இத்தாலிய தூதரகத்தை புகைப்படம் எடுத்த மர்ம நபர்: யார்?

குருந்துவத்த, ஜாவத்த வீதியில் இத்தாலிய தூதரகத்தை கையடக்கத் தொலைபேசியில் புகைப்படம் எடுத்துக் கொண்டிருந்த சந்தர்ப்பத்தில் நபர் ஒருவர் கைது செய்யப்பட்டுள்ளார்.

(28) அதிகாலை கைது செய்யப்படும் போது, கொழும்பு மற்றும் அதனை அண்மித்த பகுதிகளில் முக்கியமான இடங்களின் புகைப்படங்களுடன் கூடிய 700 பக்கங்களுடனான புத்தகம் சந்தேகநபரிடம் காணப்பட்டுள்ளது.

சந்தேகநபரிடம் அந்த புத்தகத்திற்கு மேலதிகமாக, பிரபுக்களின் இரகசிய உரையாடல் குறிப்புகள் மற்றும் அதற்கு சந்தேகநபர் வழங்கிய எதிர்மறை பதில்கள் உள்ளடங்கிய குறிப்புகளின் புத்தகம் மற்றும் நாட்குறிப்பு புத்தகம், புகைப்படம் எடுக்கப்பட்ட கையடக்கத் தொலைபேசி மற்றும் மோட்டார் சைக்கிள் ஒன்றும் பொலிஸாரால் கைப்பற்றப்பட்டுள்ளது.

நடமாடும் சுற்றிவளைப்பை மேற்கொண்ட பொலிஸ் விசேட அதிரடிப்படையினர் சந்தேகநபரை கைது செய்து மேலதிக விசாரணைகளுக்காக குருந்துவத்த பொலிஸாரிடம் ஒப்படைத்துள்ளனர்.

கொழும்பு புறக்கோட்டை மெனின் சந்தையில் சகோதரர் ஒருவருடன் இணைந்து வியாபார நடவடிக்கைகளில் ஈடுபட்டு வந்துள்ள சந்தேகநபர் , சில மாதங்களுக்கு முன்னர் குறித்த செயற்பாடுகளில் இருந்து விலகியுள்ளதாக பொலிஸ் விசாரணைகளின் போது தெரியவந்துள்ளது.

54 வயதுடைய சந்தேகநபர் கொட்டுகொட, யாகொடமுல்லை பிரதேசத்தை சேர்ந்தவர் என தெரியவந்துள்ளது.