கட்டிலில் கட்டுவிரியனை விட்டு கணவரை காலி செய்த மனைவி

தன் கணவனைக் கொலை செய்ய மனைவி ஒருத்தி கையாண்ட விசித்திரமான மற்றும் கொடூரமான வழி, ஒட்டுமொத்த நாட்டையும் அதிர்ச்சியில் உறைய வைத்துள்ளது. இந்த சம்பவம், உத்தரப் பிரதேச மாநிலம் மீரட் பகுதியில் இடம்பெற்றுள்ளது.

மீரட் அருகே உள்ள ஹஸ்தினாபூரில் அதுல் குமார் பன்வார் என்ற நபர் தனியார் பள்ளி ஒன்றை நடத்தி வருகிறார். அவரது மனைவி தாமினிக்கும், அதே பள்ளியில் கார் ஓட்டுநராகப் பணியாற்றும் துஷார் என்பவருக்கும் இடையே கள்ளத்தொடர்பு ஏற்பட்டுள்ளது. இவர்களது உறவுக்குத் தடையாக இருந்த கணவர் அதுல் குமாரை வழிமறிக்காமல் நீக்க, தாமினி ஒரு கோரமான திட்டத்தைத் தீட்டினார்.

கணவரை எளிதில் கொல்லவும், தன் மீது சந்தேகம் வராமல் இருக்கவும் பாம்புகளைப் பயன்படுத்த தாமினி முடிவு செய்தார். இதற்காகத் தனது ஆண் நண்பர் துஷார் மூலம் உள்ளூர் பாம்பாட்டிகளிடம் 15,000 ரூபாய்க்கு இரண்டு கட்டுவிரியன் (Krait) பாம்புகளை விலைக்கு வாங்கினார். இந்தத் திட்டத்தை நிறைவேற்ற, பாம்புகளை மூன்று நாட்களாகப் பட்டினி போட்டு வைத்தனர்.

சம்பவத்தன்று இரவு, கணவர் அதுல் குமார் குடித்த பாலில் தூக்க மாத்திரைகளைக் கலந்து கொடுத்து அவரை மயக்கமடையச் செய்தார் தாமினி. கணவர் ஆழ்ந்த உறக்கத்தில் இருந்தபோது, முன்னரே தயார் செய்து வைத்திருந்த அந்தப் பசி எடுத்த கட்டுவிரியன் பாம்புகளை அவரது படுக்கையில் விட்டுவிட்டார். பாம்புகள் அதுல் குமாரைக் கடிக்க, விஷம் ஏறியதில் அவர் துடிதுடித்து உயிரிழந்தார்.

பாம்பு கடித்து கணவர் இறந்துவிட்டதாக தாமினி நாடகமாடினார். ஆனால், பொலிஸாரின் சந்தேகப் பார்வை அவர் மீது விழுந்தது. விசாரணையைத் தீவிரப்படுத்தியபோது, தாமினியின் செல்போன் உரையாடல்கள் மற்றும் தடயங்கள் மூலம் உண்மை அம்பலமானது. இதனையடுத்து, தாமினி, அவரது கள்ளக்காதலன் துஷார் மற்றும் பாம்புகளை வழங்கிய சோனு, உதய்குமார் ஆகிய நால்வரையும் பொலிஸார் கைது செய்தனர்.

இந்தக் கொடூரச் செய்தி வெளியானவுடன் இணையவாசிகள் கடும் அதிர்ச்சியை வெளிப்படுத்தியுள்ளனர். “தன்னுடைய அறிவை ஆக்கப்பூர்வமான காரியங்களுக்குப் பயன்படுத்தியிருக்கலாம்”, “கட்டுவிரியன் பாம்பின் விஷத்தை விட, அந்தப் பெண்ணின் குணம் கொடியது”, “குற்றவாளிகளுக்கு அதிகபட்ச தண்டனை வழங்கப்பட வேண்டும்” என சமூக வலைதளங்களில் கண்டனக் கணைகள் பறக்கின்றன.

குற்றவாளிகளிடம் தொடர்ந்து விசாரணை நடைபெற்று வருவதாகப் பொலிஸார் தெரிவித்துள்ளனர். கணவனைக் கொல்ல மனைவி பயன்படுத்திய இந்த நவீனக் கொலை முறை, ஹஸ்தினாபூர் பகுதி மக்களை இன்றும் அச்சத்தில் வைத்துள்ளது.