திலீபனின் சிலை அகற்றப்பட்டமைக்கு விடுதலைச் சிறுத்தைகள் கட்சி கண்டனம்

யாழ்ப்பாணம், நல்லூரில் பொதுமக்களால் நிறுவப்பட்டதாகக் கூறப்படும் லெப்டினன்ட் கேணல் திலீபனின் சிலை அகற்றப்பட்டமைக்கு விடுதலைச் சிறுத்தைகள் கட்சியின் தலைவர் தொல். திருமாவளவன் கண்டனம் தெரிவித்துள்ளார்.

இது தொடர்பாக செப்டம்பர் 27 ஆம் திகதி வெளியிட்ட அறிக்கையில்,

இலங்கை ஜனாதிபதி அனுரகுமார திசாநாயக்க தலைமையிலான அரசாங்கத்தின் நடவடிக்கையை அவர் விமர்சித்துள்ளார்.

சில நாள்களுக்கு முன்னர் நல்லூரில் பொதுமக்களால் நிறுவப்பட்ட திலீபனின் சிலையை இலங்கை காவல்துறையினர் அகற்றியுள்ளதாகவும், இது தமிழ் மக்களின் உணர்வுகளைப் பாதிக்கும் நடவடிக்கை எனவும் திருமாவளவன் தனது அறிக்கையில் தெரிவித்துள்ளார்.

1987ஆம் ஆண்டு செப்டம்பர் 26ஆம் திகதி திலீபன் உயிரிழந்ததை சுட்டிக்காட்டிய அவர், இந்திய அரசாங்கத்திடம் சில கோரிக்கைகளை முன்வைத்து 12 நாட்கள் உண்ணாவிரதப் போராட்டத்தில் ஈடுபட்டதாகவும் குறிப்பிட்டுள்ளார்.

திலீபன் ஆயுதப் பயிற்சி பெற்றிருந்த போதிலும், உண்ணாவிரதம் உள்ளிட்ட அறவழிப் போராட்டத்தின் மூலம் தனது கோரிக்கைகளை முன்வைத்ததாகவும், இதன் காரணமாக தமிழ் மக்களிடையே அவர் முக்கியத்துவம் பெற்றதாகவும் திருமாவளவன் தெரிவித்துள்ளார்.

கடந்த 39 ஆண்டுகளாக உலகெங்கிலும் உள்ள தமிழ் மக்கள் திலீபனை நினைவுகூர்ந்து வருவதாகக் குறிப்பிட்ட அவர், நல்லூரில் அவரது சிலை நிறுவப்பட்டமை தமிழ் மக்களின் நினைவுகூரல் மற்றும் நன்றியுணர்வின் வெளிப்பாடு என தெரிவித்துள்ளார்.

சிலை அகற்றப்பட்ட நடவடிக்கையை விமர்சித்த திருமாவளவன், சிலையை அகற்றியிருக்கலாம் என்றாலும் திலீபனை தமிழ் மக்களின் நினைவிலிருந்து அகற்ற முடியாது எனவும் தனது அறிக்கையில் குறிப்பிட்டுள்ளார்.

மேலும், திலீபனின் கனவு ஒருநாள் நனவாகும் என்ற நம்பிக்கையுடன் உலகத் தமிழர்கள் ஒன்றிணைந்து செயற்பட வேண்டும் எனவும் அவர் அழைப்பு விடுத்துள்ளார்.