கூகுள் இணை நிறுவனர் செர்ஜி பிரின் மனைவியுடன் எலான் மாஸ்க் தொடர்பில் உள்ளாரா…?

உலக பணக்காரர்களின் பட்டியலில் முதலிடம் வகிப்பவரும், ஸ்பேஸ் எக்ஸ் நிறுவனங்களின் தலைவருமான எலான் மஸ்க்கிற்கு தற்போது 50 வயது ஆகிறது. இவர் கடந்த 2000-ம் ஆண்டு ஜஸ்டின் வில்சன்என்பவரை திருமணம் செய்துகொண்டார். 8 ஆண்டுகள் நீடித்த இவர்களது உறவு கடந்த 2008-ம் ஆண்டு முடிவுக்கு வந்தது.

இதையடுத்து கடந்த 2010-ம் ஆண்டு டலுலா ரிலே என்ற நடிகையை இரண்டாவதாக திருமணம் செய்துகொண்டார் எலான் மஸ்க். கடந்த 2012-ம் ஆண்டு அவருடன் ஏற்பட்ட மனக்கசப்பு காரணமாக அவரை விட்டு பிரிந்தார். பின்னர் அடுத்த ஆண்டே இவர்கள் மீண்டும் இணைந்தனர். 3 ஆண்டுகள் மட்டுமே நீடித்த இவர்களது உறவு 2016-ம் ஆண்டு முடிவுக்கு வந்தது. டலுலா ரிலேவை எலான் மஸ்க் இரண்டு முறை விவாகரத்து செய்தார் என்பது குறிப்பிடத்தக்கது. இதையடுத்து கிரீம்ஸ் என்கிற பாடகியை காதலித்த எலான் மஸ்க் அவரை திருமணம் செய்துகொள்ளாமல் லிவிங் டுகெதர் முறையில் வாழ்ந்து வந்தார்.

இந்த உறவும் 3 ஆண்டுகளில் கசந்துபோக அவரை விட்டு பிரிவதாக கடந்த ஆண்டு அறிவித்தார் . இந்நிலையில், தொழிலதிபர் எலான் மஸ்க் தற்போது மீண்டும் காதல் வலையில் விழுந்து உள்ளார். ஆஸ்திரேலியாவை சேர்ந்த நட்டாஷா பஸ்செட் என்கிற நடிகையை அவர் தற்போது காதலித்து வருகிறாராம். அவருடன் அவ்வப்போது டேட்டிங்கும் சென்று வருகிறாராம் எலான் மஸ்க். 50 வயதாகும் எலான் மஸ்க் 27 வயதாகும் நடிகை நட்டாஷா பஸ்செட்டை காதலித்து வருவது தான் தற்போது சமூக வலைதளங்களில் பேசுபொருளாகி உள்ளது.

இந்த நிலையில் கூகுள் இணை நிறுவனரும் கோடீஸ்வரருமான செர்ஜி பிரின் மனைவி நிக்கோல் ஷனாஹனுடன் எலான் மாஸ்க் காதல் வசப்பட்டு உள்ளார் என அமெரிக்க பத்திரிகை ஒன்று செய்தி வெளியிட்டது. ஆனால் இதனை எலான் மாஸ்க் மறுத்து உள்ளார். அவர் தனது டுவிட்டரில் செர்ஜியும் நானும் நண்பர்கள் மற்றும் நேற்றிரவு ஒன்றாக ஒரு விருந்தில் இருந்தோம்! நான் நிக்கோலை மூன்று ஆண்டுகளில் இரண்டு முறை மட்டுமே பார்த்தேன், இரண்டு முறையும் பலர் உடன் இருந்தனர். அவ்ருடன் காதல் எதுவும் இல்லை என கூறி உள்ளார்.

செர்ஜி பிரின் ஜனவரி மாதம் மனைவி நிக்கோல் ஷனாஹனுடன் “சமரசம் செய்ய முடியாத வேறுபாடுகளை” மேற்கோள் காட்டி விவாகரத்து கோரி சாண்டா கிளாரா கவுண்டி உயர் நீதிமன்றத்தில் மனு தாக்கல் செய்தார், டிசம்பர் 15, 2021 முதல் பிரிந்துவிட்டதாக அவர் கூறி உள்ளார்.