உள்ளூராட்சித் தேர்தல் மே 3 நள்ளிரவுடன் பிரசாரத்துக்குத் தடை
உள்ளூராட்சி மன்றத் தேர்தல் தொடர்பான அனைத்து பிரசார நடவடிக்கைகளும் மே 3 ஆம் திகதி நள்ளிரவுக்குப் பிறகு முடிவடையும் என்றும் அதன்படி, மே 3 ஆம் திகதி முதல் தேர்தல் நாள் வரையிலான காலம் தேர்தல் அமைதி காலமாக அறிவிக்கப்படும் என்றும் தேர்தல்கள் ஆணையாளர் நாயகம் சமன் ஸ்ரீ ரத்நாயக்க தெரிவித்துள்ளார்.
வீடு வீடாகச் சென்று அதிகாரப்பூர்வ வாக்காளர் அட்டைகளை விநியோகிக்கும் திட்டம் நேற்று செவ்வாய்க்கிழமை வரை செயற்படுத்தப்பட்டதாகவும் அதிகாரப்பூர்வ வாக்காளர் அட்டைகளை பெறாத எவரும் இந்த மாதம் 30 ஆம் திகதிக்குப் பிறகு தங்கள் பகுதியில் உள்ள அஞ்சல் அலுவலகத்திற்குச் சென்று அந்த வாக்காளர் அட்டைகளை பெறலாம் என்றும் தெரிவித்தார்.
இந்த ஆண்டு உள்ளூராட்சித் தேர்தலின் போது வாக்காளர்கள் வாக்களிப்பதை குறிக்க சுண்டு விரலைப் பயன்படுத்த தேர்தல் ஆணைக்குழு முடிவு செய்துள்ளதாகவும் தேர்தல் ஆணையாளர் மேலும் தெரிவித்தார்.
இதேவேளை தபால் திணைக்களத்துக்கு விநியோகிப்பதற்காக வழங்கப்பட்ட அதிகாரப்பூர்வ வாக்காளர் அட்டைகளில் 94 வீதத்துக்கும் அதிகமானவை இதுவரை விநியோகிக்கப்பட்டதாக தபால் திணைக்களம் தெரிவித்துள்ளது.
உங்கள் உத்தியோகபூர்வ வாக்காளர் அட்டைகள் கிடைக்கப்பெறவில்லை என்றால், உங்கள் உள்ளூர் தபால் அலுவலகம் அல்லது பிரதி தபால் நிலையத்திற்குச் சென்று, உங்கள் அடையாளத்தைச் சரிபார்த்து, தேர்தல் நாள் வரை உங்கள் உத்தியோகபூர்வ வாக்காளர் அட்டைகளைப் பெறலாம் என்றும் தபால் திணைக்களம் தெரிவித்துள்ளது.
