கடத்தலில் ஈடுபட்ட வெள்ளை கார் – மடக்கிப்பிடித்த இளைஞர்கள்
மாடுகளை கடத்தி செல்வதற்கு பயன்படுத்தபட்டதாக சந்தேகிகிக்கப்படும் வாகனமொன்றை கிளிநொச்சி, புதுக்குடியிருப்பு இளைஞர்கள், பொலிஸில் ஒப்படைத்த சம்பவமொன் நேற்று இரவு இடம்பெற்றுள்ளது.
கிளிநொச்சி, புதுக்குடியிருப்பு பிரதேசத்தில் அண்மைக்காலமாக வளர்ப்பு மாடுகள் திருட்டுப்போகும் சம்பவங்கள் அதிகளவில் பதிவாகி வருகின்றன. இதனையடுத்து குறித்த கால்நடைவளர்ப்பு உரிமையாளர்களினால் பொலிஸில் முறைப்பாடும் அளிக்கப்பட்டுள்ளது.
இந்த நிலையில், குறித்த பகுதியில் மாடுகளை கடத்துவதற்கு பயன்படுத்தப்பட்டதாகத் தெரிவிக்கப்படும் வாகனத்தை பிரதேச இளைஞர்கள் நேற்று மடக்கிப் பிடித்து, பொலிஸில் ஒப்படைத்துள்ளனர்.
சந்தேகத்திற்கு இடமான வகையில் குறித்த வாகனம் நடமாடுவதை குறித்த கிராம மக்கள் அவதானித்து கடந்த சில நாட்களுக்கு முன்னர் அதனை பிடிக்க முயற்சி செய்துள்ளனர்.
எனினும், அந்த முயற்சி பலனளிக்காத நிலையில் குறித்த வாகன இலக்கத்தினை கண்காணித்து வைத்திருந்தனர்.
இவ்வாறிருக்க, நேற்று குறித்த வாகனமானது புதுக்குடியிருப்பு நகர் பகுதியில் சென்றபோது இளைஞர்கள் ஒன்றிணைந்து அதனை மடக்கிப் பிடித்துள்ளனர்.
இதனையடுத்து குறித்த பகுதியில் அமைதியின்மை ஏற்பட்டதாக எமது பிராந்திய செய்தியாளர் தெரிவித்துள்ளார்.
இதனையடுத்து சம்பவ இடத்திற்கு சென்ற பொலிஸார் குறித்த வாகனத்தையும், சாரதியையும் புதுக்குடியிருப்பு பொலிஸ் நிலையத்திற்கு அழைத்து சென்றிருந்தனர்.
குறித்த வாகனத்தை நீதிமன்றில் முற்படுத்தும் நடவடிக்கையினை பொலிஸார் மேற்கொண்டு வருகின்றனர்.
இந்த சம்பவம் தொடர்பான மேலதிக விசாரணைகளை புதுக்குடியிருப்பு பொலிஸார் மேற்கொண்டு வருகின்றனர்.
