2028 முதல் பிளேஸ்டேஷன் கேம்களில் ‘டிஸ்க்’ (CD/DVD) பயன்பாடு படிப்படியாக நிறுத்தம்?
புதிய பிளேஸ்டேஷன் கேமிங் கன்சோல்களில் CD/DVD போன்ற பிசிகல் டிஸ்க் மூலம் இயங்கும் கேம்களுக்கான ஆதரவை, வரும் 2028-ஆம் ஆண்டு முதல் படிப்படியாக நிறுத்த சோனி நிறுவனம் திட்டமிட்டுள்ளதாகத் தகவல்கள் வெளியாகியுள்ளன.
பி.பி.சி. (BBC) ஊடகம் வெளியிட்டுள்ள செய்திக்குறிப்பின்படி, எதிர்காலத்தில் சந்தைக்கு வரும் புதிய PlayStation மாடல்களில் டிஜிட்டல் பதிவிறக்கம் மற்றும் ஆன்லைன் சேவைகள் மூலமாக மட்டுமே கேம்களைப் பயன்படுத்தும் முறை முழுமையாக விரிவுபடுத்தப்படலாம் எனக் கூறப்படுகிறது.
உலகளவில் டிஜிட்டல் கேமிங் சந்தை வேகமாக வளர்ந்து வரும் நிலையில் சோனி நிறுவனம் இந்த முடிவை நோக்கி நகர்வதாகத் தெரிகிறது.
அதேவேளை, கேமர்களின் நலனைக் கருத்தில் கொண்டு, 2028-ஆம் ஆண்டுக்கு முன்பு வெளியிடப்பட்ட பழைய டிஸ்க் கேம்களுக்கு உடனடியாக எந்தப் பாதிப்பும் ஏற்படாது என்றும், அவற்றுக்கான ஆதரவு மற்றும் மென்பொருள் புதுப்பிப்புகள் காலப்போக்கில் படிப்படியாக மட்டுமே குறைக்கப்படும் என்றும் அச்செய்தியில் தெரிவிக்கப்பட்டுள்ளது.
இருப்பினும், கேமிங் உலகில் பெரும் விவாதத்தைக் கிளப்பியுள்ள இந்த அதிரடித் திட்டம் தொடர்பாக சோனி நிறுவனம் இதுவரை எந்தவொரு அதிகாரப்பூர்வ அறிவிப்பையும் வெளியிடவில்லை என்பது குறிப்பிடத்தக்கது.
