தொடர்ச்சியாக மீட்கப்படும் இலக்கத்தகடற்ற சொகுசு வாகனங்கள்
புத்தளம் மாவட்டம் வென்னப்புவ பகுதியில் உரிமையாளரற்ற வீடொன்றிலிருந்து சொகுசு டிஃபென்டர் ரக வாகனம் ஒன்று மீட்கப்பட்டுள்ளது.
அந்த வாகனத்தில் இலக்கத்தகடு இல்லையென பொலிஸார் தெரிவித்துள்ளனர்.
குறித்த வாகனத்தை பயன்படுத்தியவர்கள் குறித்து விசாரணைகள் இடம்பெற்று வருவதாகவும் தெரிவிக்கப்பட்டுள்ளது.
இதேவேளை, கடந்த சில தினங்களுக்கு முன்னர் நாட்டின் பல்வேறு பகுதிகளில் பதிவு செய்யப்படாத பல சொகுசு வாகனங்கள் கண்டுபிடிக்கப்பட்டன.
சட்டவிரோதமான முறையில் பொருத்தப்பட்ட சொகுசு காரை பயன்படுத்திய சம்பவம் தொடர்பில் கைது செய்யப்பட்ட முன்னாள் இராஜாங்க அமைச்சர் லோகன் ரத்வத்த தற்போது தடுப்புக் காவலில் வைக்கப்பட்டுள்ளார்.
இந்த சம்பவம் தொடர்பில் அவரது மனைவியும் இன்று வியாழக்கிழமை வரை விளக்கமறியலில் வைக்கப்பட்டுள்ளார்.
இதேவேளை, சட்டவிரோதமாக பொருத்தப்பட்ட பி.எம்.டபிள்யூ காரை பயன்படுத்திய குற்றச்சாட்டில் முன்னாள் அமைச்சர் ஜோன்ஸ்டன் பெர்னாண்டோ கைது செய்யப்பட்டு பின்னர் பிணையில் விடுவிக்கப்பட்டார்.
