ஆஸ்திரியாவிலும் தீவிரமடையும் வெப்ப அலை

மத்திய மற்றும் தெற்கு ஐரோப்பாவில் தீவிரமடைந்து வரும் வெப்ப அலை மற்றும் வறட்சி காரணமாக ஆஸ்திரியாவில் இதுவரை இல்லாத அளவிலான அதிகபட்ச வெப்பநிலை பதிவாகியுள்ளது. அதேவேளை ஹங்கேரியில் மக்கள் மின்சாரப் பயன்பாட்டைக் குறைத்துக் கொண்டுள்ளனர்.

உலகின் மிக வேகமாக வெப்பமடைந்து வரும் கண்டமான ஐரோப்பா, இந்த கோடைகாலம் முழுவதும் சாதனை அளவிலான வெப்பத்தாலும் அழிவுகரமான காட்டுத்தீகளாலும் கடுமையாகப் பாதிக்கப்பட்டுள்ளது. குறிப்பாக கடந்த சில வாரங்களில் பிரான்ஸ் மற்றும் ஸ்பெயின் ஆகிய நாடுகள் மிக மோசமாகப் பாதிக்கப்பட்டிருந்தன.

தற்போது இந்த வெப்ப அலையின் மையம் கிழக்குப் பகுதிக்கு நகர்ந்துள்ளது.

இத்தாலியின் சில பகுதிகளில் வெப்பநிலை 40°C வரை உயர்ந்ததை அடுத்து, அந்நாடு தனது முக்கிய நகரங்களுக்கு ‘சிவப்பு எச்சரிக்கை’ (Red Heat Alert) விடுத்துள்ளது.

அல்பேனியாவின் தெற்குப் பகுதியான மல்லாகாஸ்டரில் (Mallakaster) தீயணைப்புப் படையினர் தீவிரக் காட்டுத்தீயை எதிர்த்துப் போராடி வருகின்றனர்.

இந்தக் கடுமையான வெப்பம் காரணமாக, ஜூலை மாத இடைவேளைக்குப் பிறகான பாப்பரசர் லியோவின் (Pope Leo) முதலாவது வாராந்திரப் பொதுக் கூட்டத்தை, செயின்ட் பீட்டர்ஸ் சதுக்கத்திற்குப் பதிலாக உட்புற அரங்கிற்கு (indoors) வத்திக்கான் மாற்றியது.

ஸ்லோவாக்கிய எல்லைக்கு அருகில் உள்ள ஆஸ்திரிய நகரமான பாட் டாய்ச்-ஆல்டன்பர்க்கில் (Bad Deutsch-Altenburg) புதன்கிழமை வெப்பநிலை சாதனை அளவாக 41.2°C ஆகப் பதிவானதாக அந்நாட்டின் தேசிய வானிலை சேவையான GeoSphere Austria தெரிவித்துள்ளது. இதற்கு முந்தைய சாதனையான 41°C செவ்வாய்க்கிழமை வியன்னாவிற்கு அருகில் பதிவாகியிருந்தது.

எல்லையின் மறுபுறம் உள்ள ஹங்கேரியில், கடுமையான வறட்சிக்கு மத்தியில் மின் விநியோகக் கட்டமைப்பின் மீதான அழுத்தத்தைக் குறைப்பதற்காக அரசாங்கம் விடுத்த வேண்டுகோளைத் தொடர்ந்து, நிறுவனங்களும் வீடுகளும் இந்த வாரம் மின்சாரப் பயன்பாட்டைக் குறைத்துள்ளன.

அல்பேனியாவின் தெற்கு மல்லாகாஸ்டர் பிராந்தியத்தில், காட்டுத்தீ காரணமாக சுமார் 15 குடும்பங்கள் தங்களது கால்நடைகள் மற்றும் செல்லப் பிராணிகளுடன் வெளியேற்றப்பட்டனர். கிராமத்திற்கு அருகில் உள்ள வீடுகளுக்குத் தீ பரவாமல் தடுக்க நிலத்தடி மற்றும் வான்வழிப் படையினர் தீவிரமாகப் போராடினர்.