சிறையில் நாடகம்.. வேடம்போட்ட கைதிகள் தப்பியோட்டம்!
உத்தரகாண்ட் சிறைச்சாலையில் நாடகம் போட்டபோது, வேடமிட்டு நடித்த சிறைக் கைதிகள் இருவர் தப்பியோடிய சம்பவம் பரபரப்பை ஏற்படுத்தி உள்ளது.
நாடு முழுவதும் நவராத்திரையை முன்னிட்டு ஆயுத பூஜை மற்றும் விஜயதசமி, தசரா பண்டிகைகள் சிறப்பாகக் கொண்டாடப்பட்டு வருகின்றன. அந்த வகையில், உத்தரகாண்ட் மாநிலத்திலும் நவராத்திரி விழா கொண்டாடப்பட்டு வருகிறது. இந்த விழாவைப் பயன்படுத்தி, சிறைச்சாலையில் நாடகம் போட்டபோது, வேடமிட்டு நடித்த சிறைக் கைதிகள் இருவர் தப்பியோடிய சம்பவம் பரபரப்பை ஏற்படுத்தி உள்ளது.
நவராத்திரி விழாவை முன்னிட்டு உத்தரகாண்ட் மாநிலம் ஹரித்வாரில் உள்ள ரோஷ்னாபாத் சிறைச்சாலையில் கைதிகளை வைத்து ’ராம்லீலா’ நாடகம் நடத்தப்பட்டுள்ளது. இதில் அனுமானின் வானரசேனையில் இடம்பெறும் குரங்குகளாக வேடமிட்டு நடித்த இரண்டு கைதிகள் சீதையைத் தேடுவதுபோல் காட்சிக்கு வெளியே சென்றுள்ளனர். ஆனால் சென்றவர்கள் திரும்பி வரவே இல்லை. அதன்பிறகே அவர்கள் தப்பியோடியதைச் சிறை அதிகாரிகள் உணர்ந்துள்ளனர்.
கொலை வழக்கில் கைதாகி ஆயுள் தண்டனை விதிக்கப்பட்டிருந்த பங்கஜ் என்ற கைதியும், ஆள் கடத்தல் வழக்கில் கைதாகி, சிறைக்கு வந்த ராஜ்குமார் என்ற கைதியும் தப்பியோடி உள்ளனர். அவர்கள் இருவரும் இணைந்து சிறையிலிருந்து தப்பிக்க வெகுநாட்களாகத் திட்டம் தீட்டி வந்ததாகவும் கூறப்படுகிறது.
இந்த நிலையில்தான், சிறையில் நடைபெற்ற நவராத்திரி ராம்லீலா நாடகத்தின்போது, குரங்கு வேடமிட்ட அவர்கள், சீதையைத் தேடச் செல்லும் காட்சியில் நைசாக நழுவியுள்ளர். மேலும், கட்டுமானப் பணிக்காகச் சிறையில் வைத்திருந்த ஏணியைப் பயன்படுத்தி சிறைச் சுவரைத் தாண்டி வெற்றிகரமாகத் தப்பித்துள்ளனர். தற்போது போலீசார் அவர்களை தேடும் பணியில் தீவிரமாய்க் களமிறங்கியுள்ளனர்.
