நிகழ்நிலை (ஒன்லைன்) பாதுகாப்புச் சட்டம் சஜித் அணிக்குள் பிளவு ஏற்படுமா?

தேசிய மக்கள் சக்தி அரசாங்கத்துக்கு நெருக்கடி ஏற்படுத்தும் வகையில் நிகழ்நிலை(ஒன்லைன்) பாதுகாப்பு சட்டம் தொடர்பில் தமது எதிர்ப்பை வெளிப்படுத்துவதற்கு ஐக்கிய மக்கள் சக்தி பாராளுமன்ற உறுப்பினர்கள் தீர்மானித்துள்ள போதும், சஜித் பிரேமதாச அதற்கு எதிர்ப்பு தெரிவித்துள்ளதாகவும் சமூக ஊடகங்கள் மூலம் தாம் கடுமையான விமர்சனத்துக்கு உள்ளாக்கப்படுவதால் அந்த சட்டத்துக்கு ஆதரவளிக்கவுள்ளதாகவும் தெரிவிக்கப்பட்டுள்ளது.

கடந்த வியாழக்கிழமை கட்சி உறுப்பினர்களுடன் இடம்பெற்ற கலந்துரையாடலில் நிகழ்நிலை பாதுகாப்பு சட்டம் மற்றும் பாராளுமன்ற குழுக்களின் எண்ணிக்கையை குறைக்கும் அரசாங்கத்தின் தீர்மானம் ஆகியவற்றுக்கு எதிராக தமது எதிர்ப்பை வெளியிடுவதற்கு தீர்மானிக்கப்பட்டுள்ளது.

அங்கு சமூக ஊடகங்கள் தற்போது அரசுக்கு தலைவலியாக இருப்பதால் அதற்கு எதிராக சில நடவடிக்கைகளை எடுப்பது குறித்து ஆலோசித்து வருவதாக பெரும்பாலான பாராளுமன்ற உறுப்பினர்கள் சஜித் பிரேமதாசவிடம் சுட்டிக்காட்டியுள்ளனர்.

சஜித் பிரேமதாச மற்றும் ஐக்கிய மக்கள் சக்தியை சமூக வலைதளங்கள் கடுமையாக தாக்கியுள்ளதால், இனிமேல் நிகழ்நிலை பாதுகாப்பு சட்டத்திற்கு ஆதரவாக கருத்து தெரிவிக்க வேண்டாம் என்றும் அதை ஒழிக்க பாடுபட வேண்டும் என்றும் பல பாராளுமன்ற உறுப்பினர்கள் கருத்து தெரிவித்தனர்.

ஆனால் சஜித் பிரேமதாச அதற்கு எதிராக கடுமையான நிலைப்பாட்டை எடுத்தது அனைத்து பாராளுமன்ற உறுப்பினர்களையும் ஆச்சரியத்தில் ஆழ்த்தியுள்ளது.

சமூக ஊடகங்கள் மூலம் தானும் தனது குடும்பமும் கடுமையாக விமர்சிக்கப்பட்டமையால், சமூக ஊடக கட்டுப்பாட்டுக்கு தாம் எப்போதும் ஆதரவாக இருப்பதாகவும் தனிப்பட்ட நலன்களுக்காக ஒருபோதும் எமது கொள்கையை மாற்றக் கூடாது எனவும் கருத்து வெளியிட்டுள்ளார்.

அதன்பின், பாராளுமன்றத்தில் குழுக்களின் எண்ணிக்கையை குறைக்க அரசு மேற்கொண்டுள்ள முயற்சிகள் குறித்து விவாதிக்கப்பட்டது. இதற்கு கடும் ஆட்சேபம் தெரிவிக்க வேண்டும் என்றும் இவ்வாறு கருத்து தெரிவிக்கும் எதிர்க்கட்சிகளின் உரிமையை அரசாங்கம் பறிக்கும் பட்சத்தில் அந்தக் குழுக்கள் அனைத்தையும் புறக்கணிக்க எதிர்க்கட்சிகள் முடிவு செய்ய வேண்டும் என்றும் உறுப்பினர்கள் சுட்டிக்காட்டியுள்ளனர்.

ஆனால் நிதிக்குழுவின் தலைவர் பதவிக்கு ஹர்ஷ டி சில்வாவின் பெயரை ஐக்கிய மக்கள் சக்தி ஏற்கனவே முன்மொழிந்துள்ளதாகவும் அத்துடன், கட்சித் தலைவர்கள் கூட்டம் பாராளுமன்றத்தின் முக்கியமான குழு எனவும் சஜித் பிரேமதாச சுட்டிக்காட்டியுள்ளார்.

அதன்படி, இறுதியில் நிதிக்குழு மற்றும் கட்சித் தலைமைக் கூட்டத்தைத் தவிர ஏனைய அனைத்து குழுக்களையும் புறக்கணிக்க ஐக்கிய மக்கள் சக்தி தீர்மானித்துள்ளதுடன், இது தொடர்பாக எதிர்க்கட்சிகளின் ஏனைய கட்சிகளுடன் கலந்துரையாடவும் தீர்மானிக்கப்பட்டுள்ளது.