அலாஸ்கா To புடாபெஸ்ட்…. டிரம்ப் VS புட்டின் தொடர் கதையா….  ஐங்கரன் விக்கினேஸ்வரா

உக்ரைனில் தொடரும் போரை முடிவுக்குக் கொண்டு வருவது குறித்து விவாதிக்க டிரம்பும் புட்டினும் கடந்த ஆகஸ்ட் மாதம் அலாஸ்காவில் சந்தித்தனர். ஆனால் அந்த குறுகிய உச்சிமாநாட்டில் எந்த ஒரு ஒரு ஒப்பந்தம் இல்லாமல் பேச்சுவார்த்தை முடிவடைந்தது.

தற்போது ஹங்கேரி தலைநகர் புடாபெஸ்டில் ரஷ்யாவின் விளாடிமிர் புட்டினை சந்திப்பதாக அமெரிக்கத் தலைவர் அறிவித்துள்ளார். மிகுந்த பயனுள்ள தொலைபேசி அழைப்பிற்குப் பிறகு இந்த சந்திப்பை அமெரிக்க அரசும் உறுதி செய்துள்ளது.

ஆகஸ்டில் அலாஸ்காவில் நடந்த ஒரு உச்சிமாநாட்டிற்குப் பிறகு இரு தலைவர்களுக்கும் இடையேயான முதல் உரையாடல் இதுவாகும். அமெரிக்க அதிபர் டிரம்ப், ஆகஸ்ட் 15, 2025, அமெரிக்காவின் அலாஸ்காவில் உள்ள கூட்டுத் தளமான எல்மென்டார்ஃப்-ரிச்சர்ட்சனில் ரஷ்ய அதிபர் விளாடிமிர் புட்டினை சிவப்பு கம்பள வரவேற்பு அளித்து டிரம்ப் – புட்டின் கைகுலுக்கிக் கொண்டதை பல ஐரோப்பிய நாடுகள் கண்டித்துக் கொண்டன.

தற்போது உக்ரைனில் போர் குறித்த பேச்சுவார்த்தைக்காக தானும் ரஷ்யாவின் அதிபர் விளாடிமிர் புட்டினும் மீண்டும் சந்திக்க ஒப்புக்கொண்டதாக அமெரிக்க அதிபர் டொனால்ட் டிரம்ப் கூறியதை ரஷ்ய தரப்பு உறுதி செய்யவில்லை.

இரு தலைவர்களும் நீண்ட நேர தொலைபேசி அழைப்பை நடத்திய பின்னர், ஹங்கேரிய தலைநகர் புடாபெஸ்டில் புட்டினை சந்திப்பதாக டிரம்ப் சமூக ஊடகங்களில் அறிவித்துள்ளார். இந்தச் சந்திப்பு இரண்டு வாரங்களுக்குள் நடக்கும் என்று டிரம்ப் பின்னர் ஒரு செய்தியாளர் கூட்டத்தில் தெரிவித்தார்.

உக்ரைனுக்கு டோமாஹாக் ஏவுகணைகளை விற்பது, போரின் முழுமையான புதிய அளவிலான விரிவாக்கம் என்று புட்டின் எச்சரித்திருந்தாலும், ரஷ்ய ஜனாதிபதியுடனான தனது அழைப்பிற்கு முன்பு, செய்தியாளர்களிடம் டிரம்ப் அதை பரிசீலித்து வருவதாகக் கூறினார்.

போர்க்களத்தில் ரஷ்யா டொனெட்ஸ்க் தாக்குதலில் கவனம் செலுத்துவதால், உக்ரைனின் ஜெலென்ஸ்கி டிரம்பை சந்தித்து உள்ளார். வெள்ளை மாளிகையில் டிரம்பை சந்திக்க ஜெலென்ஸ்கி தயாராகி வருவதால், வான்வழித் தாக்குதல்களைத் தடுக்கவும் ரஷ்யாவைத் தாக்கவும் அதிக ஆதரவை கீவ் அரசு கோருகிறது. இது இரு நாடுகளின் நடந்து வரும் போரில் ரஷ்ய பிரதேசத்தில் ஆழமாகத் தாக்க அனுமதிக்கும்.

ரஷ்யாவுடான பேச்சுவார்த்தைகள் குறித்து ஜெலென்ஸ்கியிடம் விளக்குவதாக டிரம்ப் கூறியிருந்தார். தொலைபேசி உரையாடலுடன் பெரும் முன்னேற்றம் ஏற்பட்டதாக அவர் மேலும் கூறினார். தனக்கும் புட்டினுக்கும் இடையிலான மற்றொரு சந்திப்புக்குத் தயாராவதற்கு மூத்த அமெரிக்க மற்றும் ரஷ்ய அதிகாரிகள் அடுத்த வாரம் சந்திப்பார்கள் என்றும் டிரம்ப் கூறினார்.

வலிமை மற்றும் நீதியின் மொழி மூலமே ரஷ்யாவை பேச்சுவார்த்தை மேசைக்குக் கொண்டுவரும் என்று ஜெலென்ஸ்கி குறிப்பிட்டார். டோமாஹாக்ஸைப் பற்றி கேள்விப்பட்டவுடன் மாஸ்கோ மீண்டும் உரையாடலைத் தொடங்க விரைந்து வருவதை நாம் ஏற்கனவே காணலாம் என்றும் ஜெலென்ஸ்கி கிண்டலாக மேலும் கூறியுள்ளார்.

உக்ரைனின் நீண்ட தூர தாக்குதல்களை நடத்தும் திறனை அதிகரிப்பது, போரை முடிவுக்குக் கொண்டு வரும். அதற்கான நேரடி பேச்சுவார்த்தைகளுக்கான டிரம்பின் அழைப்புகளை இன்னும் தீவிரமாக எடுத்துக்கொள்ள புட்டினை கட்டாயப்படுத்தும் என்றும் ஜெலென்ஸ்கி வாதிட்டுள்ளார்.

டோமாஹாக் ஏவுகணைகள் சுமார் 1,600 கிமீ தூரம் சென்று தாக்கும் திறன் கொண்டுள்ளன. மேலும் அவை மாஸ்கோ மற்றும் பிற முக்கிய ரஷ்ய நகரங்களைத் தாக்குவதை சாத்தியமாக்கும் என உக்ரைனிய ராணுவ வட்டாரங்கள் தெரிவிக்கின்றன.

ஆனாலும் அமெரிக்கா உக்ரைனுக்கு டோமாஹாக் ஏவுகணைகளை அனுப்புவதற்கான சாத்தியக்கூறுகள் குறித்து ஆழமாக விவாதிக்கவில்லை என்று டிரம்ப் கூறினார். உக்ரைனின் ஏவுகணைகளுக்கான கோரிக்கை குறித்து கேட்டபோது, அமெரிக்காவிற்கும் டோமாஹாக் தேவை என்று டிரம்ப் தெரிவித்தார்.

ரஷ்யப் படைகள் உக்ரைனைத் தொடர்ந்து குண்டு வீசி எரிசக்தி உள்கட்டமைப்பை அழித்து வருகிறது.

எட்டு உக்ரேனிய பிராந்தியங்கள் தொடர் தாக்குதலுக்குப் பிறகு மின்தடையை சந்தித்ததாக உக்ரைனின் தேசிய எரிசக்தி நிறுவனம் தெரிவித்துள்ளது.

மேலும் உக்ரைன் நாட்டின் மிகப்பெரிய தனியார் எரிசக்தி நிறுவனமான DTEK, தலைநகர்கிவ்வில் மின்தடை ஏற்பட்டதாக அறிவித்தது. மேலும் வேலைநிறுத்தங்கள் காரணமாக மத்திய பொல்டாவா பிராந்தியத்தில் அதன் இயற்கை எரிவாயு பிரித்தெடுப்பை நிறுத்த வேண்டியிருந்தது என்றும் கூறியது.

இந்த மாதத்தில் ஆறாவது முறையாக இயற்கை எரிவாயு உள்கட்டமைப்பு சேதமடைந்துள்ளதாக உக்ரைனின் அரசுக்கு சொந்தமான எண்ணெய் மற்றும் எரிவாயு நிறுவனமான நாஃப்டோகாஸ் தெரிவித்துள்ளது.

அண்மையில் புட்டினை மிரட்டும் வண்ணம், போர் முடிவுக்கு வராவிட்டால், நான் அவர்களுக்கு டோமாஹாக்ஸை அனுப்பப் போகிறேன் என்று டிரம்ப் கூறினார். டோமாஹாக் ஒரு நம்பமுடியாத ஆயுதம், மிகவும் ஆபத்தான தாக்குதல் ஆயுதம். நேர்மையாகச் சொன்னால், ரஷ்யாவை வீழ்த்த அது தேவையில்லை என்று டிரம்ப் கூறினார்.

காசாவில் போர்நிறுத்தம் அமலுக்கு வந்தபோது இஸ்ரேல் நாடாளுமன்றத்தில் டிரம்ப் உரையாற்றினார். அந்த உரையில், காசா போர்நிறுத்த ஒப்பந்தம் ரஷ்யாவிற்கும் உக்ரைனுக்கும் இடையில் ஒரு போர்நிறுத்தத்திற்கான அடித்தளத்தை அமைக்கக்கூடும் என்று டிரம்ப் சமிக்ஞை செய்தார். புட்டினுக்கு மேலும் அழுத்தம் கொடுக்கத் தயாராக இருப்பதை தெளிவுபடுத்தினார்.

முதலில், ரஷ்யா போரை நிறுத்த வேண்டும். இல்லையெனில்

நாம் அதைச் செய்ய, ரஷ்யாவிற்கு அழுத்தம் கொடுக்க வேண்டும். காசா போர்நிறுத்த ஒப்பந்தத்தின் உத்வேகம் உக்ரைனில் ரஷ்யாவின் போரை முடிவுக்குக் கொண்டுவர உதவும் என்று பல சர்வதேச அரசியல் வல்லுநர்கள் நம்பிக்கை தெரிவித்துள்ளனர்.

மேலும் மத்திய கிழக்கில் அமைதி திரும்பினால், இந்த போரை கட்டுப்படுத்தும் உத்வேகம் உக்ரைனுக்கு கிடைக்கும். ரஷ்யாவின் போரை முடிவுக்குக் கொண்டுவர இது உதவும் என்று எதிர்பார்க்கிறோம் என்றும் சில இராணுவ ஆய்வாளர்கள் தெரிவித்துள்ளனர்.

ஒப்பந்தம் ஏதுமின்றி முடிவடைந்த ஆகஸ்ட் அலாஸ்கா சந்திப்பிலிருந்து, ரஷ்யாவிலிருந்து எண்ணெய் வாங்குவதை நிறுத்துமாறு உலகத் தலைவர்கள் மீது டிரம்ப் அழுத்தம் கொடுத்துள்ளார். இந்தியப் பிரதமர் நரேந்திர மோடி ரஷ்ய எண்ணெய் வாங்குவதை நிறுத்துவதாக உறுதியளித்ததாக டிரம்ப் கூறினாலும், இந்திய அரசு அதனை மறுத்துள்ளது.