான், சான் பிரான்சிஸ்கோ உடன்பாட்டில் குறிப்பிடப்பட்ட “குரில் தீவுகள்” என்ற வரையறைக்குள் இடுருப், குனாஷிர், ஷிகோத்தான் மற்றும் ஹபோமாய் அடங்கவில்லை என்று வாதிடுகிறது. மேலும், சோவியத் ஒன்றியம் அந்த சமாதான உடன்பாட்டில் கையெழுத்திடவில்லை என்பதையும் டோக்கியோ சுட்டிக்காட்டுகிறது. இதனால் போருக்குப் பிந்தைய சர்வதேச சட்ட ஆவணங்களின் விளக்கம் தொடர்பாக இரு நாடுகளுக்கும் இடையே அடிப்படை முரண்பாடு இன்னும் நீடிக்கிறது.

தற்போதய புதினின் பயணத்துக்கு ஜப்பான் உடனடியாக கடும் எதிர்ப்புத் தெரிவித்து உள்ளது. ஜப்பானிய பிரதமர் சனே தகாய்ச்சி, இந்தப் பயணம் ஜப்பானிய மக்களின் உணர்வுகளைப் புண்படுத்துவதாகவும் முற்றிலும் ஏற்றுக்கொள்ள முடியாததாகவும் தெரிவித்தார். ஜப்பான் வெளியுறவு அமைச்சகம் ரஷ்ய தூதரை அழைத்து அதிகாரப்பூர்வ எதிர்ப்பையும் பதிவு செய்தது. ஜப்பானின் வெளியுறவு அமைச்சர் தோஷிமிட்சு மொதேகியும், எதொரோஃபு உள்ளிட்ட நான்கு தீவுகளும் வரலாற்று ரீதியாகவும் சர்வதேச சட்டத்தின் அடிப்படையிலும் ஜப்பானின் பிரதேசம் என மீண்டும் வலியுறுத்தினார்.

இதற்கு ரஷ்யா உடனடியாக பதிலளித்தது. மாஸ்கோ, இந்தத் தீவுகள் ரஷ்யாவின் ஒருங்கிணைந்த பகுதிகள் என்றும், ரஷ்ய ஜனாதிபதி தனது நாட்டின் எந்தப் பகுதிக்கும் செல்வதை மற்றொரு நாடு கட்டுப்படுத்த முடியாது என்றும் கூறியது.

குரில் தீவுகளின் முக்கியத்துவம் வெறும் தேசிய உணர்வில் மட்டும் இல்லை. அவை மிக முக்கியமான இராணுவ மற்றும் புவிசார் அரசியல் அமைவிடத்தைக் கொண்டுள்ளன.

குரில் தீவுகள் ஓகோட்ஸ்க் கடலுக்கான கடல்வழி நுழைவாயில்களை கட்டுப்படுத்துகின்றன. ரஷ்யாவின் பசிபிக் கடற்படை நடவடிக்கைகளுக்கும், அதன் தூர கிழக்கு பாதுகாப்புக்கும் இப்பகுதி முக்கியமானது.

மேலும் இப்பகுதி மீன்வளம் மற்றும் கடல்சார் வளங்களால் செழிப்பானது. குறிப்பாக மீன்பிடித் தொழில் உள்ளூர் பொருளாதாரத்தில் முக்கிய இடம் வகிக்கிறது. தீவுகளில் கனிம வளங்களும் இருப்பதாக தகவல்கள் தெரிவிக்கின்றன. ்எனவே, இந்தத் தீவுகளை விட்டுக்கொடுப்பது ரஷ்யாவுக்கு ஒரு சாதாரண நிலப்பரப்பு இழப்பாக இருக்காது. அது பசிபிக் பகுதியில் அதன் இராணுவ மற்றும் கடல்சார் மூலோபாயத்தையும் பாதிக்கக்கூடியதாக இருக்கும்.

எவ்வாறாயினும் இரண்டாம் உலகப் போர் முடிந்து எண்பது ஆண்டுகளுக்கு மேல் கடந்துவிட்ட போதிலும், ரஷ்யாவும் ஜப்பானும் இன்னும் முறையான சமாதான உடன்படிக்கையில் கையெழுத்திடவில்லை. இதற்கு பிரதான தடையாக குரில் தீவுகளின் இறையாண்மை விவகாரம் தொடர்கிறது.

பல தசாப்தங்களாக இரு நாடுகளும் பேச்சுவார்த்தைகளை நடத்தியுள்ளன. சில காலகட்டங்களில் உறவுகள் முன்னேற்றமடைந்தன. குறிப்பாக முன்னாள் ஜப்பானிய பிரதமர் ஷின்சோ அபே மற்றும் புதின் இடையிலான உறவுகளில் இந்தப் பிரச்சினைக்கு ஒரு சமரசத் தீர்வைத் தேடும் முயற்சிகள் இடம்பெற்றன. ஆனால் இறையாண்மை தொடர்பான அடிப்படை முரண்பாட்டை இரு தரப்பும் கடக்க முடியவில்லை.

2022ஆம் ஆண்டு உக்ரைன் மீது ரஷ்யா முழுமையான படையெடுப்பைத் தொடங்கிய பின்னர் நிலைமை மேலும் மோசமடைந்தது. ஜப்பான் மேற்கத்திய நாடுகளுடன் இணைந்து ரஷ்யாவுக்கு எதிராக பொருளாதாரத் தடைகளை விதித்தது. இதனால் ஏற்கனவே சிக்கலான நிலையில் இருந்த இருதரப்பு உறவுகள் மேலும் மோசமடைந்தன.

புட்டின் இப்பயணத்தை வெறும் உள்ளூர் நிர்வாகப் பயணமாகக் கருத முடியாது. அவர் குரில் தீவுகளுக்குச் சென்ற நேரமும் முக்கியமானது. ஜப்பான் இரண்டாம் உலகப் போரின் முடிவை நினைவுகூரும் ஆகஸ்ட் 15 நாளுக்கு சில நாட்களுக்கு முன்னரே இந்தப் பயணம் நடைபெற்றுள்ளது. இதனால் அதன் அரசியல் தாக்கம் மேலும் அதிகரித்துள்ளது. மேலும், இந்த பயணம் பசிபிக் பகுதியில் நடைபெற்ற இராணுவ நடவடிக்கைகளின் பின்னணியிலும் இடம்பெற்றுள்ளது. ரஷ்யா சமீப ஆண்டுகளில் குரில் தீவுகளில் தனது இராணுவ இருப்பை வலுப்படுத்தியுள்ளது. இதன் மூலம் மாஸ்கோ, இந்தப் பகுதிகள் ரஷ்யாவின் கட்டுப்பாட்டில் உள்ளன; அவற்றை விட்டுக்கொடுக்கும் எண்ணம் இல்லை என்ற தெளிவான செய்தியை அனுப்புகிறது.

இந்தச் சம்பவம் இரு நாடுகளுக்கும் இடையிலான உறவுகளை மேலும் மோசமாக்கும் வாய்ப்பு உள்ளது. ஜப்பான் ஏற்கனவே சீனா, வட கொரியா மற்றும் ரஷ்யா ஆகிய மூன்று நாடுகளிடமிருந்தும் அதிகரித்து வரும் பாதுகாப்புச் சவால்களை எதிர்கொள்கிறது. குறிப்பாக சீனாவுடன் கிழக்கு சீனக் கடல் மற்றும் தைவான் விவகாரங்களில் பதற்றம் நிலவுகிறது. வட கொரியாவின் ஏவுகணை மற்றும் அணு ஆயுதத் திட்டங்களும் ஜப்பானின் பாதுகாப்புக் கணக்கீடுகளை மாற்றியுள்ளன.

இந்த நிலையில் ரஷ்யா குரில் தீவுகளில் தனது இராணுவ நடவடிக்கைகளை அதிகரிப்பது, ஜப்பானை மேலும் அமெரிக்காவுடன் நெருக்கமாக இணைந்து செயல்படத் தூண்டக்கூடும். அதாவது, குரில் தீவுகள் இனி ரஷ்யா–ஜப்பான் இருதரப்பு பிரச்சினையாக மட்டும் இருக்காது. அது அமெரிக்கா–ஜப்பான் பாதுகாப்புக் கூட்டணி, சீனாவின் எழுச்சி, வட கொரியாவின் இராணுவ நடவடிக்கைகள் மற்றும் பசிபிக் பிராந்தியத்தின் எதிர்கால அதிகாரச் சமநிலை ஆகியவற்றுடனும் இணைந்துவிடுகிறது.

புட்டின் குரில் தீவுகளுக்குச் சென்றிருப்பது எண்பது ஆண்டுகளுக்கும் மேலாகத் தீர்க்கப்படாமல் இருக்கும் ஒரு வரலாற்றுப் பிரச்சினையை மீண்டும் உயிர்ப்பித்துள்ளது. ஜப்பானுக்கு இது தனது இறையாண்மைக் கோரிக்கையை வெளிப்படையாக மறுக்கும் ரஷ்ய நடவடிக்கை. ரஷ்யாவுக்கு இது இரண்டாம் உலகப் போரின் முடிவில் உருவான எல்லைகளை மறுபரிசீலனை செய்ய முடியாது என்ற தனது நிலைப்பாட்டை வலியுறுத்தும் நடவடிக்கை.

இரு தரப்பினரின் வரலாற்று விளக்கங்களும், சர்வதேச சட்டத்தின் மீதான புரிதல்களும் ஒன்றுக்கொன்று முரண்படுகின்றன. அதனால் குரில் தீவுகள் வெறும் நான்கு சிறிய தீவுகளின் பிரச்சினையாக இல்லை; அது இரண்டாம் உலகப் போரின் முடிவில் உருவான உலக ஒழுங்கு, இறையாண்மை, சர்வதேச சட்டம் மற்றும் இன்றைய பசிபிக் புவிசார் அரசியல் ஆகிய அனைத்தும் சந்திக்கும் ஒரு முக்கியமான இடமாக மாறியுள்ளது. புட்டினின் இந்தப் பயணம், இந்தத் தீவுகள் ரஷ்யாவின் கட்டுப்பாட்டில் தொடரும் என்ற மாஸ்கோவின் உறுதியை வெளிப்படுத்துகிறது. அதே நேரத்தில், ஜப்பான் தனது வரலாற்று மற்றும் சட்ட உரிமைக் கோரிக்கையை கைவிடப் போவதில்லை என்பதையும் தெளிவுபடுத்தியுள்ளது.

எனவே, குரில் தீவுகள் தொடர்பான பிரச்சினைக்கு விரைவான தீர்வு கிடைப்பது சாத்தியமற்றதாகத் தோன்றுகிறது. ஆனால் ஒரு விஷயம் தெளிவாகிறது: இரண்டாம் உலகப் போர் முடிந்து 81 ஆண்டுகள் கடந்த பின்னரும், அதன் எல்லைத் தீர்மானங்களின் அரசியல் நிழல் கிழக்கு ஆசியாவில் இன்னும் முடிவுக்கு வரவில்லை.